Read O Debleskro Drom - I Bibla an o Romano Rakepen 2021 Ropaskre gilja 3 Bible Online

Ropaskre gilja 3 - O Debleskro Drom - I Bibla an o Romano Rakepen 2021 bible

Ropaskre gilja 3

¹Me hom ko mursh, koon djinell, har kowa hi, te dell o baro Dewel dawa an peskri choli.

²Man anas lo dureder un dureder an i kali rati, un kek momeli his koi.

³Kokres ap mande hadas lo peskro wast o tselo diwes.

⁴Job kras miro mass un miri hauta phures, un mire kokale phagas lo an mande khetne.

⁵Haki rigjatar pandas lo man dren, duka un daar hi trul mande.

⁶An kali rati mukell lo man te djiwell, har kolla, kai meran glan i rah tsiro.

⁷Job tchiwas i massuri trul mande, te nai wau gar win, un tchiwas sasterne shelle trul mire pire.

⁸Ninna te dau gole un mangau les, kamell lo miro mangepen gar te shunell.

⁹Ap miro drom tchiwas lo bare barra. Kai me ninna djau, wau gar dureder.

¹⁰Job luras mange pre, har te wals lo i tchilatcho diwjo viecho, un har i lewo an peskro khatepen.

¹¹Job tserdas man tele o dromestar, dandras man an kotja, un mukas man tchiddo.

¹²Job tserdas peskro bogo pre, te dell lo karje ap mande.

¹³Job das peskre faile an mire buke karje.

¹⁴I sapen hom mire tsele menshenge. I sapaskri gili hom lenge o tselo diwes.

¹⁵Shutlo[6] senlepen das lo man chapaske, un shutlo pipen te pijell.

¹⁶Job stakras man an i tchik, te dandrap ap barra.

¹⁷Me bistrom, hoi i latcho djipen hi. Un djinau buder gar, hoi bacht hi.

¹⁸Kote penom mange: Me nai djiwau buder gar, un nai patsau buder gar, te well o baro Dewel ap miri rig.

¹⁹Te dikau, har djungeles mange djal, un har muklo hom, hi kowa mange har i shutlo pipen, hoi nasselo krell.

²⁰An miro shero djal kowa halauter trujel, un miro dji hi tele rikedo.

²¹Jek koowa bistrau gar — ap kowa rikrau soreles:

²²O baro Debleskro latchepen herell gar pre, leskro kamlepen hi hako tsiro menge koi.

²³Haki tsalla hi menge leskro kamlepen un latchepen newes koi. Kowa hi jaake tchatcho, har o kham pre djal!

²⁴Me penau mange: O baro Dewel hi halauter, hoi man hunte well; doleske dikau ap leste.

²⁵Latches hi o baro Dewel koleske, kai dikell ap leste, un rodell les o tselo djijestar.

²⁶O feteder koowa hi, te dikas mer pokones[7] ap o baro Debleste, te well job menge ap i rig.

²⁷Mishto hi i mensheske, te hidjrell lo, hoi o Dewel leske bitchras, jaake rah har lo terno hi.

²⁸Te tchiwell o Dewel i pharepen ap leste, mu beshell lo pes kokres un rakrell gar.

²⁹Peskro mui mu tchiwell lo tele an i tchik, Nai well i tsiro, kai djal leske pale feteder.

³⁰Te lell lo i tchamedini, mu te rikrell lo peskri tcham koleske koi, kai dell les. Mu rikrell lo o praassepen win!

³¹O baro Dewel mukell men gar hako tsireske.

³²Ninna te dukell lo jekes, well lo leske pale kamles. Jaake baro hi leskro latchepen.

³³Job hi gar bachtelo, te dell lo i menshes peskri phagi, un anell o ropen pral leste.

³⁴Tchatchepah, o baro Dewel dikell, te wenn i tsele pandle an i them khetne stakedo. Les, o Debles pral halauter, hi glan i jaka, te well i mensheske peskro tchatchepen krik lino, un pral i mensheskro koowa chochepen pre anlo well.

³⁵

³⁶

³⁷Koon hi kowa, kai penas ‘Kowa te well’ un jaake was. Hi kowa gar o Dewel, kai penell, te well tchomone?

³⁸Kowa hi o Dewel pral halauter, kai penell, te well i bibacht un ninna i bacht.

³⁹Har nai penell i mensho i ropah: “O Dewel djal gar mishto mantsa trujel.” Wals feteder te rowals lo pral peskri doosh!

⁴⁰Dikas ap maro djipen, har mer djiwah, un rissras trujel pash o baro Debleste.

⁴¹Hadas mare djia, ninna mare wasta pre o Debleske an o bolepen!

⁴²Mer anam doosh pral mende kokres, un shunam gar ap tute. Kowa bistral tu menge gar.

⁴³Tu tchakral tut an tiri choli, un lal men palla, un maral men. Un tut khaitam mer gar.

⁴⁴Tu khatral tut an i wolka, te nai well maro mangepen gar glan tute.

⁴⁵Tu kral, te wam har tchik un fulepen i menshenge an i wawar themma.

⁴⁶Halauter, kai chojedo ap mende hi, praassenn men.

⁴⁷Traash un daar was ap mende. Trul mende phagell un perell halauter khetne.

⁴⁸I swa nashenn dran mire jaka tele, te dikau har djungeles mire menshenge djal.

⁴⁹Mire swa nashenn un nashenna, un me nai mukau gar tele miro ropah,

⁵⁰bis te dikell o baro Dewel dran o bolepen tele, un lell men pale an o jak.

⁵¹Mire jaka dukenna, te dikau, har i djuwjenge an miro foro djala.

⁵²Kolenge tchi krom, kolla lan man palla, har te woms i tchirklo.

⁵³Jon witsran man djides an i brunna, un witsran barra ap mande.

⁵⁴Pani djas pral miro shero; kote penom: Kanna hom nashedo.

⁵⁵Baro Dewel, tiro lab dom gole, dur tele dran i phub shunal miri gole:

⁵⁶“Ma khate tire kanda glan miro ropen un glan mire golja!”

⁵⁷Har kharom tut goljah, wal tu pash mande, un penal: “Ma traash buder gar!”

⁵⁸Miro rai, tu lal miro koowa an tiro wast, un lal miro djipen dran o merepen.

⁵⁹Baro Dewel, tu dikeh, har mange tchilatchepen kerdo wella! De tu mange miro tchatchepen!

⁶⁰Tu dikeh, har jon kamenn man tchilatchepen pale te dell, un tu prindjreh, hoi an lengro shero trujel djala, un hoi kamenn le mantsa te krell.

⁶¹Baro Dewel, tu shuneh lengro praassepen, un halauter, hoi le khetne rakrenna, te krenn le mantsa.

⁶²Tu shunal o rakepen kolendar, kai hadenn pen ap mande, un hoi le pal o wast pral mande rakrenna o tselo diwes.

⁶³Dik koi: Te hi le beshdo, un te hi le tardo, giwenn le sapaskre gilja pral mande.

⁶⁴De lenge les pale, baro Dewel, har jon mantsa kran!

⁶⁵Kre lengre djia har i barra, un tchip tiro praassepen ap lende!

⁶⁶Le len palla tiri tseli choljah, te atchell kek lendar djido ap kai phub!