Read O Debleskro Drom - I Bibla an o Romano Rakepen 2021 Hesekijel 21 Bible Online

Hesekijel 21 - O Debleskro Drom - I Bibla an o Romano Rakepen 2021 bible

Hesekijel 21

¹O baro Dewel penas ap mande:

²Tu, mensho, dik kote, kai o kham pralstunes tardo hi. De o them trad, hoi kote hi! Un pen ap o weesh an o them Negev, hoi ap leste wella.

³Pen leske: Kawa penell o baro Dewel, maro rai: Shun, hoi tuke penau! Me krau i jag an tute, koja chatchrell hako ruk, hoi senelo hi un koles, hoi truk hi. Kek nai krell koi jag win. Koja djal dureder an o tselo them, jek rigjatar ap i wawar. Un o tatepen chatchrell hakeneske peskro mui[28].

⁴Un palle haiwell hakeno, te mukom me, o baro Dewel, koi jag pre te chatchell, un kek nai krell lat win.

⁵Un me penom: Ach, baro Dewel, miro rai! Jon penenn mandar: Kol laba, hoi kowa rakrell, hi laba, hoi kek haiwell!

⁶Un o baro Dewel penas ap mande:

⁷Tu, mensho, dik kote, kai o foro Jerusalem hi! Rake kolestar, hoi djal o khereske, kai well o Dewel an-mangedo! Un pen i menshenge an o them Israel, hoi pral lende wella!

⁸Pen lenge: Kawa penell o baro Dewel: Kanna sikrau les tumenge! Miro charo lau dran peskri possita, un marau tumen halauteren, i latchen har i tchilatchen.

⁹Awa, miro charo well win dran peskri possita, un well pral hakeneste an o them jek rigjatar ap i wawar, te wenn i latchen har i tchilatchen maredo.

¹⁰Palle dikell un haiwell hakeno, te lom me, o baro Dewel, miro charo dran peskri possita, un me tchiwau les gar pale pale koi.

¹¹Un tu mensho, dja banges un le phares ducho! Awa, le phares ducho, har te phagals tiro dji! Kre kowa glan i jaka i Israelendar!

¹²Un te putchenn le tutar: Hoske le tu jaake phares ducho? Palle peness: Shunom djungelo rakepen, hoi gomme well. Koon kowa shunell, koles taprell i bari daar. An leskre wasta hi buder kek soor. Leskro dji dell sik. I darjatar nai rikrell lo peskro pani gar. O tsiro hi kai, kowa well sik! Tchatchepah, kowa well, penell o baro Dewel, maro rai.

¹³Un o baro Dewel penas ap mande:

¹⁴Tu, mensho, pen glan-wi, hoi wella! Pen lenge: Kawa penell o baro Dewel: Dik o charo, o charo, hoi latches tchinell, un djudjo kerdo hi.

¹⁵Mishto tchinell lo. te marell lo bud menshen. Un djudjo kerdo hi lo, jaake djudjo har i blendari. Ma penenn: “Mer nai wah bachteles. Maro rai sal pral i tsele wawar rajende.”

¹⁶Ko charo was djudjo kerdo o kurepaske. Mishto tchinell lo, un djudjo hi lo har i blendari. Denn les o marepaskro an o wast!

¹⁷De gole un rob, tu mensho! Mire menshe hi, kolen o charo marell. I pralstunen an Israel dell miro charo mulo, un lentsa khetne mire tsele menshen! Doleske de ap tiro betch o ropastar!

¹⁸Me dikom, hoi an lengre djia hi. Har djal lenge, te well o charo ninna pral lengro rajeske, un job atchell gar djido? Kawa penell o baro Dewel, maro rai.

¹⁹Un tu mensho, de tire wasta pral tute khetne, un pen lenge, hoi pral lende wella! O charo dell tele ap lende: jek kopo, dui kope, triin kope! I marepaskro charo hi lo, bud menshen marell lo, haki rigjatar well lo ap lende,

²⁰te taprell i menshen bari daar, un bud merenn. Pash hake foreskre wudja wenn menshe maredo o chareha. Djudjo har i blendari hi ko charo. O marepaske hi lo kerdo.

²¹Tu charo, de dren ap i tchatchi rig, un ninna ap i serwi rig, hako kopo glan tute, kote, kai hal!

