Read O Debleskro Drom - I Bibla an o Romano Rakepen 2021 Hesekijel 29 Bible Online

Hesekijel 29 - O Debleskro Drom - I Bibla an o Romano Rakepen 2021 bible

Hesekijel 29

¹An o deshto bersh an o deshto tchon ap o 12. (deesh-te-duito) diwes an ko tchon penas o baro Dewel ap mande:

²Tu, mensho, dik kote, kai o them Egiptia hi, un pen glan-wi, hoi well ap leskro baro rajeste, o Faraeste, un ap o tselo them Egiptia.

³Pen leske: Kawa penell o baro Dewel, maro rai: Tu Farao, baro rai pral Egiptia, kanna sikrau les tuke! Tu hal har i baro tchilatcho viecho tchiddo an tire bare lengste panja, un peneh: “Ko baro lengsto pani hi miro. Mange krom les.”

⁴Me dau sasterne kanengre tchurje an tiro mui. Un krau te atchenn i matche an tire shuppe pandlo. Palle tserdau tut win dran o pani khetne kol matchentsa, kai ap tute pandlo hi.

⁵Me witsrau tut an o mulo them, tut un i tsele matche dran tire bare lengste panja. Ap i phub witsrau tut. Kote atcheh tchiddo. Un kek well, kai hadell tut pre un paskrell tut. Me dau tut i diwje viechenge un i tchirklenge chapaske.

⁶Jaake dikenn un haiwenn halauter, kai an o them Egiptia djiwenn, te hom me o baro Dewel. Tu, Egiptia, hals i menshenge an o them Israel har i shilftikro khass.

⁷Te tapran le pengre wastentsa ap tute, phagal un dal lenge an i rig tchurje. Un te rikran le pen ap tute, phagal, un jon dukran pengro dumo.

⁸Doleske penell o baro Dewel, maro rai: Dik, me anau o kurepen pral tute. Un i menshe un vieche an tute wenn mulo dino.

⁹Un i tseli Egiptia well i mulo them, kai tchi har barra pral atchenn. Un jon dikenn un haiwenn palle, te hom me o baro Dewel. Tu, Farao, penal: “Kau baro lengsto pani hi miro. Me hom kowa, kai kras les.”

¹⁰Doleske shun! Kanna sikrau les tuke un tire lengste panja. O tselo them Egiptia well i mulo them, kai tchi har barra pral atchenn fun o foro Migdol bis pash o foro Syene un bis ap koi rig, kai o them Etiopia tchiddo hi.

¹¹An o tselo them Egiptia djal buder kek mensho trujel, witar kek viecho. 40 (Star-deesh) bersha djiwell buder kek an o them.

¹²Me krau ko them Egiptia, te well lo i mulo them, jaake har i wawar themma trul leste mule themma hi. Star-deesh bersha atchell leskre forjendar tchi har barra pral, jaake har pash kol wawar forja ninna hi, hoi an i themma koi trujel tchiddo hi. Un i Egiptarjen tradau an wawar themma, te djiwenn le mank wawar menshende.

¹³Ninna penau me, o baro Dewel, tumaro rai: Te hi kol star-deesh bersha trujel, palle anau i Egiptarjen dran kol themma pale khetne, an kolende jon tradedo wan.

¹⁴Me krau, te well lenge lauter pale mishto, un anau len an o them Patros, an ko them, kolestar jon wenna. Kote well len palle i tikno rajeskro them,

¹⁵tikneder har wawar rajengre themma, te hadenn le pen buder gar pral wawar themma. Me krau, te well len gar bud penepaske, te nai wenn le buder gar i raja pral wawar themma.

¹⁶Jon wenn gar buder kolla, pash kolende i Israelitarja nashenn un lendar putchenn, te wenn le lenge ap i rig. Har le kowa kran, anan le bari doosh ap pende. Kowa hunte bistrenn le gar. Palle dikenn un haiwenn le, te hom me o baro Dewel, lengro rai.

¹⁷An o 27. (biish-te-eftato) bersh an o jekto tchon ap o jekto diwes an ko tchon penas o baro Dewel ap mande:

¹⁸Tu, mensho, shun! O Nebukadnezar, ko rai pral o them Babilonia, mukas peskre lurden i phari budi te krell, har lan le o foro Tirus dren: Ap lengre sherja his buder kek balla, un lengre phika his pre un jek dukepen. Fothe jon ninna budran, an o foro Tirus his leske un leskre lurdenge kek plaissepen.

¹⁹Doleske penell o baro Dewel, maro rai: Kamau te dap o them Egiptia o rajeske Nebukadnezar an i wasta, te lell job ko tselo brawlepen kote krik un mukell o them win te randell. Un kowa, hoi jon khetne randan, well palle o plaissepen leskre lurdenge.

²⁰O Nebukadnezar un leskre lurde budran mange, har pandan le o foro Tirus dren un kran les paash. Doleske well lenge o them Egiptia lengri budjake. Kowa penau me, o baro Dewel, tumaro rai.

²¹An ko tsiro mukau me o kheer Israel pale soreles te well. Un tuke, Hesekijel, krau o mui pre, te rakress mire laba mank lende. Palle dikenn un haiwenn le, te hom me o baro Dewel.