Read O Debleskro Drom - I Bibla an o Romano Rakepen 2021 Ropaskre gilja 4 Bible Online

Ropaskre gilja 4 - O Debleskro Drom - I Bibla an o Romano Rakepen 2021 bible

Ropaskre gilja 4

¹Har was o sonakai jaake kalo, un o latcho sonakai jaake djungelo! Har nai wan i kutch barra trujel tchiddo ap i dromma!

²I terne mursha dran o foro Zion, — kutch har o latcheder sonakai his le menge — kanna hi le gar budeder moldo har pirja, hoi kerdo wan dran tchik!

³Ninna diwje djukle denn pengre tchawen i tchutchi. I daja mank mire menshende sikrenn kek dji pengre tchawenge. Har kol bare diwje kachja[8] an o mulo them hi le, hoi mukenn pengre jare.

⁴I tikne tchawen hi jaake trush, te well lengri tchip truk an o mui. I tchawe mangenna i kotar maro, un kek hi koi, te dell lo lenge i kotar.

⁵Kolla, kai bud latcho chapen chajan, merenn kanna i bokatar win ap i dromma. Kolla, kai ap kutch pernitse hidjedo wan, hi kanna an i khandli tchik tchiddo.

⁶Koi doosh, hoi mire menshe ap pende anan, hi bareder har koi doosh, hoi anan i menshe an o foro Sodom pral pende. Kolengro foro djas sik tele, un kek wast was lenge ap i rig.

⁷I pralstune pral Zion his djudjeder har gib, un parneder har thud. Jon his sasto un sorelo, un shukar har i kutch blaueto bar.

⁸Kanna hi lengre sherja kalo har jagakri tchik. Kek prindjrell len buder ap o drom. Lengri hauta tserdas pes khetne ap lengre kokale, un hi truk har i kotar kasht.

⁹Kolenge, kai o chareha maredo wan, djas feteder har kolenge, kai meran i bokatar. Har kek djob buder bares was, phagan le khetne i bokatar, bis te meran le.

¹⁰I bibacht, hoi was ap mire menshende, was jaake baro, te keran i djuwja pengre tchawen, — kol djuwja, kolengro dji pherdo kamlepen his — te nai was len tchomone te chal.

¹¹O baro Dewel mukas peskri tseli choli win te well. Leskri tseli choli was pral lende. Un an o foro Zion mukas lo i bari jag te well, te chatchras o foro tele bis ap i telstune barra.

¹²Kanna was, hoi i bare raja pral i themma gar patsans, witar gar i tsele menshe ap kai phub: Lurde dran wawar themma, kai kaman maro them dren te lell, djan an i wudja o forestar Jerusalem dren.

¹³Kowa was pral o foro koi doshake, hoi o Debleskre rakepangre un i rashaja ap pende anan. Jon mukan kote sawe menshen te marell, kai kek tchilatchepen kran.

¹⁴Jon[9] nashran pen an i dromma har korele, un rat his ap lengre koola, te kamas kek len an te taprell.

¹⁵“Djan tumenge, tumer pale-tchidde”, dan le lenge gole. “Djan tumenge, djan tumenge! Ma taprenn ap tchomone!” Jaake nashan le penge, un djinan gar, kai te djan. An i wawar themma was lenge penlo: “Pash mende nai atchenn gar!”

¹⁶O baro Dewel kamell len buder gar te dikell. Job hi kowa, kai tradas len kate te kote. Ap kol rashajende dikas buder kek pre, un i phurentsa djan le gar kamles trujel.

¹⁷Pale te pale dikan mare jaka pen trujel pal jekeste, kai menge ap i rig well. Un kek was. Ko them, ap koleste dikam, nai las men gar dran i bibacht win.

¹⁸Jon lan men palla, te nai nasham buder gar ap mare dromma. Mentsa hi trujel. Mer ham nashedo. Maro djipen hi trujel.

¹⁹Kolla, kai men palla lan, his sikeder har i adlarja tel o bolepen. Ap o pralstuno them lan le men palla, un an o mulo them luran le menge pre.

²⁰Maro rajes, koles o baro Dewel win rodas, lan le pandlo. Job his kowa, kolestar maro djipen was, un lestar patsam, te rikrell lo peskro wast pral mende, te nai krenn men i wawar themma tchi.

²¹Awa, san tumenge un khelenn, tumer Edomarja an o them Uz! Pash tumende well ninna ko khoro pherdo o Debleskri choli, hoi hunte pijenn, bis te wenn mato un riwenn tumen win.

²²Tumer an o foro Zion, palle hi tumari doosh tumendar krik lino! O baro Dewel mukell tumen buder gar pandles krik te anell. Palle anell job tumari doosh, tumer Edomarja, ap tumare sherja pale, un tchakrell ko tchilatcho koowa pre, hoi kran.