Read O Debleskro Drom - I Bibla an o Romano Rakepen 2021 Jeremia 23 Bible Online

Jeremia 23 - O Debleskro Drom - I Bibla an o Romano Rakepen 2021 bible

Jeremia 23

¹Bibacht ap tumende, tumer pralstune, kai hunte wans har bakrengre mire menshenge, un mukenn len nashedo te djal, un rikrenn len gar khetne.

²Doleske penell o baro Dewel, ko Dewel pral o Israel, ap i pralstunende, kai hunte dans garda ap leskre menshende: Tumer rikran mire menshen gar khetne. Jon hi har bakre, kai wan kate te kote tradedo. Tumer dan gar garda ap lende. Kanna dau me garda, te lenn tumer tumari phagi ko tchilatchepaske, hoi kran.

³Un me lau khetne kolen, kai djido atchan mire menshendar dran i tsele themma, kai tradom len. Me anau len pale khere. Kote djal lenge mishto, un jon wenn pale bud menshe.

⁴Un me dau pralstunen pral lende, kai hi har latche bakrengre: Jon denn garda ap lende, te hunte darenn un trashenn le buder gar. Kek bakro djal buder nashedo. Kowa penell o baro Dewel.

⁵Ko diwes wella, penell o baro Dewel, kai mukau dran o Davideskri familja i mursh bares te well. Kowa hi an o tchatchepen tardo. Job well i latcho baro rai, un rikrell pes ap o Debleskro tchatchepen, un krell hoi mishto un tchatcho hi an o them.

⁶An leskro tsiro well o Juda win lino dran i tchilatche wasta, un o Israel nai djiwell kek darjah. Un i menshe denn les o lab ‘o baro Dewel krell men tchatcho.’

⁷O diwes well, penell o baro Dewel, kai well gar buder sowel dino kal labentsa: … pash o djido Debleste, kai las i Israelitarjen win dran o them Egiptia.

⁸Na-a, jon penenna: … pash o djido Debleste, kai las i Israelitarjen win dran ko them, hoi kote tchiddo hi, kai norden hi, ninna dran kol tsele wawar themma, kai job len tradas. Palle djiwenn jon pale an pengro them.

⁹Kowa penas o Jeremia ap kol rakepangre, kai hunte rakrans o Debleskre laba, un krenn kowa gar: Miro dji kamell te phagell an mande. Mire tsele kokale trissenn. O baro Dewel rakras mantsa. Un leskre laba, hoi lo penas, kran, te nai rikrau man buder gar ap i herja. Me wom har mato har jek kai hi mato i moljatar.

¹⁰O tselo them hi pherdo kolentsa, kai mukan o baro Debles. Doleske hi i praassepen ap o them tchiddo: Kek brishin dell, un o senlepen merell tele. Tchi har tchilatchepen hi an lengro shero, un an o chochepen hi le sorelo.

¹¹O baro Dewel penell: Mire rakepangre shunenn gar ap mande, witar gar mire rashaja. Lengro tchilatcho koowa hatsau ninna an miro kheer.

¹²Doleske well ko drom, kai le djan har i sapeno drom an o tamlepen, kai wenn le tradedo un perenn. Me mukau bibacht pral lende te well an ko tsiro, kai dau len i phagi. Kowa penell o baro Dewel.

¹³Kowa, hoi dikom pash mire rakepangre an Samaria, hi i djungelo koowa mange. Jon penan laba glan-wi, kolendar penan le, kai wan le o deblestar Baal. Un jaake anan le mire menshen Israel o tchatcho dromestar tele.

¹⁴Ko djungelo koowa, hoi dikau pash mire rakepangre an Jerusalem, hi gomme bareder: I mursha chochenn pengre romjen, un i djuwja pengre romen; jon rakrenn chochepen, un krenn i tchilatchen sorelo. Jaake rikrenn le i menshen pale, te mukenn le pengro tchilatcho drom. Kal rakepangre hi jaake tchilatcho har i menshe an Sodom un Gomorra his.

¹⁵Doleske penell o baro Dewel, ko rai pral o bolepen un i phub, pral lende: Kol rakepangre an Jerusalem kran, te kamenn i menshe an o tselo them tchi buder mandar te djinell. Doleske dau me kal rakepangren chapen te chal un pani te pijell, hoi krell len nasselo.

¹⁶Kowa penell o baro Dewel, ko rai pral o bolepen un i phub: Ma shunenn ap i laba, hoi kol rakepangre penenn! Jon chochenn tumen, un rakrenn pral dikepen, hoi well dran lengre djia un gar o baro Deblestar.

¹⁷Kolenge, kai san pral o baro Debleskro lab, penenn le: ‘Tumenge djal mishto an ko tsiro, hoi wella!’ Un kolenge, kai djan pal pengro shero, penenn le: ‘Kek bibacht well pral tumende.’

