Read O Debleskro Drom - I Bibla an o Romano Rakepen 2021 Hesekijel 20 Bible Online

Hesekijel 20 - O Debleskro Drom - I Bibla an o Romano Rakepen 2021 bible

Hesekijel 20

¹An o eftato bersh an o pantchto tchon ap o deshto diwes an ko tchon, kote wan mursha kol phurendar dran Israel pash mande, te putchenn le o baro Deblestar tchomone. Un jon beshan glan mande tele.

²Koi penas o baro Dewel ap mande:

³Tu, mensho, pen kol phurenge dran Israel: Kawa penell o baro Dewel, maro rai: Tumer wan, te putchenn mandar? Me dau man sowel pash miro djipen: Me mukau man gar tumendar te putchell, me gar, penell o baro Dewel, maro rai.

⁴Ap mande penas lo: Tu mensho, rake pral lende o tchatchepen win! Kre kowa! Rike lenge ko djungelo koowa glan i jaka, hoi lengre phure kran!

⁵Pen lenge: Kawa penell o baro Dewel, maro rai: Me rodom i Israelitarja win, te wenn le mire menshe. Har jon gomme an o them Egiptia his, penom lenge, koon me hom. Awa, me hadom miro wast pre, te dap man sowel, un penom kolenge dran o kheer Jakob: Me, o baro Dewel, hom tumaro Dewel.

⁶Me dau man sowel, te anap tumen win dran o them Egiptia un anau tumen an i them, koles me tumenge win rodom. Kowa hi i them, kai budeder har doha thud un gwin hi. Kau them hi shukeder har i tsele wawar themma.

⁷Un me penom ap lende: Hakeno tumendar hunte witsrell kol djungele figuren krik, hoi lo an-mangell. Rikrenn tumen pale kol chochene deblendar, kolen i Egiptarja an-mangenn, te wenn tumer gar pale-tchiddo! Me, o baro Dewel, hom tumaro Dewel.

⁸Jon mukan pen tchi mandar te penell, un kaman gar ap mande te shunell. Kek witsras kol djungele figuren krik, hoi lo an-mangas. Kol egiptikre deblen kaman le gar te mukell. Kote kamom miri choli pral lende win te tchorell. Gomme kote an o them Egiptia kamom miri tseli choli ap lende win te mukell.

⁹Palle krom kowa gar, te nai rakrenn kol wawar menshe gar djungeles pral mande, mank kolende jon his, un glan kolende me penom, te hom o Israeleskro Dewel, un te anap len win dran o them Egiptia.

¹⁰Un me anom len win dran o them Egiptia, un anom len an o mulo tato them.

¹¹Un kote penom lenge, hoi lendar kamau, har te djiwenn le pal miro tchatchepen. Miro tchatchepen hi kowa, koleha i mensho djido atchell, te rikrell lo pes ap leste.

¹²Ninna tchiwom o diwes dren, hoi mange hi, kai hunte budrenn le gar. Ko diwes his o sikepen koleske, hoi win kram. Jaake kamom, te djinenn i Israelitarja, kai me, o baro Dewel, rodom len mange win, te wenn le mire menshe.

¹³Ninna an o mulo tato them mukan pen i Israelitarja tchi mandar te penell. Jon djiwan gar jaake, har lendar kamom. Un ap mire tchatchepaskre laba dan le tchi. Un mire tchatchepaskre laba hi kolla, kolentsa o mensho djido atchell, te rikrell lo pes ap lende. Un jon kran bud koowa ap o Debleskro diwes, hoi hunte krans le gar, un jaake wom gar sharedo. Kote kamom miri choli pral lende win te tchorell, te hunte merans le lauter an o mulo tato them.

¹⁴Palle krom kowa gar, te nai rakrenn kol wawar menshe gar djungeles pral mande, glan kolengre jaka mire menshen win anom dran o them Egiptia.

¹⁵Me hadom miro wast pre, un dom man sowel, te anau len gar an ko them, hoi lenge win rodom, ko them, an koleste budeder har doha thud un gwin hi, un hoi shukeder hi har i tsele wawar themma.

¹⁶Kowa wals i phagi doleske, kai dan le tchi ap mire tchatchepaskre laba, un kran gar, hoi lendar kamom, un rikran gar o Debleskro diwes dren. Na-a, pengre chochene deblen nashan le palla!

¹⁷Palle khaitan le man. Doleske rikrom man pale, te marap len halauteren kote an o mulo tato them.

¹⁸Un me penom lengre tchawenge an o mulo tato them: Ma rikrenn tumen ap kol laba, pal kolende tumare phure djiwan! Ma djiwenn pal lengre tchatchepangre laba! Rikrenn tumen pale lengre chochene deblendar, te wenn tumer gar pale-tchiddo!

¹⁹Me, o baro Dewel, hom tumaro Dewel. Rikrenn tumen ap mire laba, hoi tumenge sikrenn, hoi tumendar kamau! Djiwenn pal mire tchatchepaskre laba!

²⁰Un rikrenn o Debleskro diwes dren, te krenn kek budi ap leste. Ko diwes hi i sikepen koleske, hoi win kram, te djinenn tumer, te hom me, o baro Dewel, tumaro Dewel.

²¹Un ninna lengre tchawe mukan pen tchi mandar te penell, un kran gar hoi lendar kamom, un djiwan gar pal miro tchatchepen. Mire tchatchepaskre laba hi kolla, kolentsa i mensho djido atchell, te rikrell lo pes ap lende. Un jon kran sawo koowa ap o Debleskro diwes, hoi hunte krans le gar. Un jaake wom gar sharedo. Kote kamom miri choli pral lende win te tchorell. Kote an o mulo tato them kamom miri tseli choli ap lende win te mukell.

