Read O Debleskro Drom - I Bibla an o Romano Rakepen 2021 Jeremia 39 Bible Online

Jeremia 39 - O Debleskro Drom - I Bibla an o Romano Rakepen 2021 bible

Jeremia 39

¹An o enjato bersh, har o Zedekja o baro rai pral o them Juda his, an o deshto tchon, was o Nebukadnezar, ko baro rai dran o them Babilonia un leskre tsele lurde pash o foro Jerusalem, un his trul o foro trujel tardo.

²An o deesh-te-jekto bersh, kai o Zedekja baro rai his, ap o enjato diwes an o starto tchon, phagan jon an o foro dren.

³Un i tsele pralstune o baro rajestar dran o them Babilonia djan dren un atchan pash o Mashkralstuno Wudar. Mank lende his o Nergal-Sharezer, o Samgar-Nebo, o Sar-Sechim — kowa his o pralstuno pral o baro rajeskro kheer, i wawar Nergal-Sharezer — kowa his o pralstuno i gosewendar, un bud wawar pralstune.

⁴Har o Zedekja, ko rai pral o them Juda, un leskre lurde kowa dikan, nashan le penge rati dran o foro win, ap ko drom, hoi djal an o rajeskri baar[11]. Kote his i wudar mashkral kol dui massurja. Dran ko wudar nashan le penge ap koi rig, kai o telstuno them o panjestar Jordan hi.

⁵I lurde dran Babilonia lan len palla, un tapran o Zedekja an o telstuno them pash o foro Jericho, un pandan les un anan les pash o Nebukadnezar, ko baro rai dran o them Babilonia. Kowa his an o foro Ribla an o them Hamat. Job rakras pral leste i phagi win.

⁶Kote an o foro Ribla mukas o baro rai dran o them Babilonia i tsele tchawen o Zedekjestar glan leske jaka te marell. Un kote mukas lo ninna i tsele pralstunen dran o them Juda te marell.

⁷O Zedekjeske wan i jaka win tchurje dino. Un job was an sasterne shelle pandlo, un was an o them Babilonia anlo.

⁸Kol lurde dran Babilonia chatchran o baro rajeskro kheer un kol tsele menshengre khera an o foro Jerusalem, un dan o foreskre massurja tele.

⁹O pralstuno i lurdendar — leskro lab his Nebusaradan — kowa anas kolen, kai gomme an o foro his, ninna kolen, kai pash lende wergel nashan, pandles an o them Babilonia.

¹⁰Kokres i tchorwelen, kolen kai tchi his, mukas o Nebusaradan, an o them Juda pale, un das len drakengro them un hachetikri phub.

¹¹Un o Nebukadnezar, ko rai dran o them Babilonia, rakras o pralstuneha i lurdendar, o Nebusaradan, un penas leske, hoi te krell lo o Jeremijeha:

¹²Le les pash tute, penas lo. Un de garda ap leste! Ma duke les! Un jaake har job les kamella, jaake kre les leha.

¹³Kote mukan i pralstune o Jeremijes dran i lurdengri platsa te lell, kai lo pandlo his. I pralstune his o Nebusaradan — kowa his o pralstuno lurdo, un o Nebu-Shasban — kowa his o pralstuno pral o baro rajeskro kheer, un o Nergal-Sharezer, — kowa his o pralstuno i gosewendar un o tsele wawar pralstune o baro rajestar dran o them Babilonia. Jon dan les an i wasta i murshestar, kowa kharas Gedalja, te mukell job les khere te djal. Leskro dad his o Ahikam, koleskro dad his o Shafan. Jaake nai atchas o Jeremia pash kol menshende, kai atchan an o them Juda.

¹⁵Har his o Jeremia gomme stildo ap i lurdengri platsa, rakras o baro Dewel ap o Jeremia un penas:

¹⁶Dja pash o Ebed-Melech, kai dran Etiopia hi, un pen leske: Kowa penell o baro Dewel, ko rai pral o bolepen un i phub, kai o Israeleskro Dewel hi: Shun, mire laba, hoi rakrom pral kau foro, wenn tchatcho: Bibacht un kek bacht wenn pral kau foro. Un tu dikeh kowa ap ko emligo tsiro.

¹⁷Tut kamau an ko tsiro win te lell dran i bibacht, penell o baro Dewel. Un tu weh kol menshenge gar an o wast dino, glan kolende tut traash hi.

¹⁸Me kamau te djiwess, un te wess gar o chareha maredo. Tu patsal mange. Doleske krau, te nai nasheh tuke. Tiro djipen atchell tuke. Kowa penell o baro Dewel.