Read O Debleskro Drom - I Bibla an o Romano Rakepen 2021 Jeremia 52 Bible Online

Jeremia 52 - O Debleskro Drom - I Bibla an o Romano Rakepen 2021 bible

Jeremia 52

¹Biish-te-jek bersh his o Zedekja, har lo baro rai was; un deesh-te-jek bersha his lo baro rai an o foro Jerusalem. Leskri dai kharas Hamutal. Lakro dad his o Jirmeja dran Libna.

²Un o Zedekja kras, hoi djungeles his glan o baro Debleskre jaka, jaake har o Jojakim ninna kras.

³Kowa halauter kras o baro Debles jaake chojedo pral i menshende an o foro Jerusalem un an o them Juda, te tradas lo len pestar krik. Un o Zedekja phagas o baro rajeha pral o them Babilonia, un kras buder gar, hoi kowa kamas.

⁴Har o Zedekja an o enjato bersh baro rai his, was o baro rai pral o them Babilonia, o Nebukadnezar, peskre tsele lurdentsa glan o foro Jerusalem. Kowa his ap o deshto diwes an o deshto tchon. Un job tchiwas peskre lurden trul o tselo foro, un mukas tchik pre te witsrell trul o foro, te krell lo i drom, hoi djal pral ap o foreskri massuri.

⁵Un ko foro atchas dren pandlo bis an o deesh-te-jekto bersh, kai o Zedekja baro rai his.

⁶Ap o enjato diwes an o starto tchon was i bok bares an o foro, un i menshen his buder tchi te chal.

⁷Kote phagan i Babilonarja an o foro dren. Un an koi rati nashan i tsele kurepangre win dran o foro, un djan dran ko wudar mashkral kol dui massurja, ap o drom, hoi djal pash o rajeskri baar[18]. Un i Babilonarja his trul o foro tchiddo. Har djan i kurepangre ko drom, hoi djal an o telstuno them, kai o pani Jordan nashell,

⁸koi nashan i lurde dran o them Babilonia sik o baro rajeske Zedekja palla. Un jon lan les dren un tapran les an o telstuno them pash o foro Jericho. Un kol tsele kurepangre, kai pash leste his, nashan penge krik.

⁹I lurde dran o them Babilonia lan o baro rajes Zedekja, un pandan les un anan les pash o baro rajeste pral o them Babilonia an o foro Ribla, hoi an o them Hamat tchiddo hi. Un job rakras i phagi pral leste win.

¹⁰Un o baro rai dran o them Babilonia mukas i mursh tchawen o rajestar Zedekja glan leskre jaka te marell. Un mukas ninna i tsele pralstunen dran o them Juda te marell. Kowa kras lo kote an o foro Ribla.

¹¹O Zedekjeske mukas lo i jaka win tchurje te dell, un les sasterne shellentsa te pandell. Palle mukas les o baro rai pral Babilonia an o foro Babilon te anell. Kote was lo stildo bis te meras lo.

¹²O baro rajes pral o them Babilonia, o Nebukadnezar, his i baro lurdo, koles bud penepaske his. Koleskro lab his Nebusaradan. Job his o pralstuno pral i lurdende. Har his o Nebukadnezar an o deesh-te-enjato bersh o baro rai pral o them Babilonia, koi was o Nebusaradan ap o deshto diwes an o pantchto tchon an o foro Jerusalem.

¹³Un job chatchras o baro Debleskro kheer tele, ninna ko kheer o baro rajestar un kol wawar khera an o foro Jerusalem; awa, hako baro kheer chatchras lo tele.

¹⁴Un kol tsele lurde dran o them Babilonia, kai leha wan, phagan i tsele massurja trul o foro Jerusalem tele.

¹⁵Un kol menshe, kai pral atchan an o foro Jerusalem, kolen anas o Nebusaradan pandles an o them Babilonia. Mank lende his tchorwele, ninna kolla, kai dan pen an o wast o baro rajestar pral o them Babilonia, un sawe, kai pral atchan kol budepangre menshendar, kai glan i tsiro koi djiwan.

¹⁶Kokres i tchorwelendar an o them mukas lo sawe koi, te budrenn le ap o drakengro them un ap o hachetikro them.

