Read O Debleskro Drom - I Bibla an o Romano Rakepen 2021 Hesekijel 28 Bible Online

Hesekijel 28 - O Debleskro Drom - I Bibla an o Romano Rakepen 2021 bible

Hesekijel 28

¹Un o baro Dewel penas ap mande:

²Tu mensho, pen ap o rajeste pral o foro Tirus: Kawa penell o baro Dewel, maro rai: Tiro dji hadas pes un penas: “Me hom i dewel! Un hom beshdo ap i debleskri beshepaskri mashkral dren an baro pani!” Ninna te kreh, har te wals i dewel, hal tchi har i mensho!

³Hi tchatcho, tu hal gosweder har o Daniel, un haiweh halauter.

⁴Tiro goswepah un ko koweha, hoi tu halauter djineh, anal tuke ko tselo brawlepen khetne. Tiro brawleskro kheer hi pherdo sonakai un rup.

⁵Bari goswepah paral tiro koowa un wal brawelo un brawleder. Tiro tselo brawlepen kras tut pre-phurdo.

⁶Doleske penell o baro Dewel, maro rai: Tu hadal tut un kreh, har te wals i dewel,

⁷doleske bitchrau wi-themarja, kai djan ap tute pre, — sorele lurden dran bud themma, kai silah[45] ap wawarende djan. Lengre charentsa krenn le ko railo un shukar koowa paash, hoi tiro goswepah tuke khetne anal.

⁸Jon marenn tut. Un tu mereh har jek, kai o chareha maredo well — mashkral ap o baro pani.

⁹Te dikeh tu palle kolenge an o mui, kai tut mulo denn, peneh buder gar: “Me hom o Dewel!” Te hal an i wasta kolendar, kai marenn tut, haiweh, te hal i mensho un kek dewel.

¹⁰Tu meress har jek, kai hi gar tchinlo ap peskro mass[46]. Wi-themarja denn tut mulo. Kawa penau me, o baro Dewel.

¹¹Un o baro Dewel penas ap mande:

¹²Tu, mensho, gib i ropaskri gili pral o baro rajeste o forestar Tirus, un pen leske: Kawa penell o baro Dewel, maro rai: Ap tute was diklo, har jek hi, koleske lauter mishto djas. Baro goswepen his tut un hals jaake shukar, te djals gar shukeder.

¹³Tut his i shukar djipen, har te djiwals an o Debleskri bar ‘Eden’. Ap tute his hake kutch barra: Rubin, Topas, Diamant, Krisolit, Onyx, Jaspis, Safiro, Karfunkel un Smaragdo. Kol barra his an shukar kerdo sonakai dren pandlo, un tuke koi, te less len ap ko diwes, kai boldo wal.

¹⁴Tu hals har i sorelo bolepaskro, kai dell jak. Un ap miri Debleskri berga tchiwom tut. Mank kutch barra, hoi dikan win har jag, djal tu trujel.

¹⁵Ap ko diwes har tut krom, his kek doosh ap tute. Un jaake atchal bis ko diwes was, kai tchilatchepen kral.

¹⁶Har tiro parepah brawelo wal, rikral wawaren sorjah tele. Un jaake lal doosh ap tute. Koi krom me tut pale-tchiddo, un tradom tut tele miri bergatar. Tu bolepaskro, kai jak dal, tut tradom win dran koi platsa, kai i kutch barra hi, hoi dikenn win har jag.

¹⁷Tiro shukapen kras tut pre-phurdo. Un har brawelo un railo wal, kral sawo koowa, hoi gar gosewo hi. Doleske witsrom tut ap i phub, un mukom i wawar bare rajen ap tute tele te dikell, te wess lenge sapaske.

¹⁸Har paral tiro koowa chochepah, anal bud doosh ap tute. Jaake kral tu tire deblengre khera pale-tchiddo. Doleske mukom mashkral an tiro foro i jag win te phagell, hoi chatchras o foro pre, te atchas tchi har tchik pral. Hakeno nai dikas har tuke djas.

¹⁹I menshenge an i wawar themma, kai prindjran tut, atchenn i balla tardo, kai tu jaake sik tele djal un buder gar pre weh.

²⁰Un o baro Dewel penas ap mande:

²¹Tu, mensho, dik kote, kai o foro Sidon hi, un pen glan-wi, hoi pral o foro wella!

²²Un pen: Kawa penell o baro Dewel, maro rai: Kanna sikrau les tuke, tu foro Sidon! Ap tute sikrau, har baro un sorelo me hom, te dikenn un haiwenn i menshe an tute, te hom me o baro Dewel. Te well miri phagi pral tute, sikrau i menshende, te hom o tchatcho Dewel.

²³An tute phagell i pharo djungelo nasslepen win. Un an tire dromma nashell o rat kolendar, kai maredo wan o chareha. Haki rigjatar wenn kol lurde, kai marenn tire menshen. Palle dikell un haiwell hakeno, te hom me o baro Dewel.

²⁴I themma trul o them Israel dikenn kanna gomme tele ap o Israel un dukrenn les. Jon hi i Israelenge har i subja i subjengre burrendar. I tsiro well, kai hi kowa buder gar jaake. Palle dikenn i menshe, te hom me, o baro Dewel, lengro rai.

²⁵Me, o baro Dewel, tumaro rai, penau: An ko tsiro, kai anau me i Israelitarjen pale khetne dran i tsele wawar themma, kai wan le tradedo, sikrau koleha i menshen an i tsele themma te hom me o tchatcho Dewel. Un i Israelitarja djiwenn pale an pengro them, hoi dom me miro budepaskres, o Jakobeste.

²⁶Un jon djiwenn an ko them, un len hunte well kek daar i wawar themendar. Jon krenn penge khera un tchiwenn drakengre ruka an i phub. Un kek nai krell lenge tchilatchepen. An ko tsiro kai dau kol themma trul lende pengri phagi, kai tele dikan ap i Israelitarja, dikenn un haiwenn i Israelitarja, te hom me o baro Dewel lengro Dewel.