Read O Debleskro Drom - I Bibla an o Romano Rakepen 2021 Jeremia 27 Bible Online

Jeremia 27 - O Debleskro Drom - I Bibla an o Romano Rakepen 2021 bible

Jeremia 27

¹Kawa hi ko lab, hoi penas o baro Dewel ap o Jeremia. Kowa his i tikno tsiro palla, kai was o Zedekja, koleskro dad o Josia his, o baro rai pral o them Juda.

²O baro Dewel penas ap mande: Kre tuke i kasht un tchip les ledertikre dorjentsa trul tiri meen, har i kasht trul i grumjakri meen tchiddo well!

³Man hi i lab kol bare rajenge pral i themma Edom, Moab, Ammon, Tirus un Sidon. Lengre bitchepangre hi an Jerusalem pash o baro rajeste Zedekja. Muk lenge te penell,

⁴te penenn le lengre rajenge kau lab: Kowa hi, hoi penell o baro Dewel, ko rai pral o bolepen un i phub, koles o Israel an-mangell:

⁵Miri bari sorjah krom kai phub un i menshen un viechen, kai ap i phub hi. Un me dau len, koneste kamau.

⁶Me dom kal tsele themma an i wasta o baro rajestar, o Nebukadnezar dran o them Babilonia. Job krell, hoi kamau, te krell lo. Ninna i diwje viechen dom les, te well lo rai pral lende.

⁷I menshe dran i tsele themma hunte budrenn leske un leskro tchaweske, un koleskro tchaweske, bis te well ko tsiro, kai nashrell ninna leskro them peskri soor. Un menshe dran wawar bare themma un lengre sorele bare raja wenn i raja pral lende.

⁸Kanna penau tumenge, te hunte krenn tumer, hoi kamell o baro rai dran Babilonia tumendar, jaake har hunte krell i gurum[8], koles i kasht trul leskri meen hi, kowa, hoi leskro rai kamell. Hako them peskre menshentsa, hoi kamell kowa gar te krell, koles dau i phagi. Leskre menshe hunte merenn an o kurepen, i bokatar un dran nasslepen, bis te mukau o Nebukadnezares ko them dren te lell.

⁹Ma shunenn ap tumare chochene rakepangre un ap i durkepangre, witar gar ap kolende, kai sikrenn, hoi sunja penenn, witar gar ap kolende, kai krenn bengeskro koowa un kai putchenn i mulen. Kolla lauter penenn tumenge, te hunte krenn gar, hoi o baro rai pral Babilonia tumendar kamell.

¹⁰Kal menshe penenn tumenge chochepen. Te patsenn tumer lenge, wenn tumer dran tumaro them krik anlo. Me tradau tumen mandar krik, un tumer merenna.

¹¹Kol menshe an wawar themma, kai mukenn o baro rajes dran Babilonia pengro rai te well, un krenn, hoi job kamell, kolla nai atchenn an pengre themma, un nai budrenn ap pengri phub un djiwenn kote. Kowa penell o baro Dewel.

¹²Un me penom kal tsele laba ap o baro rajeste pral o them Juda, o Zedekja, un penom leske ninna: Te kamenn tumer djido te atchell, krenn, hoi o baro rai dran Babilonia tumendar kamell, un mukenn les un leskre menshen o rai pral tumende te well!

¹³Hoske kamenn tumer te merell, tu un tire menshe, te well o kurepen, i bok un o nasslepen pral tumende, jaake har o baro Dewel penas, te well kowa pral kol menshende, kai kamenn gar te krell, hoi o baro rai dran Babilonia lendar kamell.

¹⁴Ma shunenn ap kol chochene rakepangre, kai tumenge penenn: ‘Tumer hunte mukenn gar o baro rajes dran Babilonia tumaro rai te well.’ Kolla penenn chochepen glan-wi.

¹⁵O baro Dewel penell lendar: Me bitchrom len gar. Jon penenn, te wenn lengre laba mandar. Kowa hi chochepen. Te patsenn tumer lenge, tradau tumen win, un tumer wenn maredo khetne kol chochene rakepangre.

¹⁶Palle penas o Jeremia ap i rashajende un i tsele menshende, kai kote his: Kowa hi, hoi o baro Dewel penell: Ma patsenn kol rakepangre, kai penenn tumenge: Ko kutch koowa dran o baro Debleskro kheer, hoi was anlo an o them Babilonia, kowa well sik pale pale anlo. Kowa, hoi jon glan-wi penenn, hi chochepen.

¹⁷Ma denn garda ap lengre laba! Mukenn o baro rajes dran Babilonia tumaro rai te well! Palle atchenn djido! Hoske te well kau foro i mulo foro?

¹⁸Te hi le tchatchepah Debleskre rakepangre, kolengre laba o baro Deblestar wenna, palle hunte mangenn le lestar, ko rajestar pral o bolepen un i phub, te mukell lo gar ko kutch koowa, hoi gomme kate hi, an o them Babilonia te anell — ko kutch koowa, hoi hi kanna an leskro kheer, un an o kheer o baro rajestar pral o them Juda, un an o foro Jerusalem.

¹⁹Kowa hi, hoi penell o baro Dewel, ko rai pral o bolepen un i phub, pral ko koowa, hoi pral atchas an o foro Jerusalem: kol bare turme un ko baro thopaskro tcharo, un kol panjeskre wurdja, un ko wawar kutch koowa an o Debleskro kheer,

²⁰hoi o baro rai dran Babilonia, o Nebukadnezar, gar peha las, har anas lo o baro rajes pral o them Juda, o Jekonja, koleskro dad o Jojakim his, an o them Babilonia, khetne kol pralstunentsa dran o them Juda un dran o foro Jerusalem.

²¹Kowa hi, hoi penas o baro Dewel, ko rai pral o bolepen un i phub, kai ninna o Israeleskro Dewel hi, pral ko kutch koowa, hoi pral atchas an leskro kheer, un an o kheer o baro rajestar pral Juda, un an o foro Jerusalem:

²²Kowa lauter well krik anlo an o them Babilonia, un atchell kote, bis ap ko diwes, kai me pal kowa dikau, un mukau les pale pale kate te anell. Kowa penell o baro Dewel.