Read O Debleskro Drom - I Bibla an o Romano Rakepen 2021 Hesekijel 18 Bible Online

Hesekijel 18 - O Debleskro Drom - I Bibla an o Romano Rakepen 2021 bible

Hesekijel 18

¹Un o baro Dewel penas ap mande:

²Hoske penenn tumer an o them Israel kau lab: I phure chan shutle drake, un i ternenge dukenn i danda.

³Me, o baro Dewel, dau man sowel: Jaake har tchatcho hi, kai djiwau, jaake well sawo lab tumendar an o them Israel buder gar rakedo!

⁴Djinenn, man hi o djipen hakenestar an miro wast — o dadeskro djipen jaake har o tchaweskro djipen. Kokres kowa, kai anell doosh ap peste, hunte merell.

⁵I mursh, kai djiwell an o tchatchepen un krell, hoi mishto un tchatcho hi,

⁶kowa chal tchi ko massestar, hoi i chochene deblenge dino was. Job mangell gar i chochene deblen an, kolen i Israelitarja an-mangenn, un djal gar i wawareskri romjah, un sowell gar i djuwjah an ko tsiro, kai lat peskro koowa hi.

⁷Job rikrell kekes sorjah tele. Te patsas lo lowe win, dell lo kowa[24] pale, hoi das les ko tchorwelo ko tsireske, kai les sijaan pash leste hi. Job lell kekestar tchomone sorjah peske. Peskro maro dell lo koles, kones bok hi, ninna koola koles, kai kek an-ripaske hi.

⁸Te patsas lo lowe win, lell lo peske gar budeder lowe pale. Job rikrell peskro wast pale, te krell lo kek tchilatchepen. Un an i tchingepen dell lo jak, te lell hakeno peskro tchatchepen.

⁹Job krell, hoi lestar kamau, un djiwell pal miro tchatchepen. Sawo menshes hi kek doosh ap peste. Job atchell djido. Kowa penau me, o baro Dewel, tumaro rai.

¹⁰Hoi djal, te well leske i mursh tchawo boldo? Un kowa hi i tchi-moldo, kai dell i wawares mulo, un krell ko tselo koowa,

¹¹hoi leskro dad gar kras. Un chal ko massestar, hoi i chochene deblen dino was, un djal i wawareskri romjah,

¹²un rikrell i tchorwelen sorjah tele, ninna kolen, kolen gar doha djipaske hi, un lell sorjah peske, hoi gar leskro hi. Te patsas lo lowe win, dell lo kowa gar pale, hoi das les ko tchorwelo ko tsireske, kai les sijaan pash leste hi. Un job mangell i chochene deblen an, un krell, hoi glan o Debleske jaka djungeles hi.

¹³Te patsell lo lowe win, lell lo peske budeder lowe pale. Nai atchell sawo mensho djido? Na-a! Koon sawo djungelo koowa kras, hunte merell. Job hunte lell peskri phagi!

¹⁴Hoi djal, te well koleske i mursh tchawo boldo, un kowa dikell ko tselo tchilatcho koowa, hoi leskro dad kras? Un ninna te dikell lo kowa, krell job kowa gar.

¹⁵Job mangell gar kol chochene deblen an, hoi i Israelitarja an-mangenn, un chal gar o massestar, hoi lenge dino was. I wawareskri romjah djal lo gar.

¹⁶Kekes rikrell lo sorjah tele. Te hi jekes sijaan pash leste, mangell lo lestar tchi ko tsireske, kai koles sijaan pash leste hi. Job lell gar sorjah peske, hoi o wawares hi. Un dell kolen maro, kolen bok hi, un koola kolen, kolen tchi an-ripaske hi.

¹⁷Job rikrell peskro wast pale, te krell lo kek tchilatchepen. Te patsas lo lowe win, lell lo gar budeder lowe pale. Jaake djiwell lo pal miro tchatchepen un krell, hoi lestar kamau. Sawo mensho hunte merell gar. Job atchell djido, ninna te las leskro dad bud doosh ap peste.

