Read O Debleskro Drom - I Bibla an o Romano Rakepen 2021 Hesekijel 22 Bible Online

Hesekijel 22 - O Debleskro Drom - I Bibla an o Romano Rakepen 2021 bible

Hesekijel 22

¹Un o baro Dewel penas ap mande:

²Tu mensho, rake o tchatchepen win! Awa, rake o tchatchepen win pral o foro, hoi hi pherde marepangre! Sike leste peskro tselo djungelo koowa, hoi lo kras!

³Pen: Kawa penell o baro Dewel, maro rai: Tumer, kai djiwenn an o foro, maran bud menshen tumendar un kran tumenge chochene deblen, te wan pale-tchiddo o baro Debleske. Tumaro tsiro hi koi!

⁴Ko rateha kolendar, kai maran, anan tumer doosh ap tumende. Un kol chochene deblen, hoi tumenge kran, kolentsa kran tumen pale-tchiddo. Doleske well ko diwes sik, kai lenn tumari phagi. Tumaro tsiro hi trujel. Doleske krau, te praassenn tumen i menshe dran wawar themma. Ap i tseli phub san le pral tumende.

⁵Kolla, kai dur hi, un kolla kai gar dur tumendar djiwenn, san pral tumende. Tumaro foro well kharedo ‘pale-tchiddo foro’. Kek rikrell pes ap tchatchepaskre laba.

⁶I pralstune pral Israel, kai djiwenn an tumaro foro, krenn har te wals len jaake bud penepaske, te nai marenn le menshen.

⁷Kolla, kai an Jerusalem djiwenn, dikenn tele ap pengro dadeste un ap pengri date, un chochenn i wi-themarjen, kai pash lende djiwenn. Un kol djuwjen, kolengro rom meras, un kol tchawen, kolengro dad meras, kolen rikrenn le sorjah tele.

⁸Kowa, hoi mange kutch hi, hi tumenge tchi moldo. Un an kol diwessa, hoi mange hi, budrenn tumer.

⁹Mank tumende hi sawe menshe, kai rakrenn chochepen, te anenn le doosh ap wawarende, jaake te wenn kolla maredo. Wawar tumendar chan o mass sawe viechendar, hoi i chochene deblenge maredo wan, un krenn wi-ladjedo koowa mank tumende:

¹⁰Ko jek sowell peskro dadeskri romjah, i wawar sowell i djuwjah, kolat i djuwjakro koowa hi, ninna te kamell li kowa gar.

¹¹Ko jek sowell i wawareskri romjah, un ko wawar sowell peskro tchaweskri romjah un krell lat jaake pale-tchiddo. Pale i wawar taprell sorjah peskri phenjat an, ko tchat peskro dadestar.

¹²Hi sawe mank tumende, kai mukan pen te plaissrell, te marenn le jekes[33]. Kolen, kai sijaan pash tumende hi, kolendar lenn tumer budeder lowe pale, har patsan lenge. Tumer krenn tumen braweles ap i wawarende, kolen tumer chochenn un ap lende sorjah djan. Un man, o baro Debles, tumaro rajes, bistran tumer.

¹³Me dau mire wasta khetne kol lowenge, hoi tumer chochepah khetne anan, un ko rateske kolendar, kai pash tumende maredo wan.

¹⁴Tchatchepah, an kol diwessa, kai djau khatar tumende, atchenn tumare djia gar soreles, un tumer nai hadenn buder gar tumare wasta! Me, o baro Dewel, rakrom, un hoi penom, krau me ninna.

¹⁵Me tradau tumen an wawar themma, mank wawar menshende. Un lau o tselo pale-tchiddo koowa dran tumaro foro win.

¹⁶Un glan i jaka kol wawar menshendar hi o foro Jerusalem i praassedo foro doleske, hoi tumer kran. Un palle dikenn un haiwenn tumer, te hom me o baro Dewel.

¹⁷Un o baro Dewel penas ap mande:

¹⁸Tu, mensho, o kheer Israel was mange buder tchi moldo. I Israelitarja hi mange har koi tchik, hoi pral atchell an o bob, te was o rup an i jag djudjo kerdo. Jon hi har koi tchik dran saster, lolo saster, zinno un blaio, hoi pral atchell.

¹⁹Doleske penell tumenge o baro Dewel, tumaro rai: Tumer halauter wan mange har koi tchik, hoi pral atchell an o bob. Doleske anau tumen halauter an o foro Jerusalem khetne.

²⁰Jaake har o rup khetne o sasteha un o blaio an o bob tchiddo well, un i jag koi tel kerdo well, te nashell kowa har pani, jaake anau me tumen ninna khetne an Jerusalem. Kau foro well tumenge har i bob, kai well miri tati choli ap tumende.

²¹Awa, me anau tumen khetne, un mukau miri choli ap tumende soreles te well. Un an miri tati choli djal tumenge jaake, har te wans rup an i bob.

²²Jaake har o rup an o bob gar atchell hoi lo his, jaake djal tumenge, te well o foro Jerusalem har i bob tumenge. Un tumer dikenn un haiwenn palle, te hom me o baro Dewel, kai tchoras peskri choli pral tumende win.

²³Un o baro Dewel penas ap mande:

²⁴Tu, mensho, pen ap o them Israel: Tu hal jaake pale-tchiddo, te bitchrap buder kek brishin an ko tsiro, kai well miri choli ap tute.

²⁵Tire raja hi mank tute har lewe, kai denn gole, har dandrenn le viechen khetne. Jon marenn menshen, tchorenn penge brawlepen khetne, un krenn, te nashrenn bud romja an o them pengre romen.

²⁶Tire rashaja rissrenn mire laba trujel. Un krenn kowa pale-tchiddo, hoi mange hi. Kowa, hoi mange dino was, hi lenge gar budeder moldo har hako wawar koowa. I wawar menshenge sikrenn le gar, hoi pale-tchiddo un hoi gar pale-tchiddo hi. Un jon pandenn pengre jaka, te wenn o Debleskre diwessa gar dren rikedo. Jaake krenn le, te wap me buder gar sharedo.

²⁷Tire pralstune hi har diwje djukle, kai marenn, un hi boklo pal rat. Jon marenn menshen, te lenn le lengro koowa penge.

²⁸Un o Debleskre rakepangre tchakrenn kolengro tselo tchilatchepen latche labentsa. Jon rakrenn pral tchomone, hoi sikroms lenge. Un me sikrom len tchi. Un jon penenn chochepen glan-wi, un penenn: “Kawa penell o baro Dewel, maro rai”, kai me lenge tchi penom.

²⁹I menshe an Israel chochenn un randenn wawaren. Jon rikrenn kolen tele, kai tchorwelo hi, un kolen gar doha djipaske hi. Ninna i wi-themarjen, kai mank lende djiwenn, rikrenn le sorjah tele, un denn len gar pengro tchatchepen.

³⁰Un me rodom i murshes mank lende, kai krals i massuri trul o foro pale newes. Rodom jekes, kai tchiwas pes pre glan mande kote, kai i barra win phagedo wan, un rakrals mishto kol menshenge, te hunte marap len gar. Un me hatsom kekes.

³¹Doleske tchorau miri choli win pral lende. Miri tati choli well pral lende har i jag, un jon merenn. Jaake anau lengro tchilatchepen pale ap lengro shero. Kowa penell o baro Dewel, maro rai.