Read O Debleskro Drom - I Bibla an o Romano Rakepen 2021 Jeremia 7 Bible Online

Jeremia 7 - O Debleskro Drom - I Bibla an o Romano Rakepen 2021 bible

Jeremia 7

¹O baro Dewel rakras ap o Jeremia un penas:

²Dja un tchip tut an ko wudar o baro Debleskro kherestar, un pen i menshenge kal laba: Tumer lauter dran o them Juda, kai djan kate dren, te mangenn o baro Debles an, shunenn o baro Debleskro lab!

³Kowa penell o baro Dewel, ko rai pral o bolepen un i phub, — job hi o Israeleskro Dewel: Mukenn tumaro phuro drom un tumaro phuro djipen, palle mukau tumen an kau them te djiwell.

⁴Ma patsenn kol chochene laba, te penenn jon: ‘Kate hi o baro Debleskro kheer, kai djiwell lo. Awa, kate hi o baro Debleskro kheer!’

⁵Mukenn tumaro phuro drom un tumaro phuro djipen, un awenn latcho ap hakeneste!

⁶Ma rikrenn kolen tele, kai hi dran i wawar them, witar gar kol tchawen, kai len kek dad buder hi, un kol romjen, kai len kek rom buder hi! Ma denn kol menshen ratles, kai kek tchilatchepen kran! Ma nashenn wawar deblenge palla. Jon anenn tumen an i bibacht.

⁷Palle kamau me hako tsiro pash tumende djiwell ap kai platsa, an kau them, hoi me tumare phurende dom.

⁸Tumer patsenn chochene laba. Kowa hi tchitcheske.

⁹Tumer han tchorepangre un marepangre, kai denn wawaren mulo, tumer mursha chochenn tumare romjen wawar djuwjentsa, tumer djuwja, chochenn tumare romen, wawar murshentsa, tumer denn tumen sowel un rikrenn koja gar dren, tumer chatchrenn viechen o chocheno debleske Baal un nashenn pal wawar deblende.

¹⁰Un palle wenn tumer glan mande an kau kheer, hoi mange kerdo was, un penenn: ‘Menge nai djal tchi’. Un krenn sawo koowa dureder, hoi choiran man.

¹¹Kau kheer, hoi mange kerdo was, hi kawa tumenge i kheer, kai i tchorepangre pengro tchoredo koowa khatrenn? Mishto, palle dikau me kowa ninna jaake, penell o baro Dewel.

¹²Djan pash ko foro Shilo, kai glan rah tsiro miro kheer tardo his. Un dikenn, hoi me kote krom doleske, kai mire menshe Israel tchilatchepen kran.

¹³Tumer kran ninna lauter sawo koowa, penell o baro Dewel. Un me rakrom pale te pale tumentsa, un tumer kaman gar te shunell. Un me dom tumen gole, un tumer penan koi pre tchi.

¹⁴Doleske krau me kau khereha, har me ko foreha Shilo krom, ninna te was kau kheer mange kerdo, un tumer patsenn, kote nai djal tumenge tchi. Me krau koi platsa paash, hoi dom tumen un tumare phuren.

¹⁵Un me tradau tumen mandar krik, har me tumare phralen krik tradom, un kol tsele menshen dran Efrajim.

¹⁶Tu, Jeremia, mangess gar un rowess gar glan mande kal menshenge, witar gar peness mange, hoi len ap o dji hi, un hoi len hunte well, un stakress lenge pash mande witar gar dren. Me kamau tumen gar an-shunell.

¹⁷Dikeh tu gar, hoi jon krenna an kol forja an Juda un ap kol dromma an Jerusalem?

¹⁸Kol tchawe rodenn kasht, kol dada krenn jag, i djuwja krenn merklia koi bolepaskri rajetsake. Un kol wawar deblenge anenn jon pipaske, te choirap me man koi pral.

¹⁹Mange krenn jon koweha kek duka, penell o baro Dewel. Ap pende kokres anenn le ladj.

²⁰Doleske penell o baro Dewel, maro rai: Miri bari choli well pral kau foro, pral i menshende un pral i viechende, pral kol ruka an o weesh un pral ko djob an kau them. Miri choli hi har i jag, hoi kek nai krell win.

²¹Kowa penell o baro Dewel, ko rai pral o bolepen un i phub, kai hi o Israeleskro Dewel: Hoske chatchrenn tumer viechen mange? Tchiwenn len pash kol wawarende, hoi chan tumer khetne glan mande! Chan ko tselo mass!

²²Ap ko diwes, har anom tumare phuren dran o them Egiptia, penom lenge gar, te anenn jon mange viechen chatchepaske, witar kek, hoi hunte chan le glan mande.

²³Me penom lenge: Shunenn ap miro lab, palle kamau me tumaro Dewel te well, un tumer han mire menshe. Djan ap ko drom, kai me tumenge penom, palle djal tumenge mishto.

²⁴Jon shunan gar ap mande, un lengre kanda pandan le, un djiwan pal lengro shero, un kran hoi lengro tchilatcho dji penella, un sikran mande pengro dumo, un gar pengro mui.

²⁵Fun ko diwes, har me tumare phuren dran Egiptia anom bis kai diwes, bitchrom pale te pale mire budepangren pash tumende, kol rakepangren, kai mire laba dureder penan.

²⁶Tumer shunan gar ap mande, un dan kek garda ap mire laba. Tumer djan pal tumaro shero, un kran budeder tchilatchepen har tumare phure.

²⁷Te peneh tu, Jeremia, lenge kowa lauter, shunenn jon gar ap tute. Te deh tu len gole, penenn jon tchi koi pre.

²⁸Doleske pen ap lende: tumer han kal menshe, kai shunan gar ap lengro baro Debleste. Un tumer mukenn tumen tchi te penell. O tchatchepen hi mulo. Kek rakrell buder pral o tchatchepen.

²⁹Tchin tire lengste balla tele, un witse len tutar krik! Gib i ropaskri gili ap i berge! O baro Dewel hi chojedo pral kal menshende, un tradell len pendar krik, un kamell lendar tchi te djinell.

³⁰Kol menshe an o them Juda krenn, hoi mange djungeles hi, penell o baro Dewel. Jon tchiwan kol djungele deblen an kau kheer, hoi mange kerdo was, un kran les pale-tchiddo.

³¹Un kran an koi tala Ben Hinnom i chatchepaskri, hoi kharell Tofet, te chatchrenn jon pengre tchawen un tchen. Sawo koowa penom me lenge gar. Un kowa was mange gar an o shero.

³²“Doleske well ko tsiro”, penell o baro Dewel, “kai penenn le gar buder Tofet un Ben Hinnom ap koi tala. Palle kharell koi tala ‘tala, kai wan le maredo’. Kote paskrenn le pengre mulen, kek wawar platsa hi buder koi.

³³Tchirkle un diwje vieche chan kol mule menshen pre, un kek tradell len krik.

³⁴Un o them Juda well i mulo them. An lengre forja un ap kol dromma an Jerusalem giwell un sal kek buder i bachtjatar. Un koi bachteli gole o pirnestar un i pirnjatar shunah mer buder gar.”