Read O Debleskro Drom - I Bibla an o Romano Rakepen 2021 Ropaskre gilja 1 Bible Online

Ropaskre gilja 1 - O Debleskro Drom - I Bibla an o Romano Rakepen 2021 bible

Ropaskre gilja 1

¹Jerusalem, har muklo hal koi tchiddo, tu, kai hals pherde menshe! An-diklo hals pash i tsele themma. Kanna hal kokres har i romni, kolakro rom meras. I rajetsa hals pral wawar themma. Kanna hunte budress i wawarenge.

²An i rati roweh, un tire swa nashenn tuke i tchamja tele. Kek tire tsele pirnendar well, un penell tuke i kamlo lab. Tire tsele mala mukan tut, un wan tchilatches ap tute.

³I menshe dran Juda hi pandle budepangre, hunte budrenn tel dawa, un djiwenn an wawar themma. Ninna kote hunte well len daar. Halauter, kai len palla lenn, wenna un rikrenn pengro wast ap lengri meen.

⁴I dromma pash i berga Zion hi muklo. Kek well an o foro an kol bare diwessa. I tsele foreskre wudja hi pre, i rashajenge hi ropaske, i terne tcha rowenna. Har pharo hi kowa lauter o foreske!

⁵Kolla, kai kamenn o foreske tchilatchepen te krell, len hi kanna penepaske pral leste, un lenge djal mishto. O baro Dewel anas koi bibacht pral o foro te dell lo les i phagi leskri bud doshake. Un kolla, kai lan o foro dren, lan i tchawen pandles, un tradan len glan pende win dran o them.

⁶O foro Zion nashras peskro tselo shukapen! Leskre pralstune hi har tserfe[1], kai hatsenn kek senlepen. Un wi-bokedo hi len kek soor, te nashenn le penge glan kolende, kai len palla lenn.

⁷An kau tsiro, kai i menshenge dran Jerusalem djungeles djal, un jon kate te kote tradedo hi, well lenge ko bud latcho koowa an o shero, hoi len an o phuro tsiro his. Har jon an i wasta kol tchilatchendar peran, was lenge kek ap i rig. Kol wawar menshe dikan ap lende tele, un san, har o foro tele djas.

⁸Jerusalem anas doosh ap peste, doleske hi kau foro har i chatchedi djuwel. Halauter, kai hadan lat an o bolepen, praassenn lat kanna. Jon dikenn, har nango joi hi. Joi rowella un khatrell peskro mui.

⁹Lakro ripen hi pherdo tchik. Un joi patsas gar kai lake jaake djala. Dur tele peras li, un kek hi lake koi, kai penell lake i kamlo lab. “Dik, baro Dewel, har djungeles mange djala, un kolla, kai man khetne dan, krenn pen bares.”

¹⁰Un jon tchiwan pengre wasta ap lakro tselo kutch koowa. Joi hunte dikas peske jakentsa, har i wawar menshe an lakro Debleskro kheer dren djan. Un tu, baro Dewel, penal, te hunte djan jon gar kote dren.

¹¹I menshe an Jerusalem rowenna un rodenn pal maro. Lengro kutch koowa denn le koi, te well len chapaske, te hunte merenn le gar. Jerusalem rowell: “Ach baro Dewel, kre tire jaka pre, un dik, har i menshe tele dikenn ap mande!”

¹²Tumenge halauterenge, kai nashenn kate ap o drom, penau: Hadenn tumare jaka un dikenn! Hi jek dukepen har miro dukepen, hoi pral mande was? O baro Dewel anas les pral mande ap ko diwes, kai leskri soreli choli pral mande was.

¹³Job bitchras i jag dran o bolepen an mire kokale, hoi an mande chatchell. Job tchiwas i netsa win, te taprenn pen mire pire dren, un mukas man ap o dumo te perell. Job mukas man kokres tchiddo. O tselo tsiro hom nasselo.

¹⁴Ko bud tchilatcho koowa, hoi krom, hi phares ap mande tchiddo. O baro Dewel tchiwas les ap mire phika. Un me phagom khetne tel kowa. O baro Dewel das man an i wasta kolendar, kai nai wau kokres buder gar win.

¹⁵O baro Dewel stakras mire sorele kurepangren khetne, kai pash mande his; Job mukas i marepaskro chapen[2] win te kharell, te nai wenn mare terne mursha maredo. Jaake har drake khetne stakedo wenn, te well i mool win, stakras lo i menshen dran Juda khetne.

¹⁶Doleske rowau, un mire jaka hi pherde swa. Man hi kek, kai penell mange latche laba, te lell miro dji pale newi soor. Mire tchawe hi kokres koi tardo, Kolla, kai dan men khetne, wan i sorleder.

¹⁷O foro Jerusalem hi har i djuwel, kai rikrell peskre wasta dur pre, un kek hi koi, kai lake ap i rig well. O baro Dewel kharas haki rigjatar kolen khetne, kai kurenn pen o Jakobeskre tchawentsa. O foro Jerusalem hi lenge har i chatchedi djuwel, ap kolate jon tele dikenn.

¹⁸O baro Debles his tchatcho, har das lo man i phagi. Me shunom gar ap leskro lab. Shunenn, tumer menshe an wawar themma, un dikenn, har baro miri duk hi! Mire terne tcha un terne tchawe wan pandles krik lino.

¹⁹Me kharom mire pirnen, un jon mukan man kokres. Mire rashaja un i phureder meran an o foro, har dikan le pal i kotar maro, te nai rikrenn le pen djido.

²⁰Ach, baro Dewel, dik, har bud traash man hi, har i duk an mande chatchella! Miro dji rissrell pes an mande! Hoske shunom gar ap tute? Glan o kheer tapras o charo mire tchawen, un an o kheer meran le dran i djungelo nasslepen[3].

²¹I menshe shunan, har dau phares ducho, un kek well, te penell lo mange latche laba. Kolla, kai hi chojedo ap mande, shunan miri bibachtjatar, un sanan, te kral tu kowa mantsa. Muk ko diwes te well, kolestar rakral, te djal lenge har mange kanna.

²²Muk lengro tselo tchilatchepen glan tute te well! Kre lentsa har mantsa kral, har dal mange miri phagi miro tselo tchilatchepaske! O tselo tsiro dau phares ducho, un miro dji rowell.