Read O Debleskro Drom - I Bibla an o Romano Rakepen 2021 Hesekijel 26 Bible Online

Hesekijel 26 - O Debleskro Drom - I Bibla an o Romano Rakepen 2021 bible

Hesekijel 26

¹An o 11. (deesh-te-jekto) bersh har hams an o pandepen, ap o ersto diwes an o tchon penas o baro Dewel ap mande:

²Tu, mensho, kol menshe dran o foro Tirus san un penenn pral o foro Jerusalem: Tele phagedo hi ko foro, kolestar bud parepangre win djan an wawar themma parepaske. Kanna ham mer kolla, kai wenn brawelo. O forestar Jerusalem atchas tchi har barra pral!

³Doleske penell o baro Dewel, maro rai: Kanna sikrau les tuke, tu foro Tirus! Dran bud themma anau me lurden kurepaske tuha. Jek them pal o wawar djal ap tute pre, jaake har dell o baro pani ap o themeskri rig.

⁴Un jon phagenn i massurja un i turme o forestar Tirus dren. Ninna i tseli tchik khossau lestar krik, te atchell kokres i nango baro bar, hoi djal win dran o pani.

⁵Kote tchiwenn i matchengre pengre gone win ap i phub. Kowa penom me, o baro Dewel, tumaro rai. I menshe dran wawar themma randenn o foro Tirus win.

⁶Un ninna leskre gaba wergel ap o them wenn o chareha dino. Un i menshe dikenn un haiwenn palle, te hom me o baro Dewel.

⁷Kawa penell o baro Dewel, maro rai: Me mukau o Nebukadnezar, ko baro rai dran o them Babilonia, ko sorleder i tsele rajendar, pral tute, Tirus, te well fun kotar, kai norden hi. Un khetne leha wenn graja, wurdja o kurepaske, klissepangre un bud bud lurde.

⁸Tire gaba, hoi wergel tutar ap o them hi, dell lo o chareha. Trul tire massurja mukell lo phub pre te tchiwell, te nai djan le pral wergel. Ninna mukell lo turme te krell, kolendar denn le karje an o foro. Un job mukell shilte pre te tchiwell, pal lende i lurde tardo hi.

⁹Un bare pesse kotja kasht lenn le, te denn le tire massurja trujel. Un pengre towerentsa phagenn le tire turme tele.

¹⁰Lengre graja hi jaake bud, te tchakrell tut koi tchik, hoi le pengre pirentsa pre witsrenn. Te djan le an tire pre-phagede wudja dren, trissenn tire massurja koi bari goljatar, hoi i graja un i wurdja un i klissepangre krenna.

¹¹I graja stakrenn tire tsele dromma paash. Tire menshe wenn o chareha mulo dino. Un tire sorele barrengre turme perenn ap i phub.

¹²Un jon randenn tiro brawlepen un tchorenn, hoi tuke parepah khetne anal. Tire massurja wenn tele phagedo, un tire shukar khera paash kerdo. Kol barra un ko kasht un tchik, hoi pral atchell, wenn an o baro pani witsedo.

¹³Me krau, te well buder kek gipen an tute shunlo, witar kek dorjengro bashepen[35].

¹⁴Me krau, te wess i nango baro bar, ap koleste i matchengre pengre gone win tchiwenn. Un tu wess buder gar newes kerdo. Kawa penom me, o baro Dewel, tumaro rai.

¹⁵Kawa penell o baro Dewel, maro rai, ap o foro Tirus: Te pereh tu khetne bari goljah, palle trissenn i tikne themma, hoi an o baro pani tchiddo hi. Kolla, kai kote djiwenn, trissenn i darjatar, te shunenn le kol budendar, kai maredo wan, un shunenn i gole kolendar, kai tchurje dino wan i charentsa.

¹⁶Un i raja an kol themma pash o baro pani stenn pengre raile beshepangre pre, un djan lendar tele, un riwenn pengre kutch baja un shukar gada win, un riwenn paash koola[36] an. Un beshenn ap i phub un mukenn gar tele te trissell.

¹⁷Un jon giwenn kai ropaskri gili pral tute: Ach, har wal tu an kotja dino, tu sharedo sorelo foro! Pash o baro pani hals tchiddo. Tu un kolla, kai an tute djiwan, hans i raja ap o baro pani. Tumendar daras o tselo them.

¹⁸Kolla, kai djiwenn ap i tikne themma hoi an o baro pani tchiddo hi, trissenn kanna ap kau diwes, kai tu khetne peral. Har bango hi le i trashatar, kai tu tele djal!

¹⁹Kawa penell o baro Dewel, maro rai: Me krau, te wess tu i mulo foro har kol forja, kai buder kek djiwell. Me mukau bud pani pral tute te well, te djas tele.

²⁰Un witsrau tut tele pash kolende an o mulengro them, pash kol menshende, kai meran glan i rah tsiro. Dur tella an i phub, pash kowa, hoi kol phure forjendar pral atchas, hoi tele djan, dau tut i platsa pash i mulende. Jaake nai djiwell buder kek an tute. Tu weh buder kek foro ap i phub, kai i djide djiwenn.

²¹Kowa hoi tuha djal, krell, te trissell hakeno, kai tutar shunell. Un tut dell buder gar. Te weh rodedo, weh buder gar hatslo. Kawa penell o baro Dewel, maro rai.