Read O Debleskro Drom - I Bibla an o Romano Rakepen 2021 Hesekijel 24 Bible Online

Hesekijel 24 - O Debleskro Drom - I Bibla an o Romano Rakepen 2021 bible

Hesekijel 24

¹Un o baro Dewel rakras mantsa an o enjato bersh, an o deshto tchon, ap o deshto diwes an ko tchon, un penas:

²Tu mensho, tchin tuke kau diwes an i liil, te well gar bistedo, hawo diwes kowa hi! Kau diwes tchiwell o baro rai dran o them Babilonia peskre lurden trul o foro Jerusalem trujel, te lenn le les dren.

³Pen mire menshenge, kai mukenn pen tchi mandar te penell, sawe laba, hoi sikrenn lenge, har kowa lenge wella! Pen lenge: Kawa penell o baro Dewel, maro rai: Tchip i piri pral i jag, un tchip ninna pani dren!

⁴Le o mass o feteder bakrestar! Un tchip i latche kotja an kai piri, i phika un i herja, un latche kokale, te well i piri pherdo! Le kasht un tchip les tel i piri! Kre, te kerell o mass mishto! Muk ninna i kokale latches win te kerell!

⁶Kawa penell o baro Dewel, maro rai: Hawi bibacht well ap o foro, hoi jaake bud rateskri doosh ap peste las! Ko foro hi har i piri, hoi gar djudjo kerdo was, un kolakro tchik gar tele djal. Le jek kotar mass pal o wawar win dran late! Muk tchi an i piri dren!

⁷Ko rat kolendar, kolen i menshe an o foro maran, hi gomme mashkral lende. Ap i baro bar nashas ko rat, un gar ap i phub, te nai tchakrals jek les tchikeha tele.

⁸Me mukom ko rat ap ko baro bar, kai well lo diklo, te mukap miri choli soreles te well pral lende, te dap len pale, hoi le kran.

⁹Kawa hi, hoi o baro Dewel, maro rai, penell: Djungeles djal tuke, tu foro, kai lal rateskri doosh ap tute! Ninna me tchiwau bud kasht khetne i jagake.

¹⁰An bud kasht khetne! Kre i jag, un kere o mass mishto! Muk i summi jaake rah te kerell, bis te buder tchi pral hi, un i kokale tele chatchenn!

¹¹Un i piri, te hi buder tchi an late dren, palle tchip lat ap ko tele chatchedo kasht, hoi gomme lolo hi, te well li tato, un lakro saster lolo o tatepastar, te djal ko tselo tchik tele, hoi les tchiklo kras!

¹²Tchitcheske his koi tseli budi! Ninna te was koi piri an i jag jaake tato, djas lakri tchik gar tele!

¹³Jerusalem, kowa, hoi kras tut pale-tchiddo, hi tiro wi-ladjedo koowa. Har kamom me ko pale-tchiddo koowa tutar krik te lell, kamal te atchell har hals. Doleske atcheh pale-tchiddo, jaake rah me miri choli ap tute win mukom!

¹⁴Me, o baro Dewel penom kowa, un me krau les ninna jaake. Kau tsiro was, te krap kowa. Me rikrau man gar pale, te dap tumen i phagi, tumer khaitenn man gar. Me krau miro dji gar pre tumenge. Tumer lenn tumari phagi pal kowa har djiwan un hoi kran. Kowa penell o baro Dewel, maro rai.

¹⁵Un o baro Dewel penas ap mande:

¹⁶Tu, mensho, djiness, ap jek kopo lau tuke ko menshes, kai tuke o kamleder hi. Tu kress kek gole un rowess gar! Kek swa wenn dran tire jaka.

¹⁷Tchorchanes nai leh phares ducho. Ma rob i bari goljah har jek pral jekeste rowell, kai meras! Rike tiro diklo[34] trul tiro shero, un ma rib tire kircha win! Ma tchake tiri tchor tele! Un ma cha ko maro, hoi kolenge anlo well, kai rowenn pral i mensheste, kai meras.

¹⁸An i tsalla rakrom ap i menshende, un ap i rat meras miri romni. Un o wawar diwes krom jaake, har o Dewel mange penas.

¹⁹Kote putchan i menshe mandar: “Hoske kreh tu kowa? Hoi kamell kowa menge penell?”

²⁰Me penom ap lende: O baro Dewel rakras mantsa un penas: Pen ap o kheer Israel:

²¹Kawa penell o baro Dewel, maro rai: Djinau, tumenge hi miro kheer o kamleder koowa. Un tumaro dji nashell pal leste. Tumer han pre-phurdo un patsenn, kolenge, kai kote hi, nai djal kek tchilatchepen. Tchatchepah, me dau miro kheer kolenge an o wast, kai krenn les pale-tchiddo. Un tumare mursh tchawe un tcha, kolen tumer kote an Jerusalem pale mukan, kolla wenn o chareha mulo dino.

²²Palle krenn tumer har me, o Hesekijel, krom: Tumare tchora tchakrenn gar tele, un tumer chan kek maro, har kolla chan, kai pral i muleste rowenn.

²³Tumare dikle mukenn trul tumare sherja un kircha ap tumare pire. Tumer denn gar gole un rowenn gar. Tumer perenn an tumende khetne, jaake baro hi i doosh ap tumende. Un mank tumende lenn tumer phares ducho.

²⁴O Hesekijel hi i sikepen tumenge. Jaake har job kras, krenn tumer palle ninna. Ap ko diwes, kai well kowa, djinenn un haiwenn tumer, te hom me o baro Dewel, tumaro rai.

²⁵Un tu mensho, djiness, me krau ko sorelo kheer paash, kolestar jon patsenn, te well i menshenge kote kek tchilatchepen, ko railo kheer, pral koleste jon jaake bachtelo hi. Un hoi jon budeder kamenna har halauter, pal koleste lengre djia nashenn, lengre mursh tchawen un lengre tchen, lau lendar krik.

²⁶Ap ko diwes, kai krau kowa, well jek pash tute, kai nai nashas peske, te penell lo kowa tuke.

²⁷Ap ko diwes well tiro mui pre kerdo, un tu nai rakreh pale. Un jaake wess tu lenge i sikepen. Palle dikenn un haiwenn le, te hom me o baro Dewel.