Read O Debleskro Drom - I Bibla an o Romano Rakepen 2021 Hesekijel 32 Bible Online

Hesekijel 32 - O Debleskro Drom - I Bibla an o Romano Rakepen 2021 bible

Hesekijel 32

¹An o 12. (deesh-te-duito) bersh ap o 12. (deesh-te-duito) tchon, ap o jekto diwes an ko tchon, penas o baro Dewel ap mande:

²Tu, mensho, gib i ropaskri gili pral o Farao, ko baro rajeste o themestar Egiptia, un pen leske: Tu patseh, te hal har i terno lewo, o bareder rai mank i tsele rajende, un hal har i baro tchilatcho viecho an o baro pani. An kol lengste panja, kai djiweh, phurdal ducho dran tiro nak, te das o pani pre karje. Un tire herjentsa stakral jaake, te was i tchik dran o pani pre un o pani tchiklo.

³Kawa penell o baro Dewel, maro rai: Me bitchrau bud menshen dran bud themma pash tute. Kolla witsrenn miri netsa pral tute, un taprenn tut, un tserdenn tut win dran o pani.

⁴Un me witsrau tut ap i phub, un mukau tut kote tchiddo ap o them. Un krau, te beshenn pen i tsele tchirkle ap tute tele. Un i tsele diwje viechen krau tchalo tiro masseha.

⁵Un me tchiwau tiro mass ap i berge, un krau i tsele tale pherdo tiro mulo masseha.

⁶Un me dau o themes tiro rat te pijell, hoi nashell bis pash i berge, un i tikne panja wenn pherdo lestar.

⁷Ap ko diwes kai tiro djipen wi-phurdedo well, tchakrau o bolepen tele, un i bolepangre momlia wenn kalo. Un glan o kham djan wolke, un o tchon[51] well buder gar diklo.

⁸I tsele momlia ap o bolepen pral tute wenn kalo. Un pral tiro them anau tamlepen. Kawa penell o baro Dewel, maro rai.

⁹Kowa, hoi tuha djas, har tu tele djal, shunenn le an bud themma, ninna an sawen, kolen tu gar prindjreh. Un i menshe an bud themma lenn bari daar.

¹⁰Ap ko tsiro, kai well miri phagi ap tute, atchenn lenge i balla tardo. Un lengre raja trissenn i darjatar, te dikenn le, hoi tuha krau. Te hadau miro charo glan lende, trissenn le o tselo tsiro. Hakeno darell peskro djipaske.

¹¹Kawa penell o baro Dewel, maro rai: O baro rai dran o them Babilonia well, te kurell lo pes tuha.

¹²Khetne leha wenn kol sorele lurde dran bud themma, kai tchilatche sorjah ap wawarende djan. Jon denn i menshen an tiro them mulo pengre charentsa. Palle hi i Egiptarja buder gar pre-phurdo. Lengro tselo brawlepen well krik lino[52].

¹³Un lengre tsele viechen mukau te merell, te atchell kek djido pash kol bare lengste panja. Jaake te nai krell buder kek mensheskri piri witar kek viecheskri heri ko pani tchiklo.

¹⁴Palle krau lengre panja pale djudjo, te nashenn lengre lengste panja har djet. Kawa penell o baro Dewel, maro rai.

¹⁵Te krom me o them Egiptia, te well lo i wi-meredo them, un lom lauter krik, hoi kote dren hi, un dom halauteren, kai kote djiwan, palle dikenn un haiwenn le, te hom me o baro Dewel.

¹⁶Kawa hi i ropaskri gili, hoi i menshe giwenn. An i tsele themma giwenn i djuwja kai gili. Pral o them Egiptia un leskre tsele menshende giwenn le kai ropaskri gili, penell o baro Dewel, maro rai.

¹⁷An o 12 (deesh-te-duito) bersh ap o 15. (deesh-te-pantchto) diwes an ko tchon, penas o baro Dewel ap mande:

¹⁸Tu, mensho, rob pral i menshende an o them Egiptia, khetne kol djuwjentsa dran i wawar sorele themma! Un bitche i Egiptarjen tele an o mulengro them pash i mulende.