¹⁷Un i lurde dran Babilonia phagan i bare turme paash, hoi dran lolo saster kerdo wan un glan o kheer o baro Deblestar tardo his. Ninna phagan le kol wurdja an kotja un ko baro thopaskro tcharo, hoi dran lolo saster kerdo was, un hoi an o baro Debleskro kheer tardo his. Un ko tselo lolo saster anan i Babilonarja an o them Babilonia.

¹⁸Ninna lan le pentsa krik kol pirja, bare roja, i tchinepangre, kolentsa i dorja an i momlia tele tchinlo wenn, un bare un tikne tchare un o tselo wawar koowa dran lolo saster, kai budran le leha an o Debleskro kheer.

¹⁹Ninna kowa, hoi dran sonakai un rup kerdo his, las ko pralstuno, o Nebusaradan, peha: khore, tchare, an kolende o sungepaskro koowa chatchedo well, bare tchare, pirja, momelengre, roja un tikne tchare.

²⁰Kolla dui turme, ko baro thopaskro tcharo, kol deesh-te-dui grumja, ap kolende ko thopaskro tcharo tardo his, un kol wurdja, kai o baro rai Salomo mukas te krell o baro Debleskro khereske, kolla lauter his dran jaake bud lolo saster kerdo, te djinas kek, har phares kowa his.

²¹Ochta metarja his kol dui turme bares tarde. I dori, hoi pantch-te-paash metarja lengsto hi, djals jek kopo trul hakeneste. O lolo saster ap hako turmo his star gushte pesso. Dren an i turme his tchi.

²²Un lengre sherja his ninna dran lolo saster kote pre kerdo. Hako shero his budeder har dui metarja baro. Un trul hako shero his i shukar pandepen phabjentsa, halauter dran lolo saster. Jek turmo his har ko wawar.

²³Win his 96 (enja-deesh-te-shob) phabja pre pandles; halauter khetne his sheel phabja ap ko pandepen trujel pandlo.

²⁴Un o pralstuno lurdo las o pralstuno rashajes, o Seraja, pandlo, ninna ko rashajes Zefanja, kai was pal o Seraja, un ninna kol triin murshen, kai dan jak ap o wudar.

²⁵Un dran o foro las lo: ko pralstunes pral i lurdende; wawar efta murshen, kai an hako tsiro trul o baro rajeste trujel hunte wenn; ko tchinepaskro, kai i laba i lurdendar pre tchinas un i lurden win rodas; un shob-deesh wawar bare mursha, kai an Jerusalem his.

²⁶Kolen las o Nebusaradan, ko pralstuno lurdo, pandlo, un anas len pash o baro rajeste dran o them Babilonia. Kowa his an o foro Ribla.

²⁷Un o baro rai pral o them Babilonia mukas len temerl te dell an o foro Ribla, hoi an o them Hamat tchiddo hi. Jaake hunte djan i menshe dran o them Juda an o pandepen.

²⁸Kalla hi kol menshe, kai mukas o Nebukadnezar pandles an Babilonia te anell: Har lo an o eftato bersh o baro rai his: 3.023 (triin-serja-biish-te-triin) menshe dran o them Juda;

²⁹har lo an o deesh-te-ochtato bersh baro rai his: 832 (ochta-sheel-trijanda-te-dui) menshe dran o foro Jerusalem.

³⁰Har lo an o biish-te-triinto bersh baro rai his, anas o Nebusaradan, ko pralstuno lurdo, 745 (efta-sheel-star-deesh-te-pantch) menshe dran o them Juda krik. Halauter khetne his 4.600 (star-serja-shob-sheel).

³¹Har o Ewil-Merodach o baro rai pral Babilonia was, mukas lo gomme an kau bersh o Jojachin, ko rajes pral o them Juda dran o stilepen te lell. Kowa his an o 37. (trijanda-te-eftato) bersh, har o Jojachin krik anlo was, ap o 25. (biish-te-pantchto) diwes an o deesh-te-duito tchon.

³²Un o Ewil-Merodach rakras kamles leha, un hadas les pral kol wawar raja, kai pash leste his an o them Babilonia.

³³Un o Jojachin tchiwas kol ripja pestar krik, hoi les an o stilepen ap leste his, un chas peskro tselo djipen pash o baro rajeste ap leskri chapaskri.

³⁴Un jaake har o baro rai dran Babilonia kowa kamas, was leske dran o baro rajeskro wast hako diwes kowa dino, hoi les hunte well djipaske, jaake rah har job djiwas.