Read O Debleskro Drom - I Bibla an o Romano Rakepen 2021 Hesekijel 2 Bible Online

Hesekijel 2 - O Debleskro Drom - I Bibla an o Romano Rakepen 2021 bible

Hesekijel 2

¹Un job penas ap mande: Tu, mensho ste pre! Me kamau tuha te rakrell.

²Un har job mantsa rakras, was o Debleskri soor an mande, un hadas man pre. Un kowa, kai mantsa rakras, penas:

³Tu, mensho, me bitchrau tut pash i Israelitarja. Kolla hadan pen un peran mandar tele. Ninna lengre phure hadan pen pale te pale pral mande. Un kolla, kai kau diwes djiwenn, hi gar wawartchandes.

⁴Jon djan pal pengro shero, un lengro dji hi dran bar. Pash kolende bitchrau tut. Lenge peness: Kawa penell o baro Dewel, maro rai!

⁵Jon nai shunenn oder shunenn gar ap tute. Ninna te mukenn le pen tchi te penell, hunte djinenn le, te hi i Debleskro rakepaskro mashkral lende.

⁶Un tu mensho, tu daress gar lendar, witar gar lengre labendar, hoi jon rakrenna. Tu djiweh mank lende har mank skorpione. Jon hi har subjengre burra trul tute. Ma muk len tuke daar te krell! Ma traash kolestar, hoi kolla rakrenna, kai mukenn pen tchi te penell!

⁷Pen lenge mire laba! Nai well, te shunenn le, nai well, te shunenn le gar. Jon hi menshe, kai mukenn pen tchi te penell.

⁸Un tu mensho, shun, hoi me tuke penau! Ab tu gar har kolla, kai kamenn lauter feteder te djinell! Kre tiro mui pre un cha kowa, hoi me tuke dau!

⁹Un me dikom i wast, hoi his win rikedo ap mande. Un an ko wast his i liil, hoi khetne lino his.

¹⁰Un job kras les glan mande pre. Un laba his ap kol dui rigja tchinlo: ropangre gilja un ropaskri gole un dukedi gole.