Read O Debleskro Drom - I Bibla an o Romano Rakepen 2021 Hesekijel 14 Bible Online

Hesekijel 14 - O Debleskro Drom - I Bibla an o Romano Rakepen 2021 bible

Hesekijel 14

¹Un pash mande wan mursha i phurendar dran Israel, un jon beshan pen glan mande tele.

²Koi penas o baro Dewel ap mande:

³Tu, mensho, kal mursha rikran ap pengre chochene deblen, un tchiwan len pre glan pende, kolen, kai anenn len ap o tchilatcho drom. Hoske mukap man sawendar te putchell?

⁴Pen lenge: Kawa penell o baro Dewel, maro rai: Hakeno dran o kheer Israel, kai kras peskro dji pre peskre chochene deblenge, un tchiwas len pre glan peste, kolen, kai anenn les ap o tchilatcho drom, un well palle pash miro rakepaskro, te putchell lo mandar tchomone, koleha rakrau me, o baro Dewel, jaake, har hunte well rakedo jekeha, kai bud chochene deblen an-mangell.

⁵Jaake krau, te krenn i Israelitarja pengre djia pale mange pre, jon, kai mukan miro drom un mangenn wawar deblen an.

⁶Doleske pen ap o kheer Israel: Kawa penell o baro Dewel, maro rai: Djan tele tumaro tchilatcho dromestar, un mukenn tumare chochene deblen, hoi jaake djungelo an mire jaka hi!

⁷Hako Israelitari, un hako wi-themari pash tumende, kai mange o dumo sikrell, un peskro dji i chochene deblenge pre krell, un len glan peste tchiwell, kolen, kai anenn les ap o tchilatcho drom, un well palle pash miro rakepaskro, te putchell lo mandar tchomone, koleha rakrau me, o baro Dewel, kokres.

⁸Me dikau tchilatches ap leste. Un ap leste dikenn i menshe, hoi saweha djal, kai sawo koowa krell, un jon rakrenn lestar i rah tsiro. Me krau les pale-tchiddo hako tsireske, te nai djiwell lo buder gar mank mire menshende. Jaake dikenn un haiwenn tumer, te hom me o baro Dewel.

⁹Te mukell pes i Debleskro rakepaskro jaake dur te anell, te dell lo les i lab mandar dureder, palle krau me, o baro Dewel, te dell lo i chocheno lab dureder. Un me hadau miro wast pral leste, un krau les pale-tchiddo, te djiwell lo buder gar mank mire menshende Israel.

¹⁰Jaake hunte hidjrenn kol dui pengri doosh: Kowa, kai putchas, un ko Debleskro rakepaskro.

¹¹Kowa krau, te perell o kheer Israel gar buder mandar tele, un krell pes buder gar pale-tchiddo dran ko tseli doosh, hoi le ap pende anenn. Un jon wenn mire menshe, un me wau lengro Dewel, penell o baro Dewel, maro rai.

¹²Un o baro Dewel penas ap mande:

¹³Tu, mensho, djiness, te phagenn i menshe an jek them mantsa, un rikrenn buder gar ap mande, dau me len i phagi. Un krau, te hi len buder gar doha maro. Un bitchrau i bok an o them, te merenn i menshe un i vieche i bokatar.

¹⁴Ninna te wans kal triin mursha an ko them, o Noah, o Daniel un o Hiob, palle lans jon kokres pengro djipen dran o merepen win, kek wawar lentsa. Jon djiwan an o tchatchepen. Doleske loms len kokres dran o merepen win. Kawa penau me o baro Dewel, tumaro rai.

¹⁵Te anoms diwje viechen an o them, kai marenn kolen, kai kote djiwenn, un o tselo them wals i mulo them, kai kek buder ap o drom hi i darjatar kol diwje viechendar,

¹⁶un kal triin mursha wans ninna an ko them, nai lans le kokres pengro djipen dran o merepen win, un gar lengre tchawen un tchen. Un o them wals i mulo them. Jaake dau man sowel pash miro djipen, penell o baro Dewel, maro rai.

¹⁷Te mukoms me i kurepen win te phagell an ko them, un mukoms menshen un viechen kote mulo te dell,

¹⁸un kal triin mursha wans an ko them, nai lans le kokres pengro djipen dran o merepen win, un gar lengre tchawen un tchen. Jaake dau man sowel pash miro djipen, penell o baro Dewel, maro rai.

¹⁹Te bitchroms i pharo nasslepen an ko them, un mukoms an miri tati choli menshen un viechen te merell,

²⁰un o Noah, o Daniel un o Hiob wans ninna an ko them, palle lans le gar pengre tchawen un tchen dran o merepen win. Kokres pengro djipen nai lans le dran o merepen win doleske, kai djiwan jon an o tchatchepen. Jaake dau man sowel pash miro djipen, penell o baro Dewel, maro rai.

²¹Un kanna penell o baro Dewel, maro rai: Ap ko tsiro, kai bitchrau star phare dawa pral ko foro Jerusalem — kurepen, bok, diwje vieche un pharo nasslepen, — te merenn i menshe un vieche koi dren,

²²palle hi sawe koi, kai atchenn djido lendar. Kolla wenn khetne pengre tchawentsa un tchentsa win anlo pash tumende an o them Babilonia. Te dikenn tumer palle, har jon djiwenn, un hoi le krenn, well tumari duk pral koi bari bibacht tikneder, hoi anom pral o foro Jerusalem.

²³Te dikenn tumer, har le djiwenn, un hoi le krenn, haiwenn tumer, hoske me kowa jaake o foreha Jerusalem hunte krom. Un tumari duk koi pral well krik lino dran tumare djia. Kowa penau me, o baro Dewel, tumaro rai.