Read O Debleskro Drom - I Bibla an o Romano Rakepen 2021 Hesekijel 16 Bible Online

Hesekijel 16 - O Debleskro Drom - I Bibla an o Romano Rakepen 2021 bible

Hesekijel 16

²Tu mensho, rike i menshenge an o foro Jerusalem glan i jaka, hawo djungelo koowa jon kran!

³Pen lenge: Kawa penell o baro Dewel, maro rai: O them Kanaan hi o them, dran koleste tire phure wan, un kai tu boldo wal. Tiro dad his i Amorari, tiri dai i menshendar Het.

⁴Ap ko diwes, har tu boldo wal, his kowa jaake: Kek tchinas koi dori tele, kolah ap tiri date pandlo hals. Witar kek thowas tut an pani tele, un makas tut o loneha tele. Kek tchiwas pherne trul tute.

⁵Kekes khaital tu, te krals lo sawo koowa ap tute dran kamlepen. Na-a, tu wal tchiddo muklo win ap i phub. Jaake his ap ko diwes, har tu boldo wal. Kek kamas tut.

⁶Kote djom me kote miro drom, kai tu tchiddo hals. Un me dikom tut, har tu ratles koi tchiddo hals. Un me penom ap tute: Tu atchess djido! Awa, ap tute penom: Tu djiwess,

⁷un wess baro! Tu wal har i shukar bluma. Un wal baro un i un shukar djuwel. Tire tchutchja wan baro un tire balla lengsto. Nango hals.

⁸Un me djom miro drom, kai tu hals, un dikom tut. Un tiro tsiro was, te kamess i murshes un kress le bijab. Kote tchiwom miri baja pral tute un tchakrom tut. Un me djom tuha i sowel dren, un pandom miro dji ap tute, un penom: “Tu wess miro.” Kawa hi, hoi penas o baro Dewel, maro rai.

⁹Un me thowom tut an pani, un thowom o rat tutar tele, un makom tut djeteha.

¹⁰Un me riwom tut an raile ripja, kai shukar koowa dren sido his, un tchiwom kircha dran latcho ledera ap tire pire, un i pandepen dran kutch laintikro than ap tiro shero. Un i baja dran phar[20] tchiwom trul tute.

¹¹Un kutch koowa tchiwom ap tute: Werklia trul tire mussja, un trul tiri meen,

¹²i gustri an tiro nak, un kanengre an tire kanda, un i kutch rajeskri stadi ap tiro shero.

¹³Un jaake wal tu shukar kerdo o sonakajeha un rupeha. Un tire koola his dran kutch laintikro than un dran phar. Un tut his raile ripja kerdo an shukar subjakri budi. Un tu chal o chapen dran latcho jarro, gwin[21] un djet. Un tu hals i shukapen un wal i rajetsa.

¹⁴Un tutar was an i wawar themma penlo, har shukar tu hal. Ko kutch koowa, hoi ap tute tchiwom, kras tiro shukapen jaake baro, te nai wals gar bareder. Kawa hi, hoi penas o baro Dewel, maro rai.

¹⁵Un tu wal pre-phurdo dran tiro shukapen. Un har i wawar tut jaake sharan, witsral tut hakeneske ap i meen, kai kote djas, kai tu hals, un dal tut leske.

¹⁶Un tu lal tire raile ripjendar, un tchiwal len kote ap i phub, kai i chochene debla an-mangedo wan. Un jaake har i lubni dal tut hakeneske, kai kamas. Sawo koowa das an kek tsiro, un well buder gar.

¹⁷Un tu lal ko kutch koowa dran sonakai un rup, hoi me tut dom, un kral tuke figure lestar, un mangal len an, un chochral man jaake lentsa.

¹⁸Un tu lal ninna tire raile ripja, kai hi kerdo an shukar subjakri budi, un riwal len lenge an. Un glan lende tchiwal ko djet un ko sungepaskro koowa, hoi mandar lal.

¹⁹Un kowa hoi dom me tut te chal, ko latcho jarro, djet un gwin tchiwal tu glan lende, te dikenn le latches ap tute. Awa, jaake dur djal tu, penell o baro Dewel, maro rai.

²⁰Tire tchawe un tcha, kai hi mire tchawe, kolen lal tu un dal len lenge mulo, te chan le len pre. His tuke gar doha, te mukal man?

²¹Hunte lal gomme mire tchawen un dal len mulo, un mukal len i chochene deblenge te chatchrell?

