Read O Debleskro Drom - I Bibla an o Romano Rakepen 2021 Hesekijel 19 Bible Online

Hesekijel 19 - O Debleskro Drom - I Bibla an o Romano Rakepen 2021 bible

Hesekijel 19

¹O baro Dewel penas mange: Tu, gib i ropaskri gili pral i rajende dran o kheer Israel.

²Un pen: Hawi raili lewetsa his tiri dai! Mashkral terne lewe his li tchiddo, un tserdas peskre tchawen baro.

³Un jek lendar, hoi tserdas li pre, was i terno sorelo lewo, Leske sikras li, har te dandrell lo viechen mulo, un ninna menshen chas lo pre.

⁴Har i menshe an wawar themma lestar shunan, tapran le les an pengri gruba, un tserdan les shellentsa an o them Egiptia.

⁵Un i dai luras[25], te well lo pale. Har dikas li, te luras li tchitcheske, un job buder gar pale was, kote las li i wawares peskre tchawendar un tserdas les baro.

⁶Kowa djiwas mank i wawar lewe, was i sorelo terno lewo, un djinas, har te dandrell lo viechen mulo, un ninna menshen chas lo.

⁷An forja un sorele khera phagas lo dren, un kras len paash; muklo atchenn le tchiddo. Un i menshe an ko them daran un trissan, har das lo gole.

⁸Kote tchiwan pen i menshe dran i themma koi trujel, khetne, te djan le ap leste. Un witsran pengri netsa pral leste, un tapran les an lengri gruba.

⁹Un jon tchiwan leske i gustri an o nak un i kasht trul leskri meen, un anan les pash o rajeste an o them Babilonia. Un kote tchiwan le les an o stilepen, te was leskri gole buder gar shunlo ap i berge an Israel.

¹⁰Tiri dai his har i drakengro ruk, hoi was pash o pani an i phub tchiddo. Un har les jaake bud pani his, hidjras lo bud drake, un bud senele kashta his ap leste.

¹¹Un kolla wan jaake sorelo, te nai krans le rajengre kashta[26] dran lende. Ko bur was baro, bareder har kol wawar ruka trul leste. Hakeno nai dikas, har sorelo job his, un har bud senele kashta les his.

¹²Koi was i chojedo wast, un tserdas les win dran i phub, un witsras les tele. Un i tato ducho, hoi was fun kotar, kai o kham pre djal, mukas leskre drake truk te well. Leskre sorele kashta wan tele phagedo, te meran le tele un wan an i jag chatchedo.

¹³Kanna hi ko drakengro ruk an i mulo tato them tardo, kai kek pani hi.

¹⁴Un i jag djas win dran leskro pesseder kasht, un chatchras leskre drake. Kek sorelo kasht atchas buder pral, kolestar nai wals i rajeskro kasht kerdo. Kawa hi i ropaskri gili. Koja was giwedo kolendar, kolengro dji rowas.