Read O Debleskro Drom - I Bibla an o Romano Rakepen 2021 Jeremia 29 Bible Online

Jeremia 29 - O Debleskro Drom - I Bibla an o Romano Rakepen 2021 bible

Jeremia 29

¹O Debleskro rakepaskro, o Jeremia, tchinas i liil ap i phurende, kai pral atchan kolendar, kai pandles krik anlo wan, un ap i rashajende un o Debleskre rakepangre un ap i tsele menshende, kolen o Nebukadnezar an Jerusalem pandles las un an o them Babilonia anas.

²Job tchinas kau liil pal kowa, kai o baro rai Jekonja un leskri dai krik anlo wan khetne kol pralstunentsa dran o baro rajeskro kheer un i pralstunentsa dran o them Juda un dran o foro Jerusalem. Ninna kol budepangre an Jerusalem, kai haiwenn mishto te budrell o kashteha un o sasteha wan lentsa krik anlo.

³O Jeremia das peskro liil kol dui murshenge peha, o Elasa, koleskro dad o Shafan his, un o Gemarja, koleskro dad o Hilkija his. Kolen bitchras o baro rai pral Juda, o Zedekja, an o them Babilonia pash o baro rajeste pral Babilonia, o Nebukadnezar. An ko liil his tardo:

⁴O baro Dewel, ko rai pral o bolepen un i phub, kai o Israeleskro Dewel hi, penell ap i pandlende, kolen mukas job an Jerusalem pandles te lell un an o them Babilonia te anell:

⁵Krenn tumenge khera, un djiwenn koi dren! Tchiwenn ruka un senlepen an i phub, un chan hoi kote bares well!

⁶Romedinerenn un lenn tchawen! Lenn romjen tumare mursh tchawenge, un rodenn tumare tchenge murshen, te romedinerenn le, un anenn tchawen un tchen ap i phub! Awenn bud un gar tikneder!

⁷Rodenn koi pal, te djal mishto o foreske, kai mukom tumen te anell. Un mangenn ko foreske mandar latchepen! Te djal o foreske mishto, djal tumenge ninna mishto.

⁸O baro Dewel, ko rai pral o bolepen un i phub, kai o Israeleskro Dewel hi, kowa penell: Ma mukenn tumen te chochell kolendar, kai penenn glan-wi, hoi wella: kol rakepangre, kai pash tumende hi, un kol durkepangre. Ma shunenn ap lengre sunja!

⁹Jon rakrenn chochepen an miro lab. Me bitchrom len gar, penell o baro Dewel.

¹⁰Kowa penell o baro Dewel: Ap ko tsiro, kai hi i Babilonarja efta-deesh bersha i raja pral tumende, dikau me pale ap tumende, te rikrap miro latcho lab un anau tumen pale khere.

¹¹Djinau mishto, hoi man tumenge an o shero hi: latcho koowa un gar tchilatcho koowa, te djal tumenge jaake har tumer kamenna.

¹²Te denn tumer man an-gole un wenn un mangenn mandar, palle shunau me ap tumende.

¹³Tumer rodenn man un hatsenn man. Te rodenn man tumaro tselo djijeha,

¹⁴palle mukau man tumendar te hatsell, penell o baro Dewel. Un me lau tumen dran tumaro pandepen win, un anau tumen khetne dran i tsele menshende un themma, kai tradom tumen, penell o baro Dewel. Un me anau tumen pale an kau them, kai mukom tumen krik te anell.

¹⁵Tumer penenn, kai o baro Dewel das tumen peskre rakepangre ninna an o them Babilonia. —

¹⁶Shunenn, hoi o baro Dewel penell pral o baro rajeste, kai ap o Davideskri beshepaskri beshdo hi, un pral kol menshende an kau foro, kolla kai tumare phrala hi, kai wan gar tumentsa pandles krik anlo.

¹⁷O baro Dewel, ko rai pral o bolepen un i phub penell: Me bitchrau kurepen, bok un nasslepen mank lende, un krau lentsa, har te wans le djungele faige, hoi nai chal kek.