²²Un pash ko tselo djungelo koowa, hoi tu kral, un har i lubni djiwal, bistral ko tsiro, kai terno hals, un nango hals un ratles tchiddo hals.

²³Har djungeles djal tuke, penell o baro Dewel, maro rai! Gar kokres kau tchilatcho koowa kral!

²⁴Na-a, ap i tsele platse, kai menshe khetne wenn an i foro, kral tuke mangepaskre platse, kai mangal chochene deblen an.

²⁵Un kote kai i dromma khetne wenn, kral mangepaskre platse un kral te was tiro shukapen tchadepaske. Un sowal hakeneha, kai was tuke ap o drom. Un tiro lubjengro koowa was budeder un budeder.

²⁶Tu lubras trujel i Egiptarentsa, kolen bari chantch hi, un kolengro them pash tiro them tchiddo hi. Un kral bud lubjengro koowa, te tapras man i choli.

²⁷Doleske hadom miro wast, te dap tut i phagi, un lom tuke i kotar them krik kolestar, hoi dom tut. Un i djuwjenge an o them Filistia, kai his chojedo ap tute, dom tut an i wasta, te krenn le tuha, har jon kamenn. Un jon ladjan pral tiro wi-ladjedo djipen.

²⁸Tu lal gar doha, un lubral kolentsa dran o them Assur trujel. Un ninna kowa his tuke gar doha.

²⁹Koi kral gomme budeder lubjengro koowa, un lubral trujel kolentsa dran o them Babilonia, kai i parepangre djiwenn. Un ninna kolendar lal gar doha.

³⁰Har chatchell miri choli pral tute, te kral tu kowa lauter, penell o baro Dewel, maro rai. Tu wal i bari wi-ladjedi lubni.

³¹Kote kai i dromma khetne wenn, un ap haki platsa kral mangepaskre platse, kai chochene deblen an-mangal. Un tu hals gar har wawar lubja: Tu kamal kek lowe koleske, hoi kral.

³²Tu hal har i djuwel, kai chochras peskro romes, un sowal wawar murshentsa un gar tiro romeha.

³³Haki wawar lubjat well lowe dino. Tu dal gomme kolen, kai tut lan, tchomone. Un ginal len, te wenn le pash tute dran kol themma, kai le hi, un sowenn tuha.

³⁴Jaake kral wawartchandes har i wawar lubja: Tuke nashas kek palla. Un kek das tut lowe. Tu plaissral len! Jaake kral wawartchandes har wawar lubja krenn.

³⁵Doleske shun, Jerusalem, tu lubni, hoi o baro Dewel penell!

³⁶Kawa penell o baro Dewel, maro rai: Tiri chantch his baro. Un har i lubni sikral tut nanges glan tire pirnende, un mangal tire djungele chochene deblen an, un maral lenge tire tchawen.

³⁷Doleske dik, me kharau lauteren khetne, kai tuha trujel kran, un an kolengre jaka jaake shukar hals, kolen tu kamal, un kolen gar kamal. Un dran i tsele themma, hoi trul tute tchiddo hi, anau len khetne, te djan le ap tute pre. Palle riwau tuke glan lengre jaka tire koola win, te dikenn le tut, har tu nango hal.

³⁸Un me dau tut sawi phagi, har kol djuwja lenna, kai chochran pengro romes un maran i menshes. Un me mukau miri soreli choli pral tute te well.

³⁹Un me dau tut an lengre wasta, te denn le tire mangepaskre platse khetne, kai chochene deblen an-mangal, un randjenn tuke tire koola win, un lenn penge tiro sonakaskro koowa, un mukenn tut nanges tchiddo.

⁴⁰Un jon lenn bud menshen khetne, kai djan khatar tute, un witsrenn tut barrentsa mulo. Un pengre charentsa denn le tut an kotja.

⁴¹Un tire khera chatchrenn le an i jag pre, un denn tut tiri phagi glan i jaka bud djuwjendar. Jaake krau, te nai lubreh buder gar trujel, un nai gineh tuke buder kek pirnes.

⁴²Palle djal miri tati choli pral tute krik, un miro dji dukrell man buder gar, un hom buder gar chojedo pral tute.

⁴³Tu bistral, hoi tuke krom, har terno hals. Un choiral man ko tselo koweha, hoi kral. Bud djungelo koowa kral, un koi pashel kral wi-ladjedo koowa. Doleske anau kowa lauter, hoi kral, ap tiro shero pale, penell o baro Dewel, maro rai.

