Read O Debleskro Drom - I Bibla an o Romano Rakepen 2021 Jeremia 50 Bible Online

Jeremia 50 - O Debleskro Drom - I Bibla an o Romano Rakepen 2021 bible

Jeremia 50

¹Kawa hi ko lab, hoi penas o baro Dewel ap peskro rakepaskro, o Jeremia, pral o them Babilonia un leskro foro Babilon:

²Denn win gole an i wawar themma! Halauter hunte shunenn! Hadenn tumari themeskri plachta pre! Hakeno te shunell kowa! Rikrenn les gar pale! Penenn: O foro Babilon hi dren lino, Lengro dewel Bel nai kras tchi, lengro dewel Marduk hi khetne phagedo; lengre mule debla nai kran tchi, lengre figure hi pash kerdo!

³Lurde wenna dran ko them, hoi kote hi, kai norden hi, un djan an o kurepen lentsa. Kolla krenn, te well lengro them i mulo them, jaake kai kek nai djiwell kote. I Menshe un i vieche hunte nashenn penge dran ko them.

⁴An kol diwessa un ap ko emligo tsiro, penell o baro Dewel, wenn kol menshe dran o them Israel, khetne kol menshentsa dran o them Juda un djan trujel o ropah, un rodenn man, pengro Debles.

⁵Jon putchenn pal o drom ap i berga Zion, kote kamenn le te djal: “Awenn, te kras men ap o drom pash o baro Debleste! Mer kamah pale leskre menshe te well, un job te well maro Dewel! Kowa te atchell jaake hako tsiro, mer kamah les gar te bistrell.”

⁶Mire menshe hi har nashede bakre. Lengre bakrengre anan len o tchatcho dromestar tele. Jaake nashran le pen ap i berge. Pral tikne un bare berge hunte nashan le, un bistran, kai le khere hi.

⁷Halauter, kai len hatsan, chan len pre. Un kolla, kai his chojedo ap lende, penan: Mer krah tchi, hoi gar tchatcho hi! Jon anan doosh ap pende, har mukan le o baro Debles, kai das len lauter, hoi len hunte well djipaske, un ap koleste lengre phure patsan.

⁸Nashenn sik dran o foro Babilon, mukenn ko them! Un krenn har i mursh bakre, kai nashenn glan kol wawar bakre!

⁹Shunenn, me bitchrau bud lurden dran bud themma, kai fun kotar wenna, kai norden hi, te kurenn le pen i menshentsa an Babilon. Jon wenna un lenn ko foro dren. Kal lurde denn mishto karje, un taprenn hako kopo kowa, hoi kamenn le te taprell.

¹⁰Jon tchorenn o tselo them Babilonia win. Halauter kai kote randenna, wenn tchalo. Kowa penell o baro Dewel.

¹¹Ninna te han bachtelo un sharenn tumen, kai randan miro them win, un stenn har o terne grumja an o senlepen, un denn gole har i sorele graja,

¹²o tsiro well, kai hi tumaro themes, kai boldo wan, buder tchi sapaske. Menshe dran wawar themma san pral leste. Mank i tsele natsjone well o them Babilonia o tchorwleder, i mulo tato them, kek panjeha, kai tchi bares well.

¹³Miri choli well jaake pral o foro Babilon, te djiwell nai kote kek mensho buder. Tchi har barra atchell lestar pral. Hakeneske, kai dikell kowa, atchell o rakepen krik. Job trissell peskro shero pral i tseli bibacht hoi kau foro tapras.

¹⁴Tumer, kai i bogentsa karje denn, tchiwenn tumen trul o foro Babilon pre! Lenn bud faile un denn pal leste karje! Kau foro kras tchilatchepen ap o baro Debleste.

¹⁵Denn i kurepaskri gole haki rigjatar! Dikenn, o foro dell pre! Leskre turme phagenn khetne. Leskre massurja hi tele phagedo. O baro Dewel dell o foro Babilon peskri phagi. Denn o foreske halauter pale pale, hoi kau foro ninna kras!

