Read O Debleskro Drom - I Bibla an o Romano Rakepen 2021 Jeremia 48 Bible Online

Jeremia 48 - O Debleskro Drom - I Bibla an o Romano Rakepen 2021 bible

Jeremia 48

¹Laba pral o them Moab. Kowa penell o baro Dewel, ko rai pral o bolepen un i phub, kai o Israeleskro Dewel hi: Djungeles djal kol menshenge an o foro Nebo. Khetne dino well lengro foro. Ladj well pral o foro Kirjatajim. Dren lino well lo. I massuri trul o foro well tele dino un khetne phagedo.

²I Moabarja nai phurdenn pen buder gar pre pral lengro foro Heshbon. Wawar menshe kamenn o foreske tchilatchepen te krell, un penenn: Awenn, kras ko foro paash, te djiwenn buder kek menshe an leste! Un tu, foro Madmen atcheh witar gar. I lurde wenn pral tute.

³I bari gole well shunlo dran Horonajim, kote peras halauter khetne, un phagas halauter.

⁴O Moab hi khetne dino. Leskre tikne tchawe rowenn bari goljah.

⁵O ropah djan le pre ap o drom an Luhit. Ninna ap o drom tele an o foro Horonajim well i bari ropen shunlo.

⁶“Nashenn tumenge sik”, kharenn le. “Nashenn tumaro djipaske! Nashenn an o mulo tato them, te djiwenn kote har i bur.”

⁷Tu Moab, patsal, kai taprell tut kek tchilatchepen an tire sorele khera un pash tiro baro brawlepen. Doleske weh tu ninna dren lino. Tiro dewel, o Kemosh, leskre rashaja un pralstune hunte wenn pandles anlo an i wawar them.

⁸O marepaskro, kai halauter marella, well pral hako foro an tiro them, kek foro atchell tardo. O telstuno them well har o mulo them, un o pralstuno them well khetne stakedo. Kowa penas o baro Dewel.

⁹Tchiwenn i sikepen pre ap o drom, kai i Moabarja nai nashenn penge.[14] Lengre forjendar atchell tchi har barra pre. Kek nai djiwell buder koi dren.

¹⁰Praassedo hi, koon o baro Debleskri budi tchiddo mukell; praassedo hi, kai rikrell leskro charo pale, te marell lo gar!

¹¹Jaake rah har o them Moab koi hi, djiwan leskre menshe kek kurepah. An kek tsiro hunte djan i Moabarja an o pandepen. Jon nai atchan khere jaake har i mool, kai atchas an jek kashtengri piri, un was gar tchoredo dran jek piri an i wawar. Doleske sungell li pal peste kokres, un lakro sungepen atchas ap leste.

¹²Doleske dik, penell o baro Dewel, ko tsiro wella, kai bitchrau sawen pash lende, kai krenn lentsa, har menshe i moljah krenn, hoi le win tchorenn un i khore paash witsrenn.

¹³Un i Moabarja, kai patsan, te well lengro dewel, o Kemosh, lenge ap i rig, jon hunte ladjenn pen, jaake har o kheer Israel hunte ladjas pes, har wan leske leskre debla an o foro Betel gar ap i rig, ap kolende jon pen soreles rikran.

¹⁴Tumer mursha dran o kheer Moab, har nai penenn tumer tumendar: Mer ham sorele kurepangre un tchatche mursha?

¹⁵O them Moab well paash dino, un leskre forja wenn dren lino. Leskre feteder lurde djan win, te kurenn le pen, un wenn maredo. Kowa penell o baro rai, kai kharell ‘baro Dewel, ko rai pral o bolepen un i phub.’

¹⁶Hi buder gar rah, palle djal o them Moab tele, un leskri bibacht well sik pral leste.

¹⁷Tumer halauter, kai djiwenn trul o them Moab un han leskre mala, awenn, un denn i ropaskri gole un penenn: Hawi grecha! O Moabeskri soor un leskro railepen hi phagedo!

¹⁸Tumer an o foro Dibon, kai han pre-phurdo pral tumaro railepen, djan tele un beshenn tumen an i tchik! Kolla, kai phagan i wawar forja an o them Moab khetne, wenn pash tumende, un krenn tumare sorele khera paash.

¹⁹Tumer, kai djiwenn an o foro Aroer, djan ap o drom un dikenn kolen, kai nashenn penge krik! Putchenn lendar: “Hoi djas kanna kate?”

²⁰Ach, o them Moab hi paash dino un khetne stakedo! Rowenn un denn golja! Penenn i menshenge pash o pani Arnon, te was o them Moab khetne phagedo!

²¹I phagi was pral ko telstuno them, pral kol forja, kai kharenn: Holon, Jahaz, Mefaat,

²²Dibon, Nebo, Bet-Diblatajim,

²³Kirjatajim, Bet-Gamul, Bet-Meon,

²⁴Kerjot, Bozra, un pral i tsele wawar forja an o them Moab, kolla, kai dur hi, un kolla kai gar dur hi.

²⁵I bari soor o themestar Moab hi phagedo, hi jaake, har te wals leskri mussi tele dino. Kowa penell o baro Dewel.

