Read O Debleskro Drom - I Bibla an o Romano Rakepen 2021 Hesekijel 3 Bible Online

Hesekijel 3 - O Debleskro Drom - I Bibla an o Romano Rakepen 2021 bible

Hesekijel 3

¹Un job penas ap mande: Tu, mensho, cha kowa, hoi glan tute hi! Cha kau liil, un dja pash i menshende Israel, un rake ap lende!

²Un me krom miro mui pre. Un job das man ko liil chapaske,

³un penas mange: Tu, mensho, cha kau liil, hoi tut dau! Un kre tiro per pherdo leha! Un me chom les. Un an miro mui his lo gudlo har gwin[2].

⁴Un job penas ap mande: Tu, mensho, ste pre un dja pash o kheer Israel! Un pen lenge kol laba, hoi tuke penau!

⁵Me bitchrau tut gar pash sawe menshende, kolen i wawar tchip hi, kolengro rakepen tu gar haiweh. Na-a, pash o kheer Israel bitchrau tut.

⁶Te bitchroms tut pash sawe menshende, kolen i wawar tchip hi, un kolengro rakepen tu gar haiweh, kolla shunans ap tute.

⁷Kolla dran o kheer Israel kamenn gar ap mande te shunell. Doleske shunenn le witar gar ap tute. Jon lauter djan pal pengro shero. Un lengre djia hi har dran bar.

⁸Dik, me dau tut i soor, te dikess lenge an o mui, un krau te well tiro shero har saster, jaake har lengre sherja ninna hi.

⁹Awa, krau tut sorelo har i bar, awa jaake sorelo har i diamanto. Ma dare lendar, muk tuke kek traash te krell lendar. Jon hi menshe, kai mukenn pen tchi te penell.

¹⁰Un pale penas job ap mande: Tu, mensho, mire tsele laba, hoi me tuke penau, de jak ap lende, un le len an tiro dji!

¹¹Dja pash i menshende dran tiro them, kai pandles krik anlo wan an o them Babilonia! Rake ap lende un pen lenge, hoi me o baro Dewel, lengro rai, kamell lenge te penell! Nai well, te shunenn le. Nai well, te shunenn le gar.

¹²Un i ducho[3] hadas man pre. Un pal mande shunom me i bari soreli gole, hoi penas: Sharenn o railepen o baro Deblestar kote, kai lo khere hi!

¹³Un kol tchirklengre mussja fun kol bolepangre kran i bari soreli gole, har das jek mussi ap i wawareste. Ninna i rade pash lende kran jaake bari gole, har te trissals i phub soreles.

¹⁴Un o ducho hadas man pre un las man krik. Un an mande his i bari choli. Kowa, hoi o baro Dewel mande sikras[4], his phares tchiddo ap mande.

¹⁵Un me wom pash kolende, kai pandlo krik anlo his, un an o gab Tel-Abib djiwan pash o lengsto pani, hoi kharell Kebar. Efta diwessa homs kote beshdo pash lende, un homs har mulo kolestar, hoi dikom.

¹⁶Un har kol efta diwessa trujel his, penas o baro Dewel ap mande:

¹⁷Tu, mensho, wess kowa, kai dikell i bibacht te well un penell kowa i Israelenge dureder, jaake har jek ap i foro jak dell, un i menshenge penell, te wenn lurde. Te penau me tuke i lab, hunte peness kowa lenge, te djinenn le, hoi kamau ap lende te anell.

¹⁸Te penau me ap i tchilatcheste: Tu hunte meress! Palle hunte peness tu leske kowa, un dess les trad, jaake te nai djal lo peskro tchilatcho dromestar tele, un atchell djido. Te peneh tchi, lell lo peskri phagi un hunte merell. Ap tute penau me palle: Tut hi doosh ap leskro merepen.

¹⁹Tu te dal les trad, un job djal gar tele peskro tchilatcho dromestar, un djiwell dureder an o tchilatchepen, palle lell lo peskri phagi, un hunte merell. Tiro djipen lal tu dran o merepen win.

²⁰Te djal i latcho mensho peskro latcho dromestar tele, un krell o tchilatchepen, un tu deh les gar trad, krau, te perell lo. Peskri doshake hunte merell lo. Un ko latchepen, hoi kras lo glan kowa, well bistedo. Ap tute penau me palle: Tut hi doosh ap leskro merepen.

²¹Tu te penal ap ko latcheste: Risse trujel! Un job shunell ap tute un mukell o tchilatchepen, tchatchepah palle atchell lo djido. Un tiro djipen lal tu dran o merepen win.

²²Un i soor o baro Deblestar was kote pral mande, un job penas ap mande: Kre tut ap o drom, un dja win an o telstuno them. Un kote kamau me tuha te rakrell.

²³Un me krom man ap o drom un djom win an o telstuno them. Un kote dikom me pale o railepen o baro Deblestar, jaake har dikom les, har homs pash o pani Kebar. Un me mukom man ap i phub te perell.

²⁴Kote was i soor o Deblestar an mande dren, un tchiwas man ap mire herja. Un o baro Dewel penas ap mande: Tu mensho, dja an tiro kheer un pande tut dren!

²⁵Shun, hoi tuha djala! Tu weh pandlo shellentsa, te nai djah gar win pash i menshende.

²⁶Jon hi sawe menshe, kai mukenn pen tchi te penell. Doleske krau, te nai rakress buder gar, un nai dess len buder gar trad.

²⁷Ap ko tsiro kai rakrau pale tuha, krau me tiro mui pre. Un tu peness palle ap lende: Kawa penell o baro Dewel, maro rai … Koon kamell te shunell, kowa shunell ap tute. Koon kamell gar te shunell, kowa shunell gar ap tute. Jon hi menshe, kai mukenn pen tchi te penell.