¹⁸O kurepen, i bok un o nasslepen lenn len palla. Un i menshe dran i tsele themma ap kai phub denn i wasta khetne pral o shero, te dikenn le len. An hako them, kai tradau len, dikenn le ap lende har ap praassede menshende, kolendar darenn le. Un jon denn shol[9] pral lende un praassenn len.

¹⁹Kowa well pral lende doleske, kai shunan le gar ap kol laba, hoi mire rakepangre lenge pale te pale penan. Jon kaman gar te shunell, penell o baro Dewel.

²⁰Kanna shunenn, tumer lauter dran o foro Jerusalem, kai pandles krik anlo han an o them Babilonia! Shunenn, hoi mukell o baro Dewel tumenge te penell:

²¹Kowa penell o baro Dewel, ko rai pral o bolepen un i phub, kai o Israeleskro Dewel hi: O Ahab, koleskro dad o Kolaja his, un o Zidkija, koleskro dad o Maaseja his, kolla dui rakran chochepen ap tumende an miro lab. Doleske dau len an i wasta o baro rajestar Nebukadnezar dran Babilonia. Kowa mukell len mulo te dell glan tumare jaka.

²²I tsiro well, kai penenn i menshe dran o them Juda, kai krik anlo wan an Babilonia, te kamenn jon jekes te praassell: Mu krell o baro Dewel tuha, har kras lo ap o Zidkija un ap o Ahab, kolen mukas o baro rai dran Babilonia djides te chatchrell.

²³Koi phagi was ap lende doleske, kai kran le i wi-ladjedo koowa an Israel, un lan penge romjen, kai romedino hi, un penan an miro lab tchomone glan-wi, hoi chochepen his, hoi me lenge gar an o mui tchiwom. Me djinau, hoi le kran, me dikom les, penell o baro Dewel.

²⁴Un ap o Shemaja dran o foro Nehelam hunte peness:

²⁵Kowa penell o baro Dewel, ko rai pral o bolepen un i phub, kai o Israeleskro Dewel hi: Tu bitchral an tiro lab lila ap i Israelitarja an o foro Jerusalem, un kek penas tuke, te kress kowa. Kal lila bitchral ap o rashajeste Zefanja, koleskro dad o Maaseja his, un ap i tsele wawar rashajende. An kal lila penal o rashajeske Zefanja:

²⁶O baro Dewel rodas tut win, te wess o rashai pal o rashajeste Jojada. Tu wess o pralstuno an o baro Debleskro kheer, te tchiwess kol tsele narwelen pandles, kai wenna un penenn, te hi le Debleskre rakepangre, un penenn tchomone glan-wi. Tu tchiwess lengre pire an kashta un sasterne shelle trul lengri meen.

²⁷Kanna, de koi phagi o Jeremijeste dran Anatot, kai pash tumende glan-wi penell, hoi wella.

²⁸Job bitchras menge i liil an o them Babilonia, un mukas menge te penell: Tumer hunte atchenn i rah tsiro koi. Krenn tumenge khera un djiwenn koi dren! Tchiwenn ruka un senlepen an i phub, un chan, hoi ap lende bares wella.

²⁹Ko liil, hoi o Shemaja tchinas, draweras o rashai Zefanja glan o Debleskro rakepaskro, o Jeremia.

³⁰Koi pal penas o baro Dewel ap o Jeremia:

³¹Bitche i liil ap i tsele Israelitarjen, kai wan anlo an o them Babilonia, un muk lenge te penell: Kowa penell o baro Dewel pral o Shemaja dran o foro Nehelam: O Shemaja das glan, te hi lo miro rakepaskro, un me bitchrom les gar. Job kras, te patsan tumer leskro chochepen.

³²Doleske dau me, o baro Dewel, leste un leskri familjate i phagi. Kek lendar atchell djido mank kal menshende. Un job dikell gar ko latchepen, hoi krau ap mire menshende. Peskro rakepah anas job mire menshen mandar krik. Kowa penell o baro Dewel.