Read O Debleskro Drom - I Bibla an o Romano Rakepen 2021 Hesekijel 1 Bible Online

Hesekijel 1 - O Debleskro Drom - I Bibla an o Romano Rakepen 2021 bible

Hesekijel 1

¹An o 30. (triin-deshto) bersh djiwom khetne wawar menshentsa, kai pandles krik anlo wan, pash ko lengsto pani, hoi kharell Kebar. An o starto tchon ap o pantchto diwes an ko bersh djas o bolepen pre, un o baro Dewel sikras pes mande.

²Kowa his o pantchto bersh, har was o baro rai Jojachin pandles krik anlo an o them Babilonia.

³Kote an o them Babilonia pash o lengsto pani Kebar rakras o baro Dewel ap mande, un leskri soor was pral mande. Me hom o Hesekijel. Miro dad hi o rashai, o Busi.

⁴Un me dikom i baro sorelo phurdepen, hoi was fun kotar kai norden hi, un tradas i bari wolka glan peste. Un jag was win, hoi pre un tele djas. Un o bolepen koi trujel his shukar har o kham. Un mashkral dren his tchomone, hoi dikas win har sonakai, hoi an i jag thodo well.

⁵Un kote dren dikom star bolepangre, hoi win dikan har menshe.

⁶Hakenes lendar his star tchirklengre mussja un i shero, kai ap hake star rigja i mui un jaka his.

⁷Jon his tardo har menshe. Un lengre pire his har grumjengre pire. Kolla his har lolo saster, hoi an i jag thodo well.

⁸Ap lengre star rigja his len menshengre wasta tel lengre tchirklengre mussja, tel haki tchirklengri mussi jek wast. Hakenes kol starendar his jaka un i mui ap hake star rigja leskro sherestar. Un hakenes his star tchirklengre mussja.

⁹Kolentsa tapras jek ap o wawareste. Jon djan khetne ap hake rigja, un hunte rissran pen gar. Hakeno dikas glan peste.

¹⁰Pash hakeneste kol starendar dikas o shero ap i glanstuni rig win har i mensheskro shero, ap i tchatchi rig har i leweskro shero, ap i serwi rig har i gurumeskro shero, un ap i palstuni rig har o shero fun i adlari.

¹¹Dui lengre tchirklengre mussja his buchles rikedo un pre hadedo. Un i mussi jekestar tapras koi mussi ko wawarestar. Kol dui wawar tchirklengre mussjentsa tchakran le pen.

¹²Hakenes his jaka ap hake star rigja. Jaake djan le hako kopo khetne kote, kai kaman le. Jon rissran pen gar trujel.

¹³Mashkral kol star bolepangre his tchomone, hoi dikas win har kasht, hoi loles chatchell, un har lengste kashta, hoi loles chatchenna un jek rigjatar ap i wawar mank kol bolepangre nashenn. Un koi jag his lolo, un dran late das jag karje win.

¹⁴Kol bolepangre nashan sik jek rigjatar ap i wawar, te dikas kowa win, har te dell jag karje ap o bolepen.

¹⁵Un har dikom ap kol bolepangre, dikom star rade ap i phub, jek rada glan hakeneste lendar.

¹⁶Kol rade dikan senelo win har i kutch senelo bar[1]. Jek rada dikas win har koi wawar. Un jon his jaake kerdo, te djas jek rada an i wawar dren.

¹⁷Te djan le, nai djan le ap hake star rigja, un jon rissran pen gar trujel.

¹⁸Un kol rade his baro un kran daar. Ap lende his jaka trul lende trujel, un kowa pash hake starende.

¹⁹Te djan kol star bolepangre, palle djan ninna kol rade ap lengri rig pentsa. Un te hadan pen kol bolepangre pre i phubjatar, hadan pen kol rade ninna.

²⁰Kote kai kaman le te djal, kote djan le. Un kol rade hadan pen lentsa. I rade kran, hoi i bolepangre kaman.

²¹Te djan le, djan kol rade ninna. Te atchan le tardo, atchan kol rade ninna tardo. Un te hadan le pen pre i phubjatar, hadan pen i rade ninna pre. I rade kran, hoi i bolepangre kaman.

²²Pral i sherja fun kol bolepangre his tchomone har i bolepen dran kristallo. Kek nai dikas koi dren, te kamals lo gar korelo te well.

²³Tel kowa his i bolepangre. Hakeno lendar rikras peskre dui tchirklengre mussja jaake win, te tapras lo o wawares ap peskri rig. Kol dui wawar tchirklengre mussjentsa tchakran le pen.

²⁴Har djan le, dan lengre tchirklengre mussja jaake bari gole, har i sorele panja gole denn. Koi gole his har i gole o sorelo Deblestar, un har koi gole kote, kai bud menshe khetne hi, un har koi gole, hoi bud lurde denn, kai djan an o kurepen. Un te atchan i bolepangre tardo, palle mukan le pengre tchirklengre mussja tele te djal. Un me shunom i bari gole, hoi was dran o bolepen pral lende.

²⁶Pral o bolepen, hoi pral lengre sherja his, his tchomone, hoi win dikas har i rajeskri beshepaskri dran kutch blaueto bar. Un ap koleste his jek beshdo, kowa dikas win dikas har i mensho.

²⁷Un leskro shero un leskro betch dikan win har o sonakai, kai o kham pre perell. Un trul kowa trujel his jagakre tchipja. Un o telstuno kotar, kowa hoi win dikas har leskre herja, his har jag. Un trul leste his shukar,

²⁸har i brishineskro bogo, hoi well diklo ap o bolepen pal i brishin. Jaake sikras pes o baro Dewel an peskro railepen mange. Un har les dikom, mukom man glan leste ap i phub te perell. Un me shunom jekes, kai rakras.