²⁶Tu Moab, his gar jaake, te his tuke i Israelitarja sapaske? Hako kopo kai rakral lendar, sanal pral lende, har te wans le tchorepangre, kai wan tapedo. O Moab hadas pes pral o baro Debleste. Doleske krenn les mato! Job te perell an peskro tchadepen! Un wawar sanenn pral leste.

²⁷

²⁸Tumer menshe an o them Moab, nashenn win dran tumare forja, un djiwenn mank i bare barra! Un krenn les har i taube, kai krenn pengre khera kote, kai i barra dur tele djan.

²⁹An hako tsiro was penlo pral o them Moab, har pre-phurdo job hi, un hawo sharedo job hi, har rikrell lo bud pestar, hawo baro mujeskro job hi, un har dikell lo tele ap i wawarende!

³⁰O baro Dewel penell pral leste: Me prindjrau leskro pre-phurdo dji mishto, un leskro baro mui; Lauter hi chochepen.

³¹Doleske hunte rowap pral i Moabarja, un dau gole pral o tselo them. Mange hi ropaske pral kol menshende an o foro Kir-Heres.

³²Tumer menshe an o foro Sibma, rowau budeder pral tumende har rowom pral o foro Jaser. Tu hal har i drakengro ruk; tire lengste kashta djan pral o baro pani, un wan bis pash o foro Jaser. An ko tsiro, kai i drake un i wawar rukengre dren anlo wenn, wenn kolla pral lende, kai lauter paash krenna. Tchi atchell pral.

³³Kote, kai i ruka un burra tardo hi an o them Moab, giwenn un khelenn le buder gar pral ko latcho koowa, hoi kote bares was. Kek mool well kerdo. Kek drake wenn buder khetne stakedo, te nashell i mool win. O moljengro rai giwell buder gar peskri gili.

³⁴Kolla golja i menshendar dran o foro Heshbon wenn shunlo bis pash i forja Elale un Jahaz. Un koi gole dran o foro Zoar djal bis pash o foro Horonajim un o gab Eglat-Shelishija; Ninna kol panja pash Nimrim hidjrenn buder kek pani an pende.

³⁵Me, o baro Dewel, kamau buder gar, te djan i Moabarja ap i mulne platse, te chatchrenn le viechen pengre deblenge. Me mukau kowa buder gar te krell.

³⁶Doleske giwau miri ropaskri gili pral o them Moab, pral i menshende an o foro Kir-Heres. Miri gili hi har ko bashepen ap i tikne phurdepangre, hoi bashrenn le, te meras jek. Ko tselo brawlepen, hoi le penge khetne anan, hi buder gar koi.

³⁷I mursha tchinan o tselo baal ap pengre shere tele, ninna pengre tchora, te sikrenn le, kai lenge ropaske hi. Lengre wasta hi pre tchinle. Un hakeno riwas i gono pral peste.

³⁸Pral ap i khera an o tselo them Moab, un ap leskre tsele dromma denn le bares gole. O baro Dewel penell: Me phagom o them Moab an kotja har i khoro, hoi kek buder kamella.

³⁹Dikenn, har hi o them khetne dino! Har bares denn le gole i ropastar! I ladjatar rikrenn le o shero tele. An i tsele themma trul o them Moab, san i menshe pral lende, un dikenn darene jakentsa ap lende.

⁴⁰Kawa penell o baro Dewel: Dikenn, kowa, kai marell o Moab, well sik har i adlari, un krell peskre mussja buchles pral o them.

⁴¹Kal forja un sorele khera wenn dren lino. Ap ko diwes hi i djia o tchatche murshendar an o them Moab jaake dareno, har o dji i djuwjatar, kai anell i ternepen ap kai phub.

⁴²O Moab hadas pes pral o baro Debleste. Doleske well lo jaake dino, te hi lo buder kek natsjona.

⁴³O baro Dewel penell: Tumer menshe an o them Moab, Bari traash well pral tumende, an bare chebja un dorja wenn tumer tapedo.

⁴⁴Kowa kai nashell peske glan koi bari traash, kowa perell an i cheb dren, un kowa kai nai stakrell dran i cheb win, kowa well i dorjentsa pandlo. Awa, ko bersh wella, kai dau i menshenge an o them Moab pengri phagi. Kowa penell o baro Dewel.

⁴⁵Khine naashepangre dran wawar forja wenn pash o foro Heshbon, te atchenn le koi. Koi well i jag win dran Heshbon, un i bari jagakri tchip djal dran o kheer o baro rajestar Sihon win, un chatchrell o them, kai kol bare mujengre djiwan, fun win bis mashkral dren ap i berge.

⁴⁶Har djungeles djal tuke, tu them Moab! Nashedo hi kol menshe, kai o debles Kemosh an-mangan; tire tchawe un tire tcha wan anlo an o pandepen.

⁴⁷I diwes well, kai krau me, te well i menshenge dran o them Moab pale lauter mishto, penell o baro Dewel. Kate herell pre, hoi o Jeremia pral o them Moab penas.