¹⁶Mukenn kekes djido, kai tchiwell djob an i phub, un kekes, kai tchinell o djob tele an ko tsiro, kai hi lo baro! Lauter kolla, kai hi gar khere an kau them, nashenn penge glan o marepaskro charo, un nashenn pash pengre menshende an pengro them.

¹⁷O Israel his har i nashedo bakro, hoi lan i lewe palla. Ko ersto his o baro rai dran o them Assur, kowa chas les. Pal leste was o baro rai pral o them Babilonia, o Nebukadnezar. Kowa dandras ko mass tele, hoi ap leskre kokale atchas.

¹⁸Doleske penell o baro Dewel, ko rai pral o bolepen un i phub, kai o Israeleskro Dewel hi: Tchatchepah, me dau o rajes pral o them Babilonia un leskro them pengri phagi, jaake har dom o rajes pral o them Assur peskri phagi.

¹⁹O Israel anau me pale khere, te djiwenn le pale ap i berga Karmel un an o them Bashan, un hatsenn doha chapen, un wenn tchalo ap i berge Efrajim un an o them Gilead.

²⁰An ko tsiro un an kol diwessa well koi doosh rodedo, hoi o Israel un o Juda ap pende anan. Un kote well kek doosh hatslo. Me lau lat kolendar krik, kai mukom pral atchell. Kowa penau me, o baro Dewel.

²¹Djan an o kurepen i menshentsa an o them Meratajim; kurenn tumen i menshentsa an o them Pekod; Marenn len un denn lauter paash, hoi len hi, penell o baro Dewel. Krenn halauter jaake, hoi me tumenge penom!

²²Shunenn i kurepaskri gole an o them Babilonia, un o baro ropen.

²³Babilonia, tu hal har i depaskro saster, kai das wawar themma an kotja. Kanna weh tu ninna tele phagedo un an kotja dino. I menshenge an i wawar themma atchell o rakepen krik, te dikenn le tut.

²⁴Me tchiwom dorja pral tiro drom, te peress dren, Babilon, un sikeder har tu dikal, mukal tut te taprell. Pral mande, o baro Debleste, hadal tut. Doleske wal tapedo un pandlo.

²⁵O baro Dewel kras peskro kurepaskro kheer pre, un las o marepaskre koola[15] win, kolentsa job an peskri choli ap o them Babilonia pre djal. Job, o baro Dewel, ko rai pral o bolepen un i phub, les hi kote bud te krell.

²⁶Awenn pral kau them haki rigjatar, krenn leskre djobenge khera pre, witsrenn halauter khetne ap i phub, un chatchrenn les pre, te atchell tchi pral!

²⁷Marenn i tsele terne murshen, denn len tele tchurje har terne gurma! Har djungeles djal lenge! Lengro diwes was, ko tsiro, kai lenn le pengri phagi!

²⁸I bari gole well shunlo kolendar, kai hunte nashenn penge sik, kolendar, kai wan win dran o them Babilonia. An Jerusalem ap i berga Zion penenn le, hoi maro baro Dewel ap i Babilonarja kras, te dell lo lenge pale, hoi jon leskro khereha kran.

²⁹Kharenn kolen khetne, kai haiwenn pengre bogentsa karje te dell! Jon halauter hunte tchiwenn pen pre trul o foro Babilon, un mukenn kekes te nashell peske krik un djiwell! O foro Babilon phurdas pes pre un hadas pes pral mande, o baro Debleste, kai o Israeleskro tchatcho Dewel hi. Doleske denn o foreske o tchilatchepen pale pale, hoi lo kras! Jaake har job ap i wawarende kras, jaake krenn leske ninna!

³⁰Leskre terne mursha wenn maredo ap leskre dromma. Ap ko diwes nashrenn leskre tsele kurepangre pengro djipen, penell o baro Dewel.

