Read O Debleskro Drom - I Bibla an o Romano Rakepen 2021 Jeremia 34 Bible Online

Jeremia 34 - O Debleskro Drom - I Bibla an o Romano Rakepen 2021 bible

Jeremia 34

¹Kawa hi ko lab, hoi o baro Dewel ap o Jeremia penas, an ko tsiro har o Nebukadnezar, ko rai dran o them Babilonia, peskre tsele lurdentsa trul o foro Jerusalem tardo his. Ninna trul i wawar forja an o them Juda his le tardo. Un gar kokres dran o them Babilonia his le, na-a ninna dran kol tsele wawar themma, pral kolende o Nebukadnezar o rai his.

²Koi penas o baro Dewel, kai o Israeleskro Dewel hi, ap o Jeremia: Dja pash o Zedekja, ko rajeste pral o them Juda, un pen leske: Kowa penell o baro Dewel: Me dau kau foro an o wast o baro rajestar dran o them Babilonia, un job chatchrell les tele.

³Un ninna tu nai nasheh gar glan leskro wast krik. Na-a tu weh tapedo un an leskro wast dino. Tu dikeh les tire jakentsa un rakreh leha mui ap mui. Un palle weh an o them Babilonia anlo.

⁴Zedekja, tu kai hal rai pral o them Juda, shun ap o baro Debleskro lab! Kawa penell o baro Dewel pral tute: Tu te meress gar o chareha,

⁵na-a, tu mereh an o latchepen. Un jaake har kran i menshe tire phurenge, kai glan tute bare raja his, jaake krenn le ninna tuke: Jon krenn i jag un chatchrenn sungepaskro koowa, te sharenn le tut. Un denn gole o ropah: “Maro rai meras!” Me, o baro Dewel, penau kowa.

⁶Un o Debleskro rakepaskro, o Jeremia, penas kol tsele laba ap o Zedekja, ko rajeste pral o them Juda, an o foro Jerusalem.

⁷An ko tsiro his i lurde o rajestar dran o them Babilonia tardo trul o foro Jerusalem un trul i forja Lakish un Aseka; kokres kal forja Lakish un Aseka his gomme gar dren lino kol tsele sorele forjendar an o them Juda.

⁸Kawa hi ko lab, hoi o baro Dewel ap o Jeremia penas, pal ko tsiro, kai o baro rai Zedekja i menshentsa an o foro Jerusalem win kras, te mukenn le i tsele ginle budepangre win,

⁹kolla, kai Hebrearja hi, mursha un djuwja, jaake te hunte budrell kek jekeske peskre menshendar.

¹⁰Un i pralstune un i tsele wawar menshe, kai penan ‘awa’ ap kowa, kran ninna jaake, un mukan pengre budepangren te djal.

¹¹I tsiro koi pal, kaman le pengre budepangren pale pale, kolen kai mukan jon te djal. Un jon lan len sorjah pale pale, te wenn le pale budepangre pash lende.

¹²Kote penas o baro Dewel ap o Jeremia:

¹³Kawa penell o baro Dewel, kai o Israeleskro Dewel hi: Me krom tumare phurentsa win, har anom len dran o them Egiptia win, kai jon pandle budepangre his,

¹⁴te mukell hakeno peskro ginlo budepaskres te djal, kowa, kai i wawar Israelitari hi, un kai bikras pes leske, un budras leske shob bersha. An o eftato bersh hunte mukas lo les te djal. Tumare phure shunan gar ap mande, un rikran pen gar ap mire laba.

¹⁵Tumer wan pale ap miro drom, un kran, hoi glan mire jaka mishto hi, un mukan win gole te dell, te wenn kol budepangre win muklo, kai hi Israelitarja. Un tumer dan tumen sowel, glan mande an ko kheer, kai mange kerdo was, te krenn kowa jaake.

¹⁶Un kanna rikran gar, hoi tumen sowel dan, un kran, har te wals miro lab tchi moldo! Hakeno tumendar kamell kol murshen un djuwjen pale, kai leskre budepangre his, un kolen job mukas te djal, te nai djan le penge kote, kai le kaman. Kanna lell lo len sorjah pale pale, te wenn le pale leskre pandle budepangre.

¹⁷Doleske penell o baro Dewel: Tumer shunan gar ap mande un mukan tumare phralen un phenjen gar win te djal, kai ninna Israelitarja hi har tumer, doleske mukau me, o baro Dewel tumen te djal, te wenn maredo o chareha, merenn ap o djungelo nasslepen un i bokatar. Te dikenn i menshe an tsele themma ap i phub, hoi tumentsa djal, denn le i wasta pral o shero khetne.

¹⁸Kol pralstune pral o them Juda un pral Jerusalem un pral o rajeskro kheer, ninna i rashaja un kol tsele wawar, jon his koi pashel, har o terno gurum an dui kotja tchinlo was. Un jon djan mashkral kol dui kotja wergel, te sikrenn le, te kamenn le kowa te rikrell, hoi lentsa win krom. Un jon rikran pen gar ap kowa, un rikran kol laba gar dren, hoi jon pen glan mande sowel dan. Doleske kamau ap lende jaake te krell, har ap ko terno gurum kerdo was.

²⁰Un me dau len an i wasta kolendar, kai kamenn len te marell, un lenge ap o djipen djan. Un lengro mulo mass well o chapen i tchirklenge un i diwje viechenge.

²¹Ninna o Zedekja, ko rai pral o them Juda, un leskre pralstune, kolen dau an i wasta kolendar, kai kamenn len te marell. Kol lurde o baro rajestar dran Babilonia, kai tumendar krik djan, an kolengre wasta dau len.

²²Awa, me kharau len pale kai, un anau len pale glan kau foro, penell o baro Dewel. Jon wenn trul kau foro tardo, un lenn kau fores penge dren, un chatchrenn les tele. Un kol forja an o them Juda mukau jaake khetne te dell, te wenn le har i mulo them, kai nai djiwell buder kek dren.