Read O Debleskro Drom - I Bibla an o Romano Rakepen 2021 Jeremia 9 Bible Online

Jeremia 9 - O Debleskro Drom - I Bibla an o Romano Rakepen 2021 bible

Jeremia 9

¹Te wals man an o mulo tato them i kheer, kai nai atchau, mukoms me mire menshen, un djoms mange. Jon lauter hi har romma, kai mukan pengre romjen beshdo. Jaake mukan kal phukepangre o baro Debles.

²Lengri tchip hi har i tchuri. Lengro chochepah wan le soreles an o them. O tchatchepen rakrenn le gar. Jek tchilatcho koowa pal o wawar krenn le. Man prindjrenn jon gar, penell o baro Dewel.

³Hakeno mu dell pes garda peskro malestar, un ninna peskro phralestar! Jek phraal dell kol wawar phrales pral i kanda. Un i maal rakrell djungeles pral o wawareste.

⁴Jon lauter chochenn pengre malen. Un kek rakrell laba, hoi tchatcho hi. Jon penan pengre tchipja, te rakrenn le chochepen. Pale te pale krenn le tchilatchepen ap i wawarende,

⁵Un mukenn gar tele, te rikrenn le i wawaren tele, un te chochenn le len. Man kamenn le gar te prindjrell, penell o baro Dewel.

⁶Doleske penell o baro Dewel, ko rai pral o bolepen un i phub: Har o rup an i jag djudjes kerdo well, jaake kamau mire menshen dukentsa djudjes te krell. Dell tchi wawares, hoi krap me nai mire menshenge.

⁷Lengro rakepen hi har faile, hoi anenn o merepen. Peskro mujeha rakrell hakeno kamles, an o dji lurell job, har te taprell lo o wawares.

⁸Dap me sawe menshen kek phagi, penell o baro Dewel. Mukap me kal menshen jaake te djal, un krap lenge tchi?

⁹Me kamau pral kau them an i berge rowell, un pral ko senelo pralstuno them i ropaskri gili te giwell. Lauter hi pre-chatchedo. Kek mensho djal koi trujel. Kek grumja un bakre denn kote gole. Ninna kol tchirkle un i diwje vieche nashan penge, un mukenn pen buder gar te dikell.

¹⁰O baro Dewel penell: Me kamau Jerusalem tele te phagell, jaake te atchenn kokres barra pral, un kai diwje djukle dren djiwenna. Un dran kol forja an Juda krau i mulo them, kai nai djiwell kek buder dren.

¹¹Me putchom: Baro Dewel, hoske chatchell ko them un well mulo, jaake kai nai djal kek buder koi trujel? Koon hi gosewo un haiwell kowa? Ap koneste penal tu kowa, jaake te penell job kowa i wawarenge?

¹²O baro Dewel penell koi pre: Me sikrom len miro drom, un jon mukan les, un shunan gar ap mire laba, un djiwan gar koi pal.

¹³Jon kran, hoi lengre tchilatche djia lenge penan, un djan o debleske Baal palla, jaake har lengre phure lende sikran.

¹⁴Doleske penell o baro Dewel, ko rai pral o bolepen un i phub, kai o Israeleskro Dewel hi: Me dau kal menshen shutlo senlepen chapaske, un pani, kolestar merenn le.

¹⁵Me tradau len krik pash menshende, kai prindjrenn jon gar, witar gar lengre phure, un kamau o charo pal lende bitchrell, bis te jon lauter mulo hi.

¹⁶O baro Dewel, ko rai pral o bolepen un i phub, penell: Denn garda ap kowa, hoi wella! Denn kol djuwjen gole, kai i baro ropen krenna! Bitchrenn pal kolende, kai haiwenn ropaskre gilja te giwenn!

¹⁷Pen lenge, te wenn jon sik, un giwenn i ropaskri gili pral mende, te nashenn i swa dran mare jaka, un mare jaka sapeno hi i ropastar.

¹⁸Shunenn, o ropen well shunlo an o foro Zion: Ach, har djan jon sorjah ap mende! I ladj was ap mende! Mer hunte djas dran kau them. Mare khera chatchran jon tele.

¹⁹Shunenn, tumer djuwja, o baro Debleskro rakepen! Denn garda ap leskre laba! Sikrenn tumare tchende, har te giwenn le koi ropaskri gili; jek te anell i wawarat kai gili pashel:

²⁰An mare khera was o merepen, an i wochja djas lo dren. I tchawe ap i dromma meran, un i terne mursha hi mulo tchiddo ap i platse.

²¹O baro Dewel penell: Kol mule menshe atchenn tchiddo har ful ap i hachetikri phub, har o djob, hoi tchinlo was, un tchiddo atchas pal o tchinepaskro, un kek las les khetne.

²²I gosewo te sharell pes gar, kai job gosewo hi. I sorelo te sharell pes gar, kai job sorelo hi. I brawelo te sharell pes gar, kai job brawelo hi.

²³Koon kamell pes te sharell, kowa te sharell pes, kai job prindjrell man, un te haiwell job, kai me o baro Dewel hom. Me krau miro dji pre i menshenge, un krau, hoi tchatcho un mishto hi ap i phub. Sawo koowa hi mishto glan mire jaka. Kowa penau me, o baro Dewel.

²⁴Shunenn, penell o baro Dewel, ko tsiro well, kai dau hakenes i phagi, kai tchinlo hi ap peskro mass, un djiwell, har te wals lo gar tchinlo:

²⁵kol menshe an i themma Egiptia, Juda, Edom, Ammon un Moab, un lauter kolla, kai tchinenn pengre balla trujel tele, un djiwenn an o mulo tato them. Ninna te hi jon un i tsele Israelitarja tchinlo ap pengro mass, djiwenn le, har te wans le gar tchinlo.