Read O Debleskro Drom - I Bibla an o Romano Rakepen 2021 Jeremia 38 Bible Online

Jeremia 38 - O Debleskro Drom - I Bibla an o Romano Rakepen 2021 bible

Jeremia 38

¹His pralstune koi, kai shunan, hoi o Jeremia ap i tsele menshende penas. Kolla his o Shefatja, koleskro dad o Mattan his, un o Gedalja, koleskro dad o Pashur his, un o Jukal, koleskro dad o Shelemja his, un o Pashur, koleskro dad o Malkija his. Jon shunan har o Jeremia penas:

²Kowa penell o baro Dewel: Kowa, kai atchell an kau foro, kowa well o chareha, i bokatar un i nasslepastar maredo. Un kowa kai djal win pash i Babilonarja, kowa atchell djido, ninna te atchell leske tchi har peskro djipen.

³O baro Dewel penell: Kau foro well an o wast kol lurdendar un lengro rajestar dino, kai wenn dran o them Babilonia. Kolla lenn kau fores dren.

⁴Kote rakran kol pralstune o baro rajeha un penan: Muk kau murshes, o Jeremia te marell; jaake har job rakrella, lell lo i soor kol lurdendar krik, kai kate pash mende pral atchan an kau foro. Un jaake djal ninna i tsele menshenge an kau foro. Kau mursh rodell gar, hoi i menshenge mishto hi. Na-a, job anell len an i bibacht.

⁵Kote penas o baro rai Zedekja ap lende: Ake, krenn leske, hoi kamenna! Man hi tchi penepaske pash tumende.

⁶Kote lan le o Jeremijes un anan les pash i brunna ap koi lurdengri platsa. Koi brunna his o baro rajeskro tchawes, o Malkija. Un dorjentsa mukan le o Jeremijes tele an kai brunna. Kote dren his kek pani, kokres sapeni tchik his kote, un o Jeremia peras i kotar dren an koi tchik.

⁷An o baro rajeskro kheer his i pralstuno dran o them Etiopia. Leskro lab his Ebed-Melech. Kowa shunas, kai o Jeremia an koi brunna witsedo was. Ap ko diwes his o baro rai Zedekja beshdo pash ko Benjamineskro Wudar.

⁸Un o Ebed-Melech djas dran o rajeskro kheer pash o baro rajeste un penas:

⁹Miro baro rai, kowa hoi kal mursha ko mursheha Jeremia kran, hi i baro tchilatcho koowa. Jon witsran o Debleskro rakepaskres an koi brunna. Kote hunte merell lo i bokatar. Kate an i foro hi buder kek maro.

¹⁰Kote penas o baro rai Zedekja ap o Ebed-Melech: Le triin murshen tuha un tserde les dran koi brunna win, te merell lo gar.

¹¹Un o Ebed-Melech las kol murshen peha un djas an o baro rajeskro kheer, kote kai i ripja garedo hi, un las kotar phure kotja plachte, un pandas len ap i dori, un mukas len tele pash o Jeremia an koi brunna.

¹²Un o Ebed-Melech, penas ap o Jeremia: Tchip kal phure kotja plachte tel tire mussja, te tchinell tut gar koi dori an i mass; kowa kras o Jeremia.

¹³Un jon tserdan les kol dorjentsa pre dran koi brunna. Un job atchas ap i lurdengri platsa.

¹⁴Un o baro rai Zedekja bitchras murshen pash o Debleskro rakepaskro, o Jeremia, un mukas les pash peste te anell pash o triinto wudar an o baro Debleskro kheer. Kote penas o baro rai Zedekja ap o Jeremia: Me kamau tut tchomone te putchell; ma kate tchomone glan mande!

¹⁵Kote penas o Jeremia ap o Zedekja: Me te penau tuke tchomone, palle mareh tu man. Te penau tuke, hoi te kress, palle shuneh gar ap mande.

¹⁶Kote das pes o baro rai Zedekja tchorchanes sowel un penas: Glan o djido Debleste, kai men maro djipen das, penau tuke: Me mukau tut gar te marell, un me dau tut witar gar an o wast kol murshendar, kai kamenn tut te marell.

¹⁷Un o Jeremia penas ap o Zedekja: Kowa penell o baro Dewel, ko rai pral o bolepen un i phub, kai o Israeleskro Dewel hi: Te dja tu win pash i pralstunende o baro rajestar dran o them Babilonia, palle atcheh tu djido, un kau foro well gar chatchedo, tu un tiro kheer atchenna djido.

¹⁸Te djah tu gar win pash o pralstunende o baro rajestar dran o them Babilonia, palle dau kau foro an lengro wast. Un jon chatchrenn kau fores pre. Un tu nai nasheh witar gar lendar krik.

¹⁹O baro rai Zedekja penas ap o Jeremia: Man hi traash, te wap an o wast dino kol menshendar dran o them Juda, kai nashan wergel pash i Babilonarja, un jon mantsa djungelo koowa krenna.

²⁰O Jeremia penas: Jon denn tut gar an lengro wast. Shun ap o baro Debleskro rakepen, hoi me tuke penau, palle djal tuke mishto, un tu atcheh djido.

²¹Te djah tu gar win pash lende, palle well kowa, hoi o baro Dewel mange sikras:

²²Me dikom, har wan i tsele djuwja, kai pral atchan an tiro kheer win anlo pash i pralstunende o baro rajestar dran o them Babilonia. Kol djuwja penenn tuke palle: “Tire mala, kai tuke penan ‘lauter hi mishto’, rakran jaake bud an tute dren, te kral tu i dinelo koowa. Kanna, kai tire pire an i sapeni tchik hi, mukenn jon tut kokres.”

²³Tire tsele romja un tire tsele tchawe wenn pash i Babilonarja win anlo. Un tu ninna nai nasheh gar lendar krik. Jon taprenn tut, un denn tut an i wasta o baro rajestar dran Babilonia. Un kau foro well tele chatchedo.

²⁴Un o Zedekja penas ap o Jeremia: “De jak, te shunell kek kal laba, hoi tu mange penal. Palle mereh witar gar.

²⁵Un te shunenn i pralstune, kai me tuha rakrom, un te wenn le pash tute un penenna: ‘Pen menge, hoi rakral tu o baro rajeha; ma khate les glan mende, palle mukah tut te djiwell un marah tut gar. Hoi rakras o baro rai tuha?’

²⁶Palle pen lenge: ‘Me mangom o baro rajestar, te mukell lo man gar buder an o Jonataneskro kheer te anell, kote hunte meroms.’”

²⁷Kote wan i pralstune pash o Jeremia un putchan les win. Un job rakras lentsa jaake, har o baro rai kowa leske penas. Un jon anan tchi dran leste win. Kote mukan le lestar tele.

²⁸Un o Jeremia atchas ap koi lurdengri platsa bis ap ko diwes, kai o foro Jerusalem dren lino was.