Read O Debleskro Drom - I Bibla an o Romano Rakepen 2021 Hesekijel 10 Bible Online

Hesekijel 10 - O Debleskro Drom - I Bibla an o Romano Rakepen 2021 bible

Hesekijel 10

¹Un me dikom ap ko bolepen, hoi his pral i sherja fun i bolepangre, un dikom tchomone jaake blaueto har ko kutch blaueto bar, hoi kharell Safiro. Kowa dikas win har i rajeskri beshepaskri.

²Un o baro Dewel penas ap ko mursheste, kai his rido an laintikro than: Dja mashkral kol rade tel i bolepangre, un le tire wasta pherdo jagengro kasht, hoi chatchell, un mashkral kol bolepangre hi. Un witse les pral o foro win. Un ko mursh djas glan mire jaka mank kol rade.

³Un har lo kote dren djas, his kol bolepangre tardo ap i tchatchi rig o Debleskro kherestar. Un i wolka kras koi tikni platsa glan o Debleskro kheer pherdo.

⁴Un o baro Debleskro railepen, hoi his pral kol bolepangren, hadas pes fun kotar, un djas pash o kheer, kote kai o wudar hi. Un o tselo kheer was pherdo fun koi wolka, un i glanstuni platsa his pherdo o baro Debleskro railepen.

⁵Un kol tchirklengre mussja fun kol bolepangre kran jaake bari gole, har te rakrell o sorelo Dewel. Un me shunom lat ninna an koi bari glanstuni platsa.

⁶Un har penas o baro Dewel ko mursheske, kai his rido an laintikro than, te djal lo mank i rade un mank i bolepangre, te lell lo jag, djas ko mursh mank lende un atchas tardo pash jek rada.

⁷Kote tchiwas jek kol bolepangrendar peskro wast win, un las koi jagatar, hoi mashkral kol bolepangre his, un das lat an i wasta ko murshestar, kai his rido an laintikro than. Un kowa las koi jag un djas win.

⁸Un tel lengre tchirklengre mussja his i bolepangren tchomone har win dikas har i mensheskre wasta.

⁹Un me dikom star rade tardo pash i bolepangre, pash hako bolepaskro his jek rada. Un kol rade dikan senelo win har i kutch senelo bar.

¹⁰Jek rada dikas win har i wawar. Un jon his jaake kerdo, har te well jek rada an i wawar dren.

¹¹Te djan le, nai djan le ap hake star rigja. Un jon rissran pen gar trujel. Kote, kai i glanstuni djas, ap koi rig djan i wawar ninna. Un jon rissran pen gar trujel.

¹²Un halauter lendar, o dumo, i wasta, i tchirklengre mussja un lengre rade his pherde jaka ap haki rig. Un hakenes his peskri rada.

¹³Un me shunom, har wan i rade kharedo ‘tradede rade’.

¹⁴Un hakenes kol bolepangrendar his i shero, kai his ap hake star rigja jaka un i mui. Ap i glanstuni rig dikas lo win har i bolepaskro, ap i duiti rig har i mensho, ap i triinti rig har i lewo, ap i starti rig har i adlari.

¹⁵Un kol bolepangre hadan pen. Kolla his kol emlige bolepangre har dikom, har homs pash o lengsto pani Kebar.

¹⁶Te djan kol bolepangre, palle djan ninna kol rade pentsa. Un te kran le pengre tchirklengre mussja pre un buchlo, te hadenn le pen pre i phubjatar, palle atchan ninna i rade ap lengri rig.

¹⁷Te atchan jon tardo, palle atchan jon ninna tardo. Un te hadan le pen pre i phubjatar, hadan jon pen ninna. I rade kran, hoi i bolepangre kaman.

¹⁸Un o baro Debleskro railepen, hoi his pash o wudar o kherestar, djas pale krik un hadas pes pral kol bolepangre.

¹⁹Un kol bolepangre kran pengre tchirklengre mussja buchlo, un hadan pen pre i phubjatar glan mire jaka. Un har djan le win, his kol rade ap lengre rigja. Un i bolepangre tchiwan pen pash ko wudar o baro Debleskro kherestar, hoi ap koi rig hi, kai o kham pre djal. Un o railepen o Israeleskro Deblestar his pral lende.

²⁰Kolla his kol bolepangre, hoi dikom me tel o Israeleskro Debleste, har homs pash ko lengsto pani Kebar. Un me haiwom, te his kolla Cherubim[18].

²¹Hakenes lendar his jaka un i mui ap hake star rigja leskro sherestar. Un hakenes his star tchirklengre mussja, un tel kol tchirklengre mussja har wals len menshengre wasta.

²²Un lengre sherja his jaake har dikom me len, har homs pash ko pani Kebar. Un jon djan khetne ap hake rigja, har kaman le. Hakeno dikas glan peste.