²²Un pale rikrom man pale un krom lenge tchi, te nai rakrenn kol wawar menshe gar djungeles pral mande, glan kolengre jaka mire menshen win anom dran o them Egiptia.

²³Me hadom miro wast pre, un dom man sowel kote an o mulo tato them, te tradap len an wawar themma un mank wawar menshende,

²⁴doleske, kai djiwan le gar pal miro tchatchepen un kran gar, hoi lendar kamom, un budran ap o Debleskro diwes, un nashan kol chochene deblenge palla, kolen lengre phure an-mangan.

²⁵Un ninna dom len tchatchepaskre laba, hoi tchi-moldo his, un hoi anan lenge kek djipen.

²⁶Un har mukan le pengre phureder mursh tchawen i chochene deblenge te chatchrell, rakrom pral lende win: “Tumer han mange pale-tchiddo.” Jaake kamom len bari daar te krell, te haiwenn le, te hom me o baro Dewel.

²⁷Tu, mensho, rake ap o kheer Israel, un pen lenge: Kawa penell o baro Dewel, maro rai: Tumare phure anan ladj ap mande, har phagan le mantsa.

²⁸Har me len an o them anom, kolestar man sowel dom, te dap les lende, mangan le wawar deblen an. Hako kopo, kai dikan le i tikni berga oder i baro ruk bud patjentsa, chatchran le viechen i chochene deblenge, un kran man chojedo koleha, hoi le lenge anan. Jon chatchran sungepaskro koowa lenge, un tchoran mool win lenge.

²⁹Un me putchom lendar: “Hoske djan tumer ap kal platse, te mangenn wawar deblen an?” Doleske kharenn kol platse bis kau diwes: mulne platse[27].

³⁰Doleske pen ap i Israelitarja: Kawa penell o baro Dewel, maro rai: Kamenn tumer har tumare phure te krell, kai mantsa phagan, un djungele figuren an-mangan? Un doleske wan le pale-tchiddo. Kamenn tumen ninna pale-tchiddo te krell?

³¹Bis ap kau diwes chatchrenn tumer viechen kol chochene deblenge, un krenn tumen jaake pale-tchiddo. Ninna chatchrenn lenge tumare tchawe. Un me mukap man tumendar dran o kheer Israel, te putchell? Pash miro djipen, penell o baro Dewel, maro rai, dau man sowel, te mukau man gar tumendar te putchell!

³²Hoi was tumenge an o shero? Tumer penenn: “Mer kamah har i menshe an wawar themma te well! Mer kamah deblen dran kasht un bar an te mangell.” Me o baro Dewel, tumaro rai, penau: Sawo koowa te well kek tsireske! Me dau man sowel pash miro djipen, te atchap i sorelo rai pral tumende — i rai i sorelo wasteha, un i pre-hadedi mussjah, un i baro choljah.

³³

³⁴Un me lau tumen win dran kol tsele themma un natsjone, kai tradedo wan, un anau tumen pale khetne. I sorelo wasteha un i pre-hadedi mussjah un bari choljah krau me kowa.

³⁵Un anau tumen an o mulo tato them mashkral kol wawar natsjone. Un kote krau me o tchatchepen pral tumende win, jaake te dikas mer menge an i jaka.

³⁶Jaake har tumare phurende lengri phagi dom, har his le an o mulo tato them pash o them Egiptia, jaake dau tumende ninna tumari phagi, penell o baro Dewel, tumaro rai.

³⁷Me krau, te wenn tumer pale menshe, kai djiwenn pal kowa, hoi mer win kram. Jaake har i bakrengro peskre bakrentsa krell, un bakre lendar ap i rig tchiwell, jaake djau tumentsa trujel.

³⁸Kolen, kai mantsa phagan un mandar tele peran, tchiwau ap i rig. Ninna te lau len win dran kol themma, kai le wi-themarja his, well kek lendar an o them Israel. Palle dikenn un haiwenn tumer, te hom me o baro Dewel.

³⁹Tumer dran o kheer Israel, shunenn, hoi o baro Dewel, tumaro rai, penell: Krenn, hoi kamenn! Hakeno tumendar nai mangell peskro chocheno debles an! Tchatchepah, pal kowa well ko tsiro, kai shunenn pale ap mande, un anenn buder kek ladj ap mande tumare chochene deblentsa, un koleha, hoi lenge chatchrenn.

⁴⁰Ap miri bari berga an Israel, kai me djiwau, kote mangenn man i tsele Israelitarja an, halauter kai an o them hi. Un me lau len an o latchepen an, un kamau, te anenn le mange kote viechen un djob, jaake har glan tchinlo hi, ninna ko koowa, hoi mange ap i rig tchiwan.

⁴¹Te sungau ko latcho sungepen, hoi dran kowa win well, hoi tumer mange chatchrenn, dikau latches ap tumende. Jaake well kowa an ko tsiro, kai lom tumen win dran i themma un natsjone, kai wan tradedo. Un i tsele wawar natsjone dikenn, te hom me o tchatcho Dewel.

⁴²Me anau tumen pale an o them Israel — an ko them, kolestar sowel dom, te dap les tumare phurende. Palle dikenn un haiwenn tumer, te hom me o baro Dewel.

⁴³Un kote well tumenge kowa an o shero, hoi kran un har djiwan, koleha tumer tumen pale-tchiddo kran. Un ko tselo tchilatcho koowa, hoi kran, well tumenge tchadepaske.

⁴⁴Tumer Israelitarja, te djau me jaake tumentsa trujel, te wap sharedo, un krau gar pal tumare tchilatche dromma, un pal tumaro tchilatcho koowa, hoi kran, palle dikenn un haiwenn tumer, te hom me o baro Dewel, tumaro rai.