³¹Dik, tu pre-phurdo, me kamau ap tute te well, penell o baro Dewel, ko rai pral o bolepen un i phub; tiro diwes was, ko tsiro, kai tiri phagi leh.

³²Kote perell ko pre-phurdo un atchell tchiddo. Un kek hi koi, kai tchiwell les pale ap peskre pire. Me kamau an leske forja jag te tchiwell, kowa te chal halauter pre, hoi kote trujel hi.

³³Kawa penell o baro Dewel, ko rai pral o bolepen un i phub: Kanna hi jaake: I menshe dran o them Israel khetne kol menshentsa dran o them Juda wenn tele rikedo. Un halauter, kai pandan len un anan len win dran lengro them, rikrenn len soreles pash pende, un kamenn len gar pale pale an pengro them te mukell.

³⁴O diwes well, kai lau len kote win, me hom sorelo. Me, o baro Dewel, ko rai pral o bolepen un i phub, lau lengro koowa an miro wast, un lau o kurepen krik i phubjatar, Pral i menshende an o them Babilonia anau traash.

³⁵O baro Dewel penell: O charo mu wella pral o them Babilonia, un pral o foro Babilon peskre pralstunentsa un gosewe murshentsa!

³⁶O charo mu well pral lengre durkepangre, te well diklo, hawo dinelo rakepen jon rakran! O charo mu well pral lengre sorele mursha, te darenn le!

³⁷O charo mu well pral lengre graja un lengre kurepaskre wurdja, un pral hake lurdende, kai wenn dran wawar themma, te wenn le har djuwja! O charo mu well ninna pral lengro brawlepen, kowa well lenge krik lino!

³⁸O brishin te well pale rikedo, te nashenn kek panja buder an o them! O them Babilonia hi pherdo mule debla, un lengro patsepen ap kal tchilatche mule debla kras i menshen narwelo.

³⁹Doleske well ko tsiro, kai djiwenn diwje vieche dran o mulo them kote, ninna diwje djukle un kol bare tchirkle, kai kharenn strausse. Kek mensho djiwell buder koi, An kek tsiro krenn i menshe penge kote khera.

⁴⁰Jaake har das o Dewel i forja Sodom un Gomorra khetne, ninna kol forja trul lende, jaake djal ninna o themeske Babilonia: Ko them well jaake paash dino, kai nai djiwell buder kek mensho koi. Kowa penell o baro Dewel.

⁴¹Denn garda: Bud menshe wenna dran lengro them, hoi kote tchiddo hi, kai norden hi. Awa, bud menshe pengre bare rajentsa krenn pen ap o drom dran ko dur them, te djan le an o kurepen.

⁴²Len hi boge un chare. Jon hi midjak un len khaitell kek. Ap graja klissenn le i goljah, hoi jaake baro hi har i gole, hoi o baro pani krell. Jon wenna, te kurenn le pen tuha, tu foro Babilon.

⁴³Te shunell o baro rai an Babilon lendar, perenn leskre wasta ap leskre herja tele. Un i bari traash well ap leste har i traash i djuwjatar, kai i ternepen lella.

⁴⁴Har i lewo win well dran i burra pash o pani Jordan, wau me un tradau i Babilonarjen sik dran lengro them, un tchiwau koles pral o them, kones me win rodom. Kek hi har me! Kek hunte penell mange, hoi te krap! un kek rai hi sorleder har me!

⁴⁵Shunenn, hoi o baro Dewel peske glan las te krell lo ap o foro Babilon, un hoi kamell lo te krell i menshentsa an o them Babilonia. Tchatchepah, jon halauter wenn krik tradedo har bakre. Ninna lengre tikne tchawe wenn krik tserdedo. Hakeneske, kai dikell kowa, atchell o rakepen krik.

⁴⁶Te well o foro Babilon dren lino, trissell i phub koi goljatar. Un koi ropaskri gole well shunlo an i wawar themma.