Read O Debleskro Drom - I Bibla an o Romano Rakepen 2021 Jeremia 37 Bible Online

Jeremia 37 - O Debleskro Drom - I Bibla an o Romano Rakepen 2021 bible

Jeremia 37

¹O Zedekja, koleskro dad o Josia his, was o baro rai pral o them Juda. Koles tchiwas o baro rai dran Babilonia, o Nebukadnezar, dren, te well lo baro rai pal o Konja. Kowa his o tchawo o Jojakimestar.

²O Zedekja un i pralstune trul leste un kol wawar menshe an o them shunan gar ap i laba, hoi o baro Dewel ap peskro rakepaskro, o Jeremia, penas, te penell lo len lenge dureder.

³Un o baro rai Zedekja bitchras o Juchal, koleskro dad o Shelemja his, ninna o rashajes Zefanja, koleskro dad o Maaseja his, pash o Jeremia un mukas leske te penell: Mange maro baro Debles menge, i Israelitarja!

⁴O Jeremia djas an ko tsiro pash i menshende dren un win, un was gomme gar an o stilepen witsedo.

⁵An ko tsiro djan i lurde o Faraestar dran o them Egiptia win. Har o Babilonarja, kai glan o foro Jerusalem pre tardo his, kowa shunan, tserdan le pen pale dran o foro Jerusalem.

⁶Un kote penas o baro Dewel ap peskro rakepaskro, o Jeremia:

⁷Kowa penell o baro Dewel, kai o Israeleskro Dewel hi: Pen o baro rajeske dran o them Juda, kowa kai bitchras tumen pash mande, te putchenn man: Kol lurde o Faraestar, kai djan win dran pengro them, te wenn le ap tumari rig, kolla djan pale khere an o them Egiptia.

⁸Un i Babilonarja wenn kate pale un rikrenn kau foro an pengro wast, un lenn kau foro penge dren, un chatchrenn kau fores tele.

⁹Doleske penell o baro Dewel: Chochenn tumen gar un penenn tumenge gar: “I Babilonarja wenn gar pale kai.” Jon wenna pale kai.

¹⁰Te nai marans tumer ninna i tsele lurden dran o them Babilonia khetne, kolla kai kurenn pen tumentsa, un te atchans lendar kokres i wast pherdo pral, kai dukedo hi, palle stakrans le dran pengre plachtene khera pre, un chatchrans kau fores tele.

¹¹Har i egiptikre lurde pash Jerusalem wan, mukan i Babilonarja o foro Jerusalem.

¹²Koi kamas o Jeremia dran o foro Jerusalem win te djal an o them Benjamin, te rakrell lo peskre menshentsa pral kowa, hoi jek, kai meras, lenge palla mukas, un hoi hakeno lella.

¹³Har job pash o Benjamineskro Wudar was, his kote i lurdo, kai das garda, koon dren te win nashella. Kowa kharas Jirija, leskro dad his o Shelemja, koleskro dad his o Hananja; o Jirija das garda ap ko wudar, un rikras o Jeremijes peske wastentsa pre, un penas: Tu kameh pash i Babilonarja wergel te nashell.

¹⁴Kote penas o Jeremia: Kowa hi gar tchatcho, me kamau gar pash i Babilonarja wergel te nashell. O Jirija kamas gar ap o Jeremia te shunell, un tapras les un anas les pash i pralstune murshende.

¹⁵I pralstune wan chojedo ap o Jeremia, un mukan les dawa te dell, un witsran les an o stilepen an o kheer o murshestar Jonatan. Kowa his i mursh, kai haiwas lila te tchinell; dran koleskro kheer kran le i stilepen.

¹⁶Jaake was o Jeremia stildo an i isema dur tele an kau kheer. Kote atchas lo bud diwessa.

¹⁷I diwes was, kai mukas o baro rai Zedekja les tchorchanes pash peste te anell, un putchas lestar: Hi tut i lab o baro Deblestar? Un o Jeremia penas: Awa, man hi i lab tuke: Tu weh an o wast o baro rajestar dran o them Babilonia dino.

¹⁸Palle putchas o Jeremia o baro rajestar Zedekja: Hoi krom me tuke un tire pralstunenge, un hawo tchilatchepen krom ap kal menshende kate, kai witsran le man an o stilepen?

¹⁹Kai hi kanna tumare dikepangre, kai penan tumenge glan-wi, te well o baro rai dran o them Babilonia gar pral tumende, un witar gar pral kau tselo them?

²⁰Miro pralstuno un rai, muk miro mangepen glan tute te well! Un shun, hoi tutar mangau! Ma muk man pale te anell an o kheer o Jonatanestar, kowa kai tchinell i lila. Kowa wals miro merepen!

²¹Kote mukas o baro rai Zedekja te penell, te rikrenn le o Jeremia ap koi platsa stildo, kai rikran pen i lurde pre. Un job mukas leske hako diwes i maro te anell, kotar kai o maro peklo was, jaake rah bis te his buder kek maro an o foro. Jaake atchas o Jeremia ap koi platsa stildo.