Read O Debleskro Drom - I Bibla an o Romano Rakepen 2021 Jeremia 46 Bible Online

Jeremia 46 - O Debleskro Drom - I Bibla an o Romano Rakepen 2021 bible

Jeremia 46

¹Kawa hi o lab pral i wawar themma, hoi penas o baro Dewel ap leskro rakepaskro, o Jeremia.

²An o starto bersh, har o Jojakim, koleskro dad o Josia his, ko baro rai pral o them Juda his, rakras o baro Dewel pral o them Egiptia. Koi his i lurde o Faraestar Necho, ko baro rai pral o them Egiptia, pash o pani Eufrat tardo pash o foro Karkemish. Un o Nebukadnezar, ko baro rai dran o them Babilonia, kuras pes lentsa un das len.

³[O baro Dewel mukas o Jeremia te shunell, har i egiptikre pralstune gole denn:] Lenn tumare shilte an o wast! Djan an o kurepen!

⁴Tchiwenn i grajenge i dorja an o mui! Klissepangre, beshenn tumen pre! Tchiwenn i lurdengre stadja ap tumaro shero! Lenn tumare lengste tchurja, un riwenn tumaro sasterno gad an!

⁵Hoi dikau me kote? putchell o baro Dewel. Len hi traash, kol lurde, un tserdenn pen pale! Ninna i sorele kurepangre wenn dino. Hakeno nashell jaake sik har djala, un dikell buder gar pal peste!

⁶Kowa kai sik hi, nai nashell peske gar. Un kowa kai sorelo hi, well tapedo. Kote, an o nordetikro them pash o pani Eufrat peran le, un atchenn le mulo tchiddo.

⁷Koon hi kowa, kai hadas pes, har ko pani, hoi kharell Nil, un hoi nashell pral peskre rigja, un tchakrell lauter tel peste?

⁸Kowa hi o them Egiptia, hoi hadas pes har o Nil, un was sorelo har bare panja. Kowa penell: Me hadau man, te tchakrap i phub, un krau kol forja paash, un marau kolen, kai kote djiwenna.

⁹Mishto, beshenn tumen ap i graja, ulerenn o kurepangre wurdjentsa! Bitchrenn tumare sorele kurepangren win, kolen dran i themma Etiopia un Libia, kolen, kai shilte hidjrenna, un kolen dran Lud, kai bogentsa karje denna!

¹⁰Kawa hi o diwes o baro Deblestar, kai hi o rai pral o bolepen un i phub. Ap ko diwes dell lo kolen, kai kamenn les gar, kowa pale, hoi jon ap leskre menshende kran. Leskro charo chal len, bis te hi lo tchalo, un well mato lengro rateha. Jon hi har vieche, kai maredo wenn o baro Debleske, kowa, kai hi o rai pral o bolepen un i phub. Job mukell len mulo te dell pash o pani Eufrat an o them, hoi kote tchiddo hi, kai norden hi.

¹¹Tu bibachteli Egiptia, ninna te djah pral an o them Gilead, un leh tuke djet tiro dukepaske, hi kowa tchitcheske. Hi jek, har bud draba un djet tu leh, kowa nai krell tut gar sasto.

¹²Tiri ladj was an i wawar themma win gole dino. Halauter shunan tiro ropen. Tire sorele kurepangre peran jek pral o wawar, un atchan jek pash o wawareste tchiddo.

¹³Kawa hi o lab, hoi penas o baro Dewel ap leskro rakepaskro, o Jeremia, an ko tsiro, har o Nebukadnezar, ko baro rai dran o them Babilonia, an o them Egiptia djas, te lell lo les dren:

¹⁴Denn win gole an o them Egiptia! Penenn i menshenge an i forja Migdol, Memfis un Tachpanes: Kurenn tumen kolentsa, kai ap tumende pre djan! O charo chal kolen, kai trul tumende hi.

¹⁵Hoi dikau me kote? Tire sorele perenn ap i phub, un nai atchenn gar tardo. O baro Dewel das len tele.

¹⁶Job krella, kai bud lendar perenna, un jek ap o wawareste ap i phub tchiddo hi. Kote penenn i lurde: Awenn, mer djas pale pash mare menshende, an kol themma, kai khere ham! Awenn, nashas glan kal marepaskre chare!

¹⁷Kharenn ko lab o Faraestar, ko rajestar pral o them Egiptia: ‘Baro Mujeskro, koleskro tsiro trujel hi’.

¹⁸Me dau man sowel pash miro djipen, penell o baro rai, koleskro lab hi ‘o baro Dewel, o rai pral o bolepen un i phub’: I baro rai wella, kai hi bareder har i tsele wawar, jaake har i berga Tabor bareder hi har i berga trul late, un har i berga Karmel hadell pes pash o baro pani.

¹⁹Tumer Egiptarja, rodenn tumare koola khetne, tumer hunte nashenn tumenge. O foro Memfis well har o mulo them, un chatchedo well lo, jaake kai kek nai djiwell kote.

²⁰O them Egiptia hi har i shukar terni grumni. O marepaskro well koi rigjatar, kai norden hi, te marell lo lat.

²¹Ninna i lurde, kai plaissedo wenna an kau them, hi har terne thulle grumja. Jon nashenn penge un kurenn pen gar ap ko tchilatcho diwes, kai well i bibacht pral lende, un jon pengri phagi lenna.

²²Pokones har i sap, tchorenn le pen krik. Kolla, kai kamenn o them penge dren te lell, wenn bud lurdentsa, un anenn pengre tower pral lende har kol weshengre budepangre,

²³kai denn pengro weesh trujel. Jaake denn le ap Egiptia dren. Kowa penell o baro Dewel. Jon hi budeder har stepangre jaake bud, kai djinell kek, kitse lurde jon hi.

²⁴Palle hi i ladj ap o them Egiptia tchiddo. I Egiptarja hi an o wast kol menshendar dino, kai wenna koi rigjatar, kai norden hi.

²⁵O baro Dewel, ko rai pral o bolepen un i phub, kai o Israeleskro Dewel hi, job penell: Me anau i phagi ap ko debleste Amon an o foro No[13], ninna ap o baro rajeste pral o them Egiptia, un ap o tselo them Egiptia peskre deblentsa un rajentsa. Awa, o Farao un halauter, kai patsenn, te well lo lenge ap i rig, kolla lenn pengri phagi.

²⁶Me dau len an i wasta kolendar, kai kamenn len te marell: an o wast ko baro rajestar dran Babilonia, o Nebukadnezar, un an o wast leske bare murshendar. Pal ko tsiro well pale jaake har an i phure tsirja: An o them Egiptia djiwenn pale menshe. Kowa penell o baro Dewel.

²⁷Tu, miro budepaskro Jakob, ma traash! Tu, Israel, ma rob! I diwes well, kai anau tut khere dran wawar themma. Lau tire tchawen win dran ko them, kai le pandles anlo wan. O Jakobeskre tchawe wenn pale, un nai djiwenn pale kek kurepah un kek darjah. Kek te krell lenge traash.

²⁸Doleske, ma traash, Jakob, miro budepaskro, penell o baro Dewel. Me hom pash tute. Kol tsele natsjone, kai me tut tradom, mukau gar te djiwell. Tut mukau te djiwell. Dawa hunte dap tut, har tuke mishto hi. Kek dawentsa nai mukau tut gar.