Read O Debleskro Drom - I Bibla an o Romano Rakepen 2021 Jeremia 24 Bible Online

Jeremia 24 - O Debleskro Drom - I Bibla an o Romano Rakepen 2021 bible

Jeremia 24

¹His an ko tsiro, kai anas o Nebukadnezar, ko baro rai dran o them Babilonia, o baro rajes pral Juda, o Jekonja, koleskro dad o Jojakim his, pandles dran Jerusalem an o them Babilonia. Khetne leha anas lo i pralstunen pral Juda krik, ninna kolen, kai haiwan o kashteha un o sasteha te budrell. An ko tsiro sikras man o Dewel dui korbe, kai faige dren his, tardo glan o baro Debleskro kheer.

²An koi jek korba his latche un shukar faige har kol newe faige an i bersh. An koi wawar korba his djungele faige, jaake djungele te nai chal len kek.

³Un o baro Dewel putchas mandar: “Jeremia, hoi dikeh?” Me penom: “Dikau faige: latche faige, hoi hi baro un shukar, ninna djungele faige, hoi hi jaake djungele, kai nai chal len kek.”

⁴Koi penas o baro Dewel ap mande:

⁵Kowa penell o baro Dewel, ko Dewel pral o Israel: Kol menshe dran o them Juda, kolen tradom kate krik an ko them, kai i Kaldearja djiwenn, jon hi har i latche faige.

⁶Ap lende dikau latches, un anau len pale pale an kau them. Un mukau len pale bares te well, un krau len gar paash, krau len pale soreles, un tradau len buder gar dran lengro them win.

⁷Me dau len djia, kai prindjrenn man, te djinenn le, me hom o baro Dewel. Jon te wenn mire menshe, un me hom lengro Dewel; pengro tselo djijestar wenn le pale pash mande.

⁸O baro rai Zedekja dran o them Juda un kol pralstune, kai leske budrenn, un kol tsele menshe, kai pral atchan an o foro Jerusalem un an o them Juda, ninna kolla, kai nashan penge an o them Egiptia, kolentsa lauterentsa krau me jaake har kol djungele faigentsa, hoi jaake djungele hi, te nai chal len kek. Kowa penau me, o baro Dewel.

⁹Me anau sawi bibacht pral lende, te atchell i menshenge an i tsele themma ap kai phub o rakepen krik. Kote, kai len tradau, wenn le sapaske un praassepaske. Te kamell jek o wawares te praassell, penell lo: Tuke te djal har kol menshenge dran Jerusalem un Juda!

¹⁰Me anau kurepen, bok un nasslepen mank lende, bis te kek lendar pral atchas an kau them, hoi dom len un lengre phurende.