Read O Debleskro Drom - I Bibla an o Romano Rakepen 2021 Jeremia 42 Bible Online

Jeremia 42 - O Debleskro Drom - I Bibla an o Romano Rakepen 2021 bible

Jeremia 42

¹Kote wan i pralstune i lurdendar khetne, o Johanan, koleskro dad o Kareach his, o Asarja, koleskro dad o Hoshaja his, un i tsele menshe, tikne un bare,

²un penan ap o Debleskro rakepaskro, o Jeremia: Muk maro mangepen glan tute te well, un mange tiro baro Deblestar kal tsele menshenge, kai pral atchan! Glan i tsiro hams bud, kanna atchan gar bud pral mendar, har tu nai tire jakentsa dikeh.

³Mange tiro baro Deblestar, te penell lo menge, kai te djas, un hoi te kras.

⁴Un o Jeremia, penas ap lende: Mishto, me shunau ap tumende, un mangau tumaro baro Deblestar, har tumer penan. Un lauter, hoi o baro Dewel penell, penau tumenge dureder. Un me rikrau tumenge tchi pale, hoi job mange penell.

⁵Kote penan jon ap o Jeremia: Mer kamah lauter te krell, hoi tiro baro Dewel menge dran tiro mui penell. Job kokres nai penell, te kram mer kowa lauter jaake oder gar. Hoi job penell pral mende, hi mishto un tchatcho.

⁶Te penell lo menge, hoi te kras, palle kamah te shunell ap leskre laba, — te hi le latches un te hi tchilatches menge, mer kamah te shunell ap maro baro Debleste, pash koleste bitchrah mer tut. Palle djal menge mishto.

⁷Pal deesh diwessa rakras o baro Dewel o Jeremijeha.

⁸Kote kharas lo o Johananes, un i pralstunen i lurdendar, kai pash leste his, un i tsele menshen, tikne un bare,

⁹un penas ap lende: Kowa penell o baro Dewel, kai o Israeleskro Dewel hi, pash koleste tumer man bitchran, te anap tumaro mangepen glan leste:

¹⁰Te atchenn tumer an kau them, palle mukau me tumen pale bares te well, un me phagau tumen gar khetne; me krau tumen soreles, un tradau tumen gar win dran o them; man khaitell, kai hunte anom sawi bibacht pral tumende.

¹¹Ma trashenn o baro rajestar dran o them Babilonia, glan koleste tumen traash hi, penell o baro Dewel; me hom pash tumende, te wap tumenge ap i rig, un lap tumen dran leskro wast win. Doleske ma trashenn lestar!

¹²Me krau tumenge miro dji pre, un krau, te krell job tumenge peskro dji pre, un mukell tumen pale ap tumari phub khere te well.

¹³Te shunenn tumer gar ap o baro Debleste un penenn: “Mer kamah gar an kau them te atchell.

¹⁴An o them Egiptia kamah te djal, te dikas kek kurepen, un te shunas kek kurepaskri phurdepaskri, un te well men doha maro chapaske. Awa, kote kamah te atchell.”

¹⁵Palle shunenn o baro Debleskro lab, tumer kai atchan pral an o them Juda! Kowa penell o baro Dewel, ko rai pral o bolepen un i phub, kai o Israeleskro Dewel hi: Te krenn tumen ap o drom, te djan an o them Egiptia, un te djiwenn kote,

¹⁶palle taprell tumen o charo an o them Egiptia, glan koleste tumer tumen kanna trashenn. Un koi bok, glan kolate tumer tumen kanna darenn, lenn tumen palla an o them Egiptia. Un tumer merenn kote.

¹⁷Hi koon hi: Kowa kai krell pes ap o drom te djal lo an o them Egiptia, un te djiwell lo kote, kowa merell o chareha, i bokatar un o djungelo nasslepah. Un kek atchell djido lendar. Un kek nai nashell dran koi bibacht, hoi kamau me pral lende te anell.

¹⁸Doleske penell o baro Dewel, ko rai pral o bolepen un i phub, kai o Israeleskro Dewel hi: Te djan tumer an o them Egiptia, well miri soreli choli jaake pral tumende har was li pral i menshende an o foro Jerusalem. An o them Egiptia han har praassede menshe. Pral kolende denn le i wasta khetne pral o shero. Jon san pral tumende. Un te kamenn le jekes te praassell, penenn le: Mu djal tuke har i Israelenge an o them Egiptia! Un kau them, kai kanna han, dikenn tumer buder gar.

¹⁹Kawa hi ko lab, hoi penas o baro Dewel, tumenge, kai atchan djido an o them Juda: “Ma djan an o them Egiptia.” Doleske bistrenn gar, kai dom tumen kau diwes trad, te djan gar an o them Egiptia.

²⁰Tumer bitchran man pash tumaro baro Debleste, un penan: “Putch maro baro Deblestar menge, un pen menge halauter, hoi lo penell, te kras mer kowa.” Te shunenn tumer kanna gar ap leste, anenn tumer tumen an i bibacht.

²¹Kowa penom tumenge kau diwes. Un tumer kamenn gar ap tumaro baro Debleste te shunell, te krenn halauter, hoi job mukas tumenge dran miro mui te penell.

²²Doleske shunenn un djinenn: Mank tumende hi sawe, kai wenn maredo o chareha, wawar merenn i bokatar un o djungelo nasslepah kote, kai djan koi, te djiwenn kote.