Read O Debleskro Drom - I Bibla an o Romano Rakepen 2021 Jeremia 19 Bible Online

Jeremia 19 - O Debleskro Drom - I Bibla an o Romano Rakepen 2021 bible

Jeremia 19

¹O baro Dewel penell: Dja pash ko mursheste, kai krell pirja, un gin tuke i khoro! Un le tuha pralstunen un phureder rashajen.

²Un dja win an koi tala Ben-Hinnom, kai glan ko foreskro wudar hi, kai i paash-dine pirja tchiddo hi. Un pen i menshenge kol laba, hoi me tuke penau.

³Un pen: Shunenn o baro Debleskro lab, tumer bare raja pral o them Juda un menshe an Jerusalem. Jaake penell o baro Dewel, ko rai pral o bolepen un i phub, kai o Israeleskro Dewel hi: Shunenn, me kamau bari bibacht pral kau foro te anell, kai hakeno, kai shunell kowa, leskre kanda dukenna.

⁴Mire menshe mukan man un kran kau kotar them pale-tchiddo, har chatchran le sungepaskro koowa wawar deblenge, kolen prindjrenn jon gar un witar gar lengre phure. Ninna kol bare raja pral o them Juda prindjran len gar. An kau foro maran le menshen, kai kek tchilatchepen kran.

⁵Un ko chocheno debleske, hoi kharell Baal, kran le chatchepaskre platse, te chatchrenn le pengre tchawen leske. Kowa penom me lenge gar. Sawo koowa was kek tsiro an miro shero, te penoms ap lende: ‘Krenn kowa.’

⁶Doleske well i tsiro, kai penenn jon ap kai platsa gar buder ‘Tofet’ un ‘tala Hinnom’. Jon penenn koi pre ‘marepaskri platsa’.

⁷Hoi kol menshe an o them Juda un an Jerusalem penge glan lenn, mukau me gar te well. Me mukau kolen pral lende te well, kai kamenn len te marell, un krau, te wenn le mulo dino o chareha. Un kol mulen dau i tchirklende un i diwje viechende chapaske.

⁸Me kamau sawi bari bibacht pral kau foro te anell, kai hakeneske, kai dikell kowa, o rakepen krik atchella un job pral leste sala.

⁹Kol lurde, kai kamenn len te marell, tchiwenn pen trul o foro un pandenn les dren. Koi well sawo tchilatcho tsiro, kai kol menshe an ko foro jek i wawares pre chan, ninna pengre tchawen chan jon pre.

¹⁰Tu dess ko khoro paash glan kol murshengre jaka, kai tuha djan.

¹¹Pen ap lende: Kowa penell o baro Dewel, ko rai pral o bolepen un i phub: Me dau paash kal menshen un kau foro, har deh sorjah i khoro jaake paash, kai nai kreh kowa gar buder tselo. Un i menshe paskrenn i mulen ap i platsa Tofet, — kek wawar platsa hi lenge koi.

¹²Jaake krau me kau foreha un kol menshentsa, kai djiwenn koi, te well kau foro har koi platsa Tofet. Kowa penell o baro Dewel

¹³Un kol khera an Jerusalem un kol khera kol bare rajendar an o them Juda, kolla wenn ninna pale-tchiddo har koi platsa Tofet, — i tsele khera, kai jon pral pre i tsele bolepangre momelenge sungepaskro koowa chatchran un i wawar chochene deblenge mool win tchoran.

¹⁴Un o Jeremia djas pale dran Tofet, kai bitchras les o baro Dewel koi, te penell job o Debleskre laba. Un djas ap koi glanstuni platsa glan o baro Debleskro kheer, un penas ap i tsele menshende:

¹⁵O baro Dewel, o rai pral o bolepen un i phub, kai o Israeleskro Dewel hi, penell: I menshe an Jerusalem un an i gaba un forja trujel pandan pengre djia, un kamenn mire laba gar te shunell. Doleske anau pral lende koi tseli bibacht, hoi lenge glan-wi penom.