¹⁸Leskro dad, kowa, kai chochras i wawaren, un las peske sorjah, hoi i wawares hi, un kras wawar tchilatcho koowa mank peskre menshende, kowa hunte merell ko tselo tchilatchepaske, hoi lo kras.

¹⁹Tumer putchenn: “Hoske hidjrell ko tchawo gar i doosh peskro dadestar?” Me penau tumenge: O tchawo kras, hoi mishto un tchatcho his, un rikras halauter, hoi lestar kamom. Doleske atchell job djido.

²⁰Kokres kowa, kai doosh ap peste anell, hunte merell. I tchawo hunte hidjrell gar i doosh peskro dadestar. Witar gar hunte hidjrell o dad koi doosh, hoi o tchawo ap peste anas. Kowa, kai o tchatchepen kras, ap leste well leskro tchatchepen pale. Un kowa, kai doosh ap peste anas, ap leste well leskri doosh pale.

²¹I tchilatcho, kai mukell peskro tchilatcho drom, un ko tselo tchilatcho koowa, hoi lo kras, un krell kanna, hoi lestar kamau, un hoi mishto un tchatcho hi, sawo hunte merell gar.

²²Ko tselo tchilatcho koowa, hoi lo kras, well bistedo! Dran ko latcho un tchatcho koowa, hoi lo kanna krell, atchell lo djido.

²³Patsenn tumer, an mire jaka wals mishto, te merell kowa, kai tchilatcho koowa kras? putchell o baro Dewel, maro rai. Na-a, an mire jaka hi shukar, te mukell lo peskro tchilatcho drom un atchell djido.

²⁴I latcho mursh, te mukell job peskro latcho drom, un krell kanna o tchilatchepen, un ko tselo djungelo koowa, hoi ko tchilatcho kras, atchell lo djido? Na-a! Ko tselo latcho un tchatcho koowa, hoi lo kras, well bistedo. Job mukas o Debleskro drom un anas doosh ap peste. Doleske hunte merell lo.

²⁵Tumer penenn: O Dewel djal gar pal o tchatchepen. Shunenn, tumer dran o kheer Israel! Djau me gar pal o tchatchepen? Hi gar jaake, te han tumer kolla, kai djan gar pal o tchatchepen?

²⁶Te djal i latcho mensho peskro tchatcho dromestar tele, un krell o tchilatchepen, hunte merell lo. Dran peskro tchilatchepen, hoi lo kras, hunte merell lo.

²⁷I tchilatcho, kai djas tele peskro tchilatcho dromestar, un djiwell buder gar an o tchilatchepen, un krell kanna hoi mishto un tchatcho hi, kowa atchell djido.

²⁸Job dikas peskri tseli doosh dren, hoi lo ap peste anas, un mukas peskro tchilatcho drom, doleske atchell lo djido un hunte merell gar.

²⁹Un kote penenn tumer Israelitarja: “O Dewel djal gar pal o tchatchepen.” Hom me kowa, kai djal gar pal o tchatchepen? Hi gar jaake, te han tumer kolla, kai djan gar pal o tchatchepen?

³⁰Doleske penau me, o baro Dewel, tumaro rai: Me krau o tchatchepen win pral tumende dran o kheer Israel — pral hakeneste, jaake har djiwas lo. Mukenn tumaro tchilatcho drom! Krenn buder gar ko tselo tchilatcho koowa, hoi kran, te anenn kek doosh ap tumende.

³¹Mukenn tumare tchilatche dromma! Un lenn tumenge i newo dji un i newo ducho! Hoske kamenn tumer te merell, tumer dran o kheer Israel?

³²Mange hi gar shukar, te hunte merell jek, penell o baro Dewel, maro rai. Doleske mukenn tumare tchilatche dromma, un djiwenn!