Read O Debleskro Drom - I Bibla an o Romano Rakepen 2021 Hesekijel 17 Bible Online

Hesekijel 17 - O Debleskro Drom - I Bibla an o Romano Rakepen 2021 bible

Hesekijel 17

¹Un o baro Dewel penas ap mande:

²Tu, mensho, pen i menshenge dran o kheer Israel phare laba, un putch lendar, hoi kamenn kolla te penell!

³Pen lenge: Kawa penell o baro Dewel, maro rai: Kote his i baro adlari. Koles his bare mussja un pesse shukar phora trul peskro shero. Kowa djas ap i berga Libanon un phagas o pralstuno kotar i rukestar krik, hoi kharell zedera,

⁴un anas ko pralstuno kasht an o them, kai i parepangre hi, un tchiwas les kote an i foro an i phub.

⁵Palle las lo i drab[23] dran o them un tchiwas les an latchi phub, kai bud pani his. Pash ko pani tchiwas lo les an i phub.

⁶Un ko drab anas kashta un patria win, un was i drakengro ruk. Kowa was buchlo un atchas tikno. Leskre kashta djan kote, kai o adlari hi. Un leskre draba djan dur tele an i phub. Jaake was dran ko drab i drakengro ruk, kolestar wan kashta un newe tikne burra win.

⁷Un kote his i wawar baro adlari. Koles his ninna bare mussja un bud phora trul peskro shero. Un kanna rissras o drakengro ruk peskre draba un kashta pash koleste, te dell kowa les budeder pani, har koi phub, an kolate job dren tchiddo was,

⁸ninna te his job an latchi phub dren tchiddo, un his tardo pash bud pani. Un lestar nai djans bud kashta win, un nai djans bud drake ap leste pre, jaake te wals lo i shukar drakengro ruk.

⁹Kanna putchell tumendar o baro Dewel, tumaro rai: Well o drakengro ruk bareder? Atchell lo djido? Hi gar jaake, te well o ersto adlari un tserdell les khetne peskre drabentsa win dran i phub, un phagell i drake lestar tele, jaake te merenn leskre newe senele patria lauter tele, un ko tselo bur merell? Palle well lo wi-tserdedo khetne peskre drabentsa. Un koleske hunte well kekes bud soor, un gar bud menshe.

¹⁰Jaake well o bur gar baro, ninna te was lo an i phub tchiddo. Te well o sorelo tato ducho fun kotar, kai o kham pre djal, un phurdell ap leste, merell lo tele, ap koi platsa, kai was job an i phub tchiddo.

¹¹Un o baro Dewel penas ap mande:

¹²Pen kol menshenge, kai mukenn pen tchi te penell: Haiwenn tumer gar, hoi kowa kamell te penell? O baro rai dran o them Babilonia was an Jerusalem, un las leskro baro rajes un leskre pralstunen pandles, un anas len pash peste an o foro Babilon.

¹³Un job las o rajeskre tchawendar jekes, un kras leha win, te well job o rai pral o them Juda, un mukas les i sowel te dell, te perell lo gar lestar tele. I pralstunen dran ko them las lo pandles an Babilonia,

¹⁴te well ko them Juda gar sorelo un nai hadell pes gar, un te well kowa dren rikedo, hoi jon win kran.

¹⁵I tsiro koi pre hadas pes o rai o themestar Juda, un bitchras murshen an o them Egiptia, te bitchrenn le leske graja un lurden. Djal kowa mishto? Lell jek, kai sawo koowa krell, kek phagi? Nai phagell lo peskri sowel, un lell kek phagi?

¹⁶Me dau man sowel pash miro djipen, penell o baro Dewel, maro rai: Ko rai pral Juda phagas peskri sowel, un rikras gar dren, hoi lo o baro rajeha dran o them Babilonia win kras, koleha, kai les rai kras. Doleske merell lo an koleskro foro — mashkral an Babilon.

¹⁷Un o Farao peskre bud lurdentsa well witar gar ap leskri rig, ap ko tsiro, kai hunte kurell lo pes. I Babilonarja wenna, un tchiwenn bud tchik pre win trul o foreskri massuri, te nai djan le koi pral ap o foreskri massuri pre. Un jon krenn turme, te denn le karje tele an o foro, jaake te marenn le bud menshen.

¹⁸O rai pral Juda phagas peskri sowel. Un kowa, hoi lo win kras ko baro rajeha dran Babilonia, un ap kowa job peskro wast das, rikras lo gar dren. Kau tselo koowa kras job. Doleske well lo gar win lino dran i bibacht.

¹⁹Doleske penell o baro Dewel, maro rai: Jaake har tchatcho hi, kai djiwau, jaake hi tchatcho, te anap ap leskro shero pale, hoi lo kras. Job phagas peskri sowel, hoi das lo glan mande, un rikras gar dren, hoi lo mantsa win kras.

²⁰Me witsrau miri netsa pral leste win, te well lo tapedo an mire dorja. Un anau les an o them Babilonia. Kote dau les i phagi koleske, kai phagas lo mantsa.

²¹Un leskre wi-rodede lurde wenn o chareha mulo dino. Un kolla, kai djido atchenn, wenn tradedo ap hake rigja. Un tumer dikenn un haiwenn, te rakrom me, o baro Dewel.

²²Kawa penell o baro Dewel, maro rai: Me phagau ko tikni kasht, hoi pralstunes ap i zedertikro ruk win was, un tchiwau les an i phub dren. Awa, me lau i pralstune kashtendar i terno newo kasht, un tchiwau les an i phub ap i berga, hoi bareder hi har halauter trul leste.

²³Pral ap koi bari berga an o them Israel, kote tchiwau les an i phub. Un job lell bud kashta un hidjrell rukengre, un well i railo zedertikro ruk. Un an leste djiwenn bud tchirkle un hi khere mank leskre kashta.

²⁴Un i tsele ruka an o them dikenn un haiwenn, te hom me o baro Dewel. I baro rukes krau tikno, un i tikno rukes krau baro. I senelo rukes mukau tele te merell, un i truk rukes senelo te well. Me, o baro Dewel, penau kowa, un krau kowa ninna.