¹⁸Kek kal murshendar his tardo glan o baro Debleste un dikas un shunas, hoi lo penas. Kek lendar das jak ap leskre laba un haiwas len.

¹⁹Shunenn: O baro Debleskri choli well jaake pral tumende, har i baro ducho pral i phub phurdell. I sorelo phurdepen djal tele ap i sherja i tchilatchendar.

²⁰O baro Debleskri choli mukell gar tele, bis te kras lo, hoi les glan his. I tsiro well, kai haiwenn tumer kowa.

²¹[O baro Dewel penell:] Ninna te bitchrom me kal rakepangren gar, nashenn le pash tumende. Ninna te rakrom gar lentsa, penenn le laba glan-wi.

²²Te wans jon glan mande tardo an miro tsillo, rakrans jon mire laba mire menshenge, un penans lenge, te mukenn le pengro tchilatcho drom un pengro tchilatcho koowa, hoi kran le.

²³Me hom i Dewel, kai ap i tseli phub hi, un gar ap jek platsa.

²⁴Kek nai khatrell pes jaake tchorchanes, te dikau les gar, penell o baro Dewel. Kek platsa hi an o bolepen un ap i phub, kai me gar hom. penell o baro Dewel.

²⁵Me shunom mishto, hoi kal rakepangre rakrenn, har penenn jon chochepen glan-wi un penenn: ‘Kowa well o baro Deblestar. Me dom les suni. An i suni penas o Dewel kowa mange.’

²⁶Har rah kamenn le sawo koowa te krell? Har rah penenn kal rakepangre chochepen glan-wi, hoi well dran lengro dji un gar mandar?

²⁷Jek penell o wawareske peskri suni. Un koleha krenn le, te bistrenn man mire menshe jaake, har bistran man lengre phure, har mangan le o debles Baal an.

²⁸Te dell i rakepaskro suni, mu penell lo peskri suni! Kowa, kai lell i lab mandar, kowa te penell ko lab mishto dureder! Me, o baro Dewel penau tumenge: O phuss un o djob hi gar o emligo koowa. Jaake hi witar gar emligo ko rakepen, hoi kol chochene rakepangre rakrenna, un o rakepen, hoi mandar wella.

²⁹Miro rakepen hi har i jag, un har i depaskro saster, hoi barra phagell.

³⁰Doleske, penell o baro Dewel, djau me ap kol rakepangre pre, kai tchorenn i lab jek o wawarestar, un penenn: Kowa well o baro Deblestar.

³¹Awa, me djau ap kolende pre, kai rakrenn, hoi dran lende well, un penenn: ‘Kowa penas o baro Dewel.’

³²Me kurau man kolentsa, kai chochene sunja rakrenna, un anenn mire menshen o tchatcho dromestar tele lengro chochepah un dinelo rakepah. Me bitchrom len gar, un dom len kek lab, te penenn le kowa dureder. Jon molenn tchi mire menshenge, penell o baro Dewel.

³³O baro Dewel penas ap o Jeremia: Te putchell tutar jek mire menshendar, i rakepaskro oder i rashai: Hoi penas o baro Dewel tuke, hoi phares ap tute tchiddo hi? Palle peness: Tumer han phares ap mande tchiddo. Kamau te witsrap tumen krik mandar, penell o baro Dewel.

³⁴Te penell i chocheno rakepaskro, i rashai oder i wawar: ‘Man hi i lab o baro Deblestar, hoi hi phares ap mande tchiddo’, palle dau me i phagi koleste un leskri familjate.

³⁵Kowa hi, hoi hunte putchenn tumer jek o wawarestar: Hoi penas o baro Dewel, har rakral leha? Hawo lab hi les menge?

³⁶Ma penenn buder: ‘Man hi i lab o baro Deblestar, hoi phares ap mande tchiddo hi.’ Kowa, hoi hi phares tchiddo ap i mensheste, well i menshendar un gar o baro Deblestar. Ma krenn sawo koowa i labentsa o djido Deblestar! Job hi o rai pral o bolepen un i phub, un maro Dewel.

³⁷Putchenn kolestar, kai penell, te hi lo i Debleskro rakepaskro: Hoi penas o baro Dewel tuke, har rakral leha? Hawo lab hi les menge?

³⁸Te shunenn tumer gar ap mande un kharenn sawo lab i pharo koowa, hoi o baro Dewel ap tumende tchiwas,

³⁹palle djinenn, me hadau tumen pre har i pharo koowa, un witsrau tumen krik mandar, tumen un tumaro foro, hoi dom tumende un tumare phurende.

⁴⁰Un me anau ladj un praassepen ap tumende, hoi atchell hako tsiro ap tumende, un well gar bistedo.