Read O Debleskro Drom - I Bibla an o Romano Rakepen 2021 Hesekijel 25 Bible Online

Hesekijel 25 - O Debleskro Drom - I Bibla an o Romano Rakepen 2021 bible

Hesekijel 25

¹Un o baro Dewel penas ap mande:

²Tu, mensho, dik kote, kai o them Ammon hi, un pen glan-wi, hoi pral i Ammonarjen wella!

³Pen lenge: Shunenn, hoi o baro Dewel, maro rai, tumenge penell! Kawa penell o baro Dewel, maro rai: Tumer san pral miro kheer, un penenn: Haha, har pale-tchiddo hi lo! Un pral o them Israel san tumer, un penenn: I mulo them was kowa! Ninna pral o kheer Juda san tumer, un penenn: An o pandepen anlo wan le.

⁴Doleske dau tumaro them an i wasta kolendar, kai kotar wenn, kai o kham pre djal, te tchiwenn le pengre plachtene khera pash tumende pre, un djiwenn an tumaro them. Jon chan ko djob, hoi ap tumari phub bares was, un pijenn i thud tumare viechendar.

⁵Un me krau, te well tumaro baro foro Rabba i platsa, kai i khamele chan. Un tumare gaba un forja wenn i them, kai i bakre un busja djiwenn. Un tumer dikenn un haiwenn, te hom me o baro Dewel.

⁶Kawa penell o baro Dewel, maro rai: Tumer hans tchilatcho ap o them Israel un san, har dikan, har lenge djal, un dan an i wasta un stan i bachtjatar.

⁷Doleske djau sorjah ap tumende pre, un dau tumen an o wast i menshendar dran wawar themma. Tumer wenn lenge har ko kutch koowa, hoi i kurepangre penge lenna, te wan le i sorleder an o kurepen. Un me krau, te atchess buder kek natsjona. Tumenge atchell kek them. O tselo kheer Ammon djal paash. Un tumer dikenn un haiwenn, te hom me o baro Dewel.

⁸Kawa penell o baro Dewel, maro rai: I menshe dran i themma Moab un Edom penenn: O kheer Juda hi jaake har hake wawar natsjone.

⁹Doleske dau i forja ap i berge an o them Moab an i wasta kolendar, kai krenn len paash, — kol raile sorele forja, hoi kharenn Bet-Jeshimot, Baal-Meon un Kirjatajim.

¹⁰Un me dau o them Moab kolenge, kai wenn kotar, kai o kham pre djal, te lenn le les dren. Jon hi kolla, kai ninna o them Ammon penge dren lenn. Un i Ammonarja wenn bistedo mank i wawar themma.

¹¹Ninna i Moabarjen dau lengri phagi. Jaake dikenn un haiwenn le, te hom me o baro Dewel.

¹²Kawa penell o baro Dewel, maro rai: I Edomarja dan i menshenge dran o kheer Juda pale, hoi kolla ap lende kran. Kowa dan le len jaake pale, te lan le bari doosh ap pende.

¹³Doleske penau me, o baro Dewel, tumaro rai: Me hadau miro wast, te dap o them Edom peskri phagi. Menshe un vieche wenn mulo dino. Kek atchell djido an o tselo them mank kol forja Teman un Dedan. I tsele menshe merenn an o kurepen.

¹⁴Mire menshe Israel hi kolla, kai denn i Edomarjen pengri phagi. I Israelitarjen mukau lentsa jaake trujel te djal, te well miri bari soreli choli ap lende. Un i Edomarja dikenn un haiwenn, kai me kowa hom, kai anell lengro tchilatchepen pale ap lengre sherja. Kowa penell o baro Dewel, maro rai.

¹⁵Kawa penell o baro Dewel, maro rai: An i tsele tsirja his i Filistarja ap tchingepen un kurepen mire menshentsa win. Baro tchilatchepah djan le ap lende pre, un kaman len te marell.

¹⁶Doleske penau me, o baro Dewel, tumaro rai: Me hadau miro wast, te dap i Filistarjen i phagi. I tsele menshen, kai an lengro them djiwenn, marau me, kol Kretarjen un ninna i wawaren, kai djiwenn pash o baro pani.

¹⁷Me anau lengro tselo tchilatchepen pale ap lengre sherja. Un an miri choli dau len i phari phagi. An ko tsiro, kai anau lengro tchilatchepen pale ap lengre sherja, dikenn un haiwenn le, te hom me o baro Dewel.