Read O Debleskro Drom - I Bibla an o Romano Rakepen 2021 Hesekijel 11 Bible Online

Hesekijel 11 - O Debleskro Drom - I Bibla an o Romano Rakepen 2021 bible

Hesekijel 11

¹Un o ducho hadas man pre un anas man glan o baro Debleskro kheer, pash ko baro wudar, hoi kote hi, kai o kham pre djala. Un glan ko baro wudar his 25 (biish-te-pantch) mursha. Un me dikom mashkral lende o Jaasanja, koleskro dad o Assur his, un o Pelatja, koleskro dad o Benaja his. Kolla his pralstune pral i menshende.

²Un o baro Dewel penas ap mande: Tu, mensho, kalla hi kol mursha, kolen tchilatchepen glan hi. Te putchenn i menshe an o foro lendar: “Hoi hunte kras mer?” Palle penenn le lenge sawo koowa, hoi anell len an i bibacht.

³Jon penenn: “Hi gar o tsiro koi, te kras menge khera? O foro hi har i piri, un mer ham har o mass, hoi dren hi. Menge djal tchi.”

⁴Doleske peness tu, mensho, lenge, hoi mukau me, o Dewel, ap lende te well!

⁵Un o ducho o baro Deblestar was ap mande, un penas ap mande: Pen i menshenge an Israel: Kawa penell o baro Dewel: Djinau tumaro rakepen. Un kowa, hoi an tumaro shero trujel djal, prindjrau me ninna.

⁶Tumer dan buden mulo an kau foro. Un i dromma an kau foro hi pherdo kolendar, kai wan mulo dino.

⁷Doleske penau me, o baro Dewel, tumaro rai: Kolen, kai tumer an o foro mulo dan, kolla hi o mass, un o foro hi i piri. Tumen witsrenn le dran leste win.

⁸Tumer darenn glan o kurepen. Un o charo anau pral tumende. Kowa penell o baro Dewel, tumaro rai.

⁹Me tradau tumen dran ko foro win, un dau tumen an o wast i menshendar dran i wawar them, un mukau len te denn le tumenge tumari phagi.

¹⁰Tumer wenn o chareha mulo dino. Kate an o them Israel dau tumen tumari phagi. Un tumer dikenn un haiwenn, te hom me o baro Dewel.

¹¹Tumer atchenn gar an kau foro har o mass an i piri. Kate an o them Israel dau tumen tumari phagi.

¹²Un tumer dikenn un haiwenn, te hom me o baro Dewel. Tumer kran gar kowa, hoi tumendar kamom. Un rikran gar ap mire tchatchepaskre laba. Na-a, tumer djiwan pal i tchatchepangre laba kol menshendar, kai an i themma trul tumende djiwenna.

¹³Un har rakrom kal laba win, hoi o Dewel man das, meras o Pelatja, koleskro dad o Benaja his. Un me mukom man ap i phub te perell, un dom bari gole: Baro Dewel, miro rai! Kameh tu halauteren mulo te dell, kai i Israelendar pral atchan?

¹⁴Un o baro Dewel penas ap mande:

¹⁵Tu, mensho, kol menshe, kai gomme an o foro Jerusalem djiwenn, kolla penenn fun tire phralendar un tire menshendar un i tsele wawar Israelendar, kai pandles an o them Babilonia anlo wan: “Dur krik hi le o baro Deblestar! Menge hi kanna o them!”

¹⁶Doleske pen: Kawa penell o baro Dewel, maro rai: Awa, me tradom len dur krik an wawar themma, un mank wawar menshende. Ninna te djiwenn le kate te kote an bud themma, un hi buder gar khetne, hom me pash lende, te nai mangenn le man an, an kol themma, kai le anlo wan.

¹⁷Me, o baro Dewel, lengro rai, lau len khetne dran kol tsele themma un natsjone, an kolende jon tradedo wan, un dau len o them Israel pale.

¹⁸Te wenn le kote khere, witsrenn le kol tsele chochene deblen un djungele figuren win dran o them.

¹⁹Un me dau len i newo dji, un tchiwau i newo ducho an lende dren. Un me lau ko dji dran bar dran lengro betch win. Un dau len i masselo dji.

²⁰Palle krenn le, hoi lendar kamau, un djiwenn pal mire tchatchepaskre laba. Un jon hi mire menshe, un me hom lengro Dewel.

²¹Kolla, kai pandan pengro dji ap i chochene deblen un djungele figuren, kolenge anau lengro tchilatchepen ap lengre sherja pale. Kawa penell o baro Dewel, maro rai.

²²Un kol bolepangre hadan pengre tchirklengre mussja, un khetne lentsa hadan pen kol rade. Un o railepen o Israeleskro Deblestar his pral lende.

²³Un o baro Debleskro railepen hadas pes un djas dran o foro win, un tchiwas pes ap i berga, hoi glan o foro tchiddo hi, kote kai o kham pre djala.

²⁴Un an ko dikepen, hoi dikom, un hoi was o Deblestar, hadas man o ducho pre, un anas man pale pash kolende, kai pandlo krik anlo wan an o them Babilonia. Un ko dikepen, hoi dikom, djas krik.

²⁵Un me penom kol pandlenge halauter, hoi o baro Dewel mange penas un sikras.