²²Jaake kamau ninna me, o baro Dewel, mire wasta khetne te dell i choljatar. Un pal kowa hom buder gar chojedo.

²³Un o baro Dewel penas ap mande:

²⁴Tu mensho, tchin i tikno kashteha dui dromma an i phub. Un sike jaake, ap hawo drom nai well o baro rai dran Babilonia peskro chareha[29]. Dran jek them djan kol dui dromma win. Un tchip i sikepen kote, kai dran jek drom kol dui win djan. Ko sikepen sikrell, an hawo foro hako drom djal.

²⁵Ko jek djal an o foro Rabba, kai i Ammonarja djiwenn, ko wawar an o sorelo foro Jerusalem an o them Juda. Jaake sikreh tu kol dromma, ap kolende o baro rai nai well peskre lurdentsa.

²⁶Kote kai ko jek dromestar dui dromma win djan, atchell lo o baro rai dran Babilonia tardo, te putchell lo i durkepangren, hoi te krell. Job witsrell kashta ap i phub, te dikell lo, har le perenn. Un putchell peskre khereskre deblen. Un job dikell palla, har i buko[30] i maredo viechestar win dikell.

²⁷Ko sikepen sikrell ap i tchatchi rig un penell leske, te djal lo peskre lurdentsa an o foro Jerusalem. Kote denn le bari gole — i bari kurepaskri gole. Jon tchiwenn bare pesse rukengre kotja pash i wudja an o foreskri massuri, te denn le kolentsa i wudja dren. Ninna tchiwenn le tchik pre win trul i massuri, te nai djan le pral ap i massuri. Un jon krenn turme, te denn le karje an o foro.

²⁸I menshenge an o foro Jerusalem well kowa glan har i chocheno durkepen. O baro rai dran Babilonia krals lentsa win, te krell lo lenge tchi, un dals peskro wast koi pre. Kanna te well job pral lende, well lenge an o shero, te rikran jon gar dren, hoi le leha win kran. Un jon wenn tapedo.

²⁹Doleske penell o baro Dewel, maro rai: Tumari doosh was diklo. Tumare tchilatche dromma wan pre-tchakedo. An halauter, hoi krenna, well tumaro tchilatchepen diklo. Tumer kran, te well tumari doosh gar bistedo. Doleske wenn tapedo i sorelo wasteha.

³⁰Tu tchilatcho rai pral Israel, tu pale-tchiddo! Tiro diwes was! Tiri doosh hi jaake baro, te was ko tsiro, kai leh tiri phagi.

³¹Me, o baro Dewel, tiro rai, penau tuke: Krik ko dikleha trul tiro shero! Le i rajeskri stadi tele! Tchi atchell har his. Kowa, kai pral his, well tele. Un kowa, kai tele his, well pral!

³²An kotja dau o foro Jerusalem! Paash, paash krau me les. Kawa well gar, [31] bis te well ko mursh, koles wi-rodom, te dell lo o foro peskri phagi. An leskro wast dau o foro.

³³Tu, mensho, de kol menshen an o them Ammon trad, un pen: Kawa penell o baro Dewel, maro rai, pral i Ammonarja kai pral o Israel san. Pen lenge: Dik o charo! O charo was win lino dran peskri possita, te marell lo bud menshen. Djudjo kerdo hi lo o marepaske. Djudjo har i blendari hi lo.

³⁴O charo tchinell i pale-tchidde un tchilatche menshenge lengre sherja tele. Lengro diwes was. Lengri doosh was jaake baro, te was ko tsiro, kai lenn le pengri phagi. Kowa, hoi le pral o charo an i dikepen[32] dikan, hi chochepen. Kowa, hoi lenge glan-wi penlo was, hi ninna chochepen.

³⁵Tchip tiro charo pale an peskri possita! An o them, kai tu boldo wal, an ko them kai khere hal, kote dau tut tiri phagi.

³⁶Me tchorau miri choli win ap tute, miri tati choli well soreles pral tute. Un me dau tut an i wasta diwje menshendar, kai haiwenn har te marenn le.

³⁷An i jag weh chatchedo. An tiro them nashell tiro rat. Un tu weh bistedo. Kawa penau me, o baro Dewel.