Read O Debleskro Drom - I Bibla an o Romano Rakepen 2021 Jeremia 18 Bible Online

Jeremia 18 - O Debleskro Drom - I Bibla an o Romano Rakepen 2021 bible

Jeremia 18

¹O baro Dewel rakras ap o Jeremia un penas:

²Dja tele an ko kheer kolestar, kai krell pirja dran tchik[4]. Koi shuneh tu, hoi kamau tuke te penell.

³Un me djom tele an ko kheer kolestar, kai krell pirja[5], un dikom les pash i budi kol dui barrentsa, hoi rissrenn pen, te well dran i tchik i piri.

⁴Un te was koi piri gar mishto, hoi job kras dran tchik, koi kras job latar i wawar, jaake har glan leskre jaka mishto his.

⁵Koi penas o baro Dewel ap mande:

⁶Putchau tumendar dran o kheer Israel: Nai krau me tumentsa gar har kowa kai krell pirja? Dikenn, har koi tchik an leskro wast hi, jaake han ninna tumer dran o kheer Israel an miro wast.

⁷Nai well i tsiro, kai penau me i menshenge an i rajeskro them, te lap len win dran lengro them, phagap ko them tele un krap les paash.

⁸Te mukenn jon palle pengro tchilatcho koowa, khaitell man kowa, kai dom len trad, te well bibacht pral lende.

⁹I wawar kopo penau me ap i menshende an i rajeskro them, kai krau len baro un sorelo.

¹⁰Te krenn jon palle, hoi djungeles glan mande hi, un shunenn gar, hoi lenge penau, krau me lenge gar ko latchepen, hoi kamom lenge te krell.

¹¹Un kanna Jeremia, pen kol menshenge an Juda un kolenge, kai djiwenn an Jerusalem: Kowa penell o baro Dewel: Djinenn, man hi an o dji, te dap tumen i phagi, un kamau bibacht pral tumende te anell. Doleske djan tele hakeno peskro tchilatcho dromestar! Un djiwenn i wawar djipen!

¹²Jon penenn: “Na-a, hoske? Mer kamah jaake te djiwell, har mer kamah.” Un hakeno djal pal peskro shero un krell, hoi leskro tchilatcho dji leske penella.

¹³Doleske penell o baro Dewel: Putchenn i menshendar an wawar themma: Kai das sawo djungelo koowa, har kol menshe dran Israel kran?

¹⁴Te dell gib ap i berga Libanon, atchell o gib i raheder tsiro tchiddo, un ko brishineskro pani nashell gar jaake sik krik,

¹⁵har mire menshe man bistran. Jon anenn viechen un sungepaskro koowa kol deblenge, kai kek hi. Kolla anan len o phureder drom tele, un mukenn len ap i djungele dromma te djal.

¹⁶Doleske well lengro them har i mulo them, kai le daar lenna. Un kolenge, kai dikenn kowa, atchell o rakepen krik. Un jon denn i wasta pral o shero khetne.

¹⁷Me mukau wawar menshen pral mire menshende te well, kai tradenn len krik har i sorelo ducho, kai well kotar, kai o kham pre djala. Me kamau lenge o dumo te sikrell, un wau gar ap lengri rig ap ko diwes, kai well i bibacht pral lende.

¹⁸Koi hi menshe, kai penenn: Awenn, te rakras koi pral, hawo tchilatchepen mer nai krah ap o Jeremia. Men hi doha rashaja, kai nai sikrenn men maro drom, un doha gosewe, kai nai penenn menge, hoi te kras, un doha Debleskre rakepangre, kai nai penenn menge o Debleskre laba. Mer tapras les leskre labentsa, un das tchi ap leskro rakepen!

¹⁹Baro Dewel, de garda ap mande, un shun, hoi kolla rakrenna, kai ap mande tchingrenna!

²⁰Jon lurenn koi pre, te taprenn le man. Hi kowa mishto, te krenn le mange tchilatchepen, ninna te krom lenge latchepen? Ma biste, har me glan tute tardo homs, te rakrap lenge mishto, te less tiri choli lendar krik!

²¹Kanna muk lengre tchawen merell i bokatar, un muk len mulo dino te well o chareha, te atchenn lengre djuwjenge kek tchawe un romma, te wenn lengre mursha tapedo o merepastar, un lengre terne mursha an o kurepen maredo.

²²Bitche lurden, kai wenn ap jek kopo pral lende un lengre khera, te denn le gole i trashatar! Jon lurenn koi pre te taprenn le man, un tchiwan dorja, te taprenn mire herja koi dren.

²³Tu baro Dewel, djineh, hoi len mantsa glan hi, kai kamenn le man mulo te dell. Ma biste lenge lengro tchilatchepen! Ma le lengri doosh lendar krik! Muk len glan tute khetne te phagell, te well tiri choli pral lende!