¹⁹Pen ap o them Egiptia: Hal tu kanna shukeder har i wawar themma? Dja tele pash i mulende! Tchip tut pash kolende, kai hi gar tchinlo ap pengro mass[53]!

²⁰Mashkral kolende, kai o chareha maredo wan, wenn i Egiptarja tchiddo! Tchatchepah, o charo well pral i Egiptarjen! Anenn len kai un denn len lauter mulo!

²¹An o mulengro them penenn lendar i sorele kurepangre, un kolla, kai lenge ap i rig wan: Jon wan tele pash mende, kote hi le tchiddo, kolla, kai hi gar tchinlo ap pengro mass, un wan o chareha maredo.

²²Kote hi o Assur peskre tsele menshentsa. Trul leste trujel hi le paskedo, halauter maredo o chareha.

²³Jon hi paskedo an i telstuneder platsa an o mulengro them. Trul leste trujel hi le paskedo. Maredo o chareha hi le halauter, kolendar i wawaren bari daar his an ko tsiro, har le djido his.

²⁴Kote hi o Elam peskre tsele menshentsa. Trul leste trujel hi le paskedo. Jon halauter wan maredo o chareha, un djan tele an o mulengro them, kolla, kai gar tchinlo wan ap pengro mass. Har le djido his, his i wawaren bari daar lendar. Kanna hunte hidjrenn le pengri ladj khetne kol wawarentsa an o mulengro them.

²⁵Mashkral kolende, kai wan maredo, hi le tchiddo pengre tsele menshentsa. Trul leste trujel hi le paskedo. jon halauter, kai gar tchinle hi ap pengro mass, un o chareha maredo wan. Har le djido his, his i wawaren bari daar lendar. Kanna hunte hidjrenn le pengri ladj khetne kol wawarentsa an o mulengro them, un hunte wenn tchiddo mank kolende, kai o chareha maredo wan.

²⁶Kote hi o Meshech-Tubal peskre tsele menshentsa. Trul leste trujel hi le paskedo. Jon halauter hi gar tchinlo ap pengro mass un wan o chareha maredo. Har le djido his, his i wawaren bari daar lendar.

²⁷Un jon hi gar kote tchiddo, kai i sorele kurepangre tchiddo hi, kai an o phuro tsiro meran, un khetne pengre karmangre paskedo wan. Kolenge wan lengre chare tel lengre sherja tchiddo. Un lengre shilte wan pral lengre kokale tchiddo. Har le djido his, his le sorele kurepangre, kolendar i wawar daran.

²⁸Ninna tu Egiptia weh phagedo, un weh tchiddo mashkral kolende, kai hi gar tchinlo ap pengro mass khetne kolentsa, kai o chareha maredo wan.

²⁹Kote hi o Edom un leskre raja un leskre tsele pralstune. Ninna te his le jaake sorelo, hi le kanna kote tchiddo, kai kolla tchiddo hi, kai o chareha maredo wan. Kote an o mulengro them hi le tchiddo pash kolende, kai gar tchinlo hi ap pengro mass.

³⁰Kote hi i pralstune pral i tsele themma, kai hi kote tchiddo, kai norden hi. Kote hi ninna i tsele Sidonarja, kai pash kolende tele djan, kai wan maredo. Ninna te kran le wawarenge bari daar, hi kanna lengri bari soor paash dino. Jon hi gar tchinlo ap pengro mass un hi tchiddo pash kolende, kai o chareha maredo wan, un hidjrenn pengri ladj khetne kol wawarentsa an o mulengro them.

³¹O Farao un leskre lurde dikenn len halauteren. Palle hi leske buder gar jaake ropaske pral kol tsele menshende an leskro them, kai wan khetne leha maredo o chareha. Kawa penell o baro Dewel, maro rai.

³²Har o Farao djido his, mukom bari daar glan leste win te djal pash i menshende ap kai phub. Kanna hi lo tchiddo mank kolende, kai hi gar tchinlo ap pengro mass, khetne kolentsa, kai o chareha maredo wan, o Farao un leskre tsele menshe. Kawa penell o baro Dewel, maro rai.