Read O Debleskro Drom - I Bibla an o Romano Rakepen 2021 Jeremia 5 Bible Online

Jeremia 5 - O Debleskro Drom - I Bibla an o Romano Rakepen 2021 bible

Jeremia 5

¹Djan kol dromma an Jerusalem pral un tele! Krenn tumare jaka pre un rodenn ap kol dromma o forestar! Te hatsenn jekes, kai djiwell an o tchatchepen, un rikrell pes ap o Debleste, palle bistrau i doosh o tselo forestar.

²Ninna te denn jon pen sowel pash o djido Debleste, hi kowa chochepen.

³Baro Dewel, tire jaka dikenn ap i djipen an o tchatchepen. Tu dal len i phagi. — Jon haiwenn kowa gar. Tu kral len paash mulo. — Un jon atchan, har jon hi. Jon djan pal pengro shero. un kamenn gar pengro tchilatcho drom te mukell.

⁴Me penom mange: Kolla hi tchorwele menshe, kai tchi djinenna, un prindjrenn gar o Debleskro drom un leskro tchatchepen.

⁵Me kamau pash i pralstunende te djal, te rakrap lentsa. Kolla djinenn o Debleskro drom un nai penenn mange, hoi an i jaka lengro Deblestar mishto hi. Palle haiwom: Ninna kolla kaman gar, te well job lengro rai, un kaman gar ap leste te shunell.

⁶Doleske wenna lewe dran o weesh un marenn len; diwje djukle dran o diwjo un truk them dandrenn len an kotja, un bare diwje margodje lurenn glan lengre forja. Hakeno, koon win wella, wella an kotja dandedo. Lengri doosh hi bud un phari. Bud kope djan le mandar krik.

⁷Hoske bistrap i doosh mire menshendar? Jon djan mandar krik, un denn pen sowel pash koleste, kai kek dewel hi. Har me len tchalo krom, phagan le mantsa, un djan an i lubjengro kheer.

⁸Hakenes hi chantch ap kol wawareskri romjate har i grai, kai diwjo hi pal haki djuwjate.

⁹Un me hunte dap len kek phagi? penell o baro Dewel, un dap hawe menshen har kalla gar pale, hoi jon kran?

¹⁰Nashenn pre, kai lengre drakengre ruka tardo hi, un krenn len paash! Ma tserdenn i tsele burra win! Mukenn tchomone tardo! Tserdenn i kashta i drakentsa win, kolla hi gar mange.

¹¹Jon sikran mange o dumo, penell o baro Dewel, kol menshe an Israel un kol menshe an Juda.

¹²Jon penan chochepen pral o baro Debleste, un penan: ‘Kowa krell job gar! Jaake djungelo djal menge gar! Kurepen un bok well gar pash mende.

¹³O Debleskre rakepangre rakrenn, hoi tchi moldo hi. Hoi jon penan, well gar o Deblestar. Mu perell ap lende, hoi le penan.’

¹⁴Doleske penell o baro Dewel, ko rai pral o bolepen un i phub: Sawo koowa rakrenn tumer! Doleske kamau me mire laba an tiro mui, Jeremia, har jag te krell, un i menshen har kasht chatchepaske, un koi jag chal kol kashta pre.

¹⁵Pen kol menshenge an Israel: Me anau menshen fun dural pash tumende, penell o baro Dewel, menshe, kolengro rakepen, un hoi jon penenna, haiwenn tumer gar. I phuri natsjona hi le. Un len hi bari soor.

¹⁶Lengre faile anenn o merepen. Jon hi halauter tchatche mursha, kai haiwenn pen te kurell.

¹⁷Jon chan tiro djob un tiro maro, tire tchawen, tire tchen, tire bakren un grumjen, tire drake, tire faigetikre ruka. Tumer patsenn, te djal tumenge tchi an tumare sorele forja. Kolen lenn jon tumendar o chareha krik.

¹⁸Me, o baro Dewel, kamau mire menshen gar lauteren te marell an ko tsiro.

¹⁹Un te putchenn jon: Hoske krell maro baro Dewel kowa menge lauter?, hunte peness tu lenge: Jaake har tumer mandar krik djan, un wan wawar deblenge koi an tumaro them, jaake hunte budrenn tumer wawar menshenge an i them, kai gar tumaro hi.

²⁰O baro Dewel penas ap mande: Pen ap kol menshende dran o kheer Jakob, un ap kol menshende an o them Juda:

²¹Shunenn kai, tumer menshe, kai tumen tchi an o shero hi, kai len jaka hi, un dikenn tchi, kai len kanda hi un shunenn tchi!

²²Hi tumen kek traash mandar, putchell o baro Dewel. Trissenn tumer gar glan mande? Me krom, te atchell o baro pani ap jek platsa, un tchiwom santa koi glan. Koi hunte atchell o pani hako tsiro, un dureder nai nashell lo gar. Ninna te well ko pani jaake diwjo, un djal pral un tele, nai djal lo gar dureder.

²³Kal menshe djan pal lengro shero, un kamenn gar te shunell. Jon djan mandar krik un djan pengro drom.

²⁴An pengro dji penenn le gar: Mer te dikas pre ap maro baro Debleste! Job bitchrell menge o brishin an o tchatcho tsiro, brishin an o wend un brishin an i nijal, te well men o djob chapaske an ko tchatcho tsiro.

²⁵Tumari doosh, hoi ap tumende anan, un ko tchilatchepen, hoi krenna, rikras ko latchepen tumendar pale, jaake te wan phare tsirja ap tumende.

²⁶O baro Dewel penella: Mashkral mire menshende hi tchilatche menshe, kai lurenn ap wawarende, te taprenn le len, har kolla, kai tapenn i tchirklen dren,

²⁷un kolen tchirklengre khera pherde tchirkle hi. Jaake hi lengre khera pherdo tchoredo koowa. Doleske wan jon baro un brawelo.

²⁸Thullo un pesso hi le, un mukenn gar tele te krenn le tchilatchepen. O tchatchepen lenn le gar an o wast, te lenn kolendar pengro tchatchepen, kai tchorwelo hi, ninna kol tchawendar, kai len kek dad buder hi.

²⁹Mukap me len kowa te krell un penap tchi koi pre, penell o baro Dewel. Dap me sawe menshen kek phagi?

³⁰An kau them djal bud tchilatchepen un djungelo koowa.

³¹O Debleskre rakepangre rakrenn chochepen, un kol rashaja rodenn penge ko feteder win, un mire menshe kamenn kowa jaake. Hoi kamenn tumer te krell, te hi tumaro tsiro trujel?