⁴⁴Jerusalem, tu dikess: Menshe san pral tute kal gosewe labentsa: “Jaake har i dai, jaake ninna i tchai.”

⁴⁵Tu hal i tchai tiri datar, koja peskro romeske un peskre tchawenge o dumo sikras. Un tu hal i pheen tiri phenjatar, kai peskro romeske un peskre tchawenge o dumo sikras. Tumari dai his i menshendar Het un tumaro dad his i Amorari.

⁴⁶Tiri phureder pheen hi i Samaria peskre tchentsa, kolla ap i serwi rig tutar djiwenn. Un tiri tikni pheen, hoi ap i tchatchi rig tutar djiwell, hi i Sodom peskre tchentsa.

⁴⁷Tuke his gar doha, te djas ap lengre tchilatche dromma, un te kress ko djungelo koowa, hoi jon kran! Na-a, tu wal gomme tchilatcheder har jon, un kral gomme djungleder koowa har jon kran.

⁴⁸Doleske dau man sowel pash miro djipen, me o baro Dewel, tumaro rai: I Sodom, tiri pheen, un lakre tcha[22] kran gar sawo wi-ladjedo koowa, har kral tu un tire tcha!

⁴⁹Koi doosh tiri phenjatar Sodom his kaja: Joi his pre-phurdo. Lat his budeder har doha chapen un djiwas pengre tchentsa i shukar djipen. Kol tchorwelenge un kolenge, kai tele rikede wan, wan le gar ap i rig.

⁵⁰Na-a, jon kran pen bares, un kran glan mire jaka, hoi mange djungeles hi. Doleske lom lat ninna krik, har kowa latar dikom.

⁵¹Tu hal budeder har dui kope jaake tchilatcho har i Samaria. Tu kral budeder djungelo koowa har i Sodom un i Samaria kran. Te dikell jek ap tute, un palle ap lende, hunte patsell lo, te hi kol dui latche forja.

⁵²Kanna hunte hidjress tiri ladj! Tiri doosh hi jaake bud bareder har tire phenjengri doosh. Un jon dikenn langs tute win, har te wals len kek doosh. Jaake dau tute i bareder phagi har lende dom. Doleske ladjess tu tut. Hidje tiri ladj!

⁵³O diwes well, kai krau, te well lauter pale latches i forjenge Sodom un Samaria un kol gabenge trul lende. Un ninna tuke well lauter pale mishto.

⁵⁴Kowa krau, te hidjress tiri ladj un ladjess pral halauter, hoi kral, jaake te dikenn i forja Sodom un Samaria, te anan le gar jaake bud doosh ap pende har tu ap tute anal. Palle lenn lengre djia newi soor.

⁵⁵Un tire phenja, i Sodom un i Samaria, un lengre tcha wenn pale jaake, har jon glan kowa his. Ninna tu un tire tcha wenn pale jaake, har tumer glan kowa hans.

⁵⁶An ko tsiro, kai jaake pre-phurdo hals, rakral pal tiri phenjate Sodom.

⁵⁷Palle was ko tsiro, kai dikas hakeno, har tchilatcho hals. Un kanna dikenn i menshe an i themma Edom un Filistia un an i wawar themma, hoi trul tute hi, ap tute tele un praassenn tut.

⁵⁸Jaake perell tiro wi-ladjedo un djungelo koowa ap tute pale. Un tu hunte hidjress tiri ladj. Kawa penell o baro Dewel.

⁵⁹Kawa penell o baro Dewel, maro rai: Awa, me krau tuke jaake, har tu kral: Tu dal tut sowel, te rikreh ap mande, un rikral koi sowel gar.

⁶⁰Ninna te rikral tiro lab gar, bistrau me kowa gar, hoi tuha win krom, har hals terno. Un me krau tuha pale newes win, te wap tiro Dewel. Un kowa, hoi tuha newes win krau, atchell hako tsireske.

⁶¹Palle ladjeh tut pral kowa, hoi kral, te dikeh, har lau tiri phureder un tiri terneder pheen, un tchiwau tut pral lende, te wenn le tuke har tire tcha. Kowa hi bud budeder har tuke win krom.

⁶²Te krau tuha newes win, te wap tiro Dewel, dikeh un haiweh tu, te hom me o baro Dewel.

⁶³Me lau tiri tseli doosh tutar krik, hoi ap tute anal. Te well tuke palle tiro phuro djipen an o shero, ladjeh tu, un nai kreh tiro mui buder gar pre i ladjatar. Kawa penau me, o baro Dewel, tiro rai.