Read O Debleskro Drom - I Bibla an o Romano Rakepen 2021 Jeremia 35 Bible Online

Jeremia 35 - O Debleskro Drom - I Bibla an o Romano Rakepen 2021 bible

Jeremia 35

¹An ko tsiro, har o Jojakim, koleskro dad o Josia his, o baro rai pral o them Juda his, penas o baro Dewel ap o Jeremia:

²Dja pash i murshende dran o kheer Rechab, rake lentsa un an len an o baro Debleskro kheer. Dja kote lentsa an jek bari isema dren, un de len mool te pijell.

³Koi djom me, o Jeremia, pash o Jaasanja, koleskro dad o Jirmeja his, koleskro dad o Habazzinja his, un lom les khetne leskre phralentsa un leskre tsele tchawen, un halauteren dran i familja Rechab,

⁴un anom len an o baro Debleskro kheer, an koi bari isema i tchawendar o Debleskro murshestar, o Hanan, koleskro dad o Jigdalja his. Koi bari isema hi langs koi isema o pralstunendar un pral koi isema o Maasejestar, koleskro dad o Shallum hi. O Maaseja his kowa, kai das garda ap o wudar.

⁵Un me tchiwom glan kol murshende dran o kheer Rechab khore pherdi mool, ninna tchare, te nai pijenn le, un penom: Pijenn mool!

⁶Jon penan: Mer pijah kek mool; maro dad, o Jonadab, koleskro dad o Rechab his, penas menge soreles: Tumer un tumare tchawe kai pal tumende wenna, hunte pijenn an kek tsiro mool,

⁷witar gar tchiwenn tumenge khera pre, tchiwenn kek djob an i phub, witar gar drakengre ruka. Tumen hunte well kek drakengro them. An plachtene khera hunte djiwenn tumer tumaro tselo djipen, te djiwenn i lengsto djipen an kau them, an koleste tumer trujel djan.

⁸Jaake shunam ap o rakepen maro dadestar Jonadab an halauter, hoi job menge penas, te pijas kek mool maro tselo djipen, mer gar, mare romja witar gar, un mare tchawe un tcha witar gar.

⁹Un mer tchiwah kek khera pre, te djiwas kote dren. Un men hi witar kek drakengro them, un kek hachetikri phub, un kek djob.

¹⁰Mer djiwah an plachtene khera un krah halauter jaake, har maro dad o Jonadab menge penas.

¹¹Un har o Nebukadnezar, ko rai pral o them Babilonia, an o them Juda was, te kurell lo pes leha, penam menge mer halauter: Awenn, te nashas menge glan kol lurdende dran o them Babilonia un dran o them Syria, un djah an o foro Jerusalem! Jaake atcham kate an Jerusalem.

¹²Koi penas o baro Dewel ap o Jeremia:

¹³Kawa penell o baro Dewel, ko rai pral o bolepen un i phub, kai o Israeleskro Dewel hi: Dja un rake i menshentsa dran o them Juda un dran o foro Jerusalem: Har rah kamenn tumer gar ap mire laba te shunell, putchell o baro Dewel tumendar.

¹⁴Kol laba, hoi penas o Jonadab, koleskro dad o Rechab his, peskre menshenge, kai pal leste wenna, rikrenn jon dren bis ap kau diwes, un pijenn kek mool, jaake har lengro dad lenge penas. Me mukom tumenge pale te pale mire laba te penell, un tumer shunenn gar, hoi me penau.

¹⁵Me bitchrom tumenge pale te pale mire rakepangre, kai mange budrenn, un mukom tumenge te penell: Djan tele, hakeno peskro tchilatcho dromestar! Mukenn tumaro tchilatcho koowa, un nashenn buder gar mule deblenge palla, te mangenn len an! Palle nai atchenn an kau them, hoi me tumenge un tumare phurenge dom. Tumer dan gar jak ap mire laba un shunan gar ap mande.

¹⁶Kolla, kai wenn pal o Jonadab, jon rikran dren, hoi lengro phuro dad lenge penas. Tumer, i menshe dran Juda, shunenn gar ap mande!

¹⁷Doleske penell o baro Dewel, ko rai pral o bolepen un i phub, kai o Israeleskro Dewel hi: Me rakrom tumentsa, un tumer kaman gar ap mande te shunell. Me dom tumen gole, un tumer rakran gar mantsa. Doleske anau pral o them Juda un pral i tsele menshende an o foro Jerusalem koi tseli bibacht, doleske me len trad dom.

¹⁸I menshenge dran o kheer Rechab penas o Jeremia: Kawa penell o baro Dewel, ko rai pral o bolepen un i phub, kai o Israeleskro Dewel hi: Tumer shunan ap tumaro dadeste Jonadab, un rikran tumen ap leskre tsele laba, un kran halauter jaake, har job tumenge penas,

¹⁹doleske penau tumenge: Hako tsiro hi menshe koi o Jonadabeskre tchawendar, kai mange budrenn. Kowa penell o baro Dewel, ko rai pral o bolepen un i phub, kai o Israeleskro Dewel hi.