Read O Debleskro Drom - I Bibla an o Romano Rakepen 2021 Hesekijel 33 Bible Online

Hesekijel 33 - O Debleskro Drom - I Bibla an o Romano Rakepen 2021 bible

Hesekijel 33

¹Un o baro Dewel penas ap mande:

²Tu, mensho, rake ap i menshende dran tiro them, un pen lenge: Te anau me o charo pral i them, un i menshe an ko them rodenn i murshes lendar win, te dell job jak,

³un job dikell lurden te well, palle phurdell lo an i phurdepaskri[54], te djinenn i menshe, hoi wella.

⁴Te shunell jek palle i phurdepaskri, un dell gar jak koi pre, un i lurde wenna un denn les mulo, palle hi les kokres doosh ap peskro merepen.

⁵Job shunas koi phurdepaskri un das gar jak koi pre. Les kokres hi doosh ap peskro merepen. Te dals lo jak ap i phurdepaskri, palle lals lo peskro djipen dran o merepen win.

⁶Hi wawartchandes, te dikell kowa, kai jak hunte dell, i lurden te well, un job phurdell gar an i phurdepaskri, te djinenn i menshe, hoi pral lende wella. Un palle wenn i lurde un denn jekes mulo. Palle merell kawa peskri doshake, hoi lo ap peste anas. Ap koleste, kai gar an i phurdepaskri phurdas, penau me palle: Tut hi doosh ap leskro merepen.

⁷Tu, mensho, tut rodom win, te dess jak ap o kheer Israel. Te shuneh i lab dran miro mui, hunte peness kowa lenge, te djinenn le, hoi kamau me pral lende te anell.

⁸Te penau me ap i tchilatcheste: Tu tchilatcho, hunte meress! Palle hunte peness tu leske kowa, un dess les trad, jaake te nai djal lo peskro tchilatcho dromestar tele. Te peneh tchi, lell lo peskri phagi un hunte merell. Ap tute penau me palle: Tut hi doosh ap leskro merepen.

⁹Tu te dal les trad, un penal leske, te hunte djal lo tele peskro tchilatcho dromestar, un job krell kowa gar, palle lell lo peskri phagi, un hunte merell. Tiro djipen lal tu dran o merepen win.

¹⁰Tu mensho, pen ap o kheer Israel: Tumer penenn: Mari doosh un ko tchilatcho koowa, hoi kram, hi phares ap mende tchiddo. Mer nai hidjrah kowa buder gar. Har nai djiwah mer gomme?

¹¹Pen ap lende: O baro Dewel, maro rai penell: Me dau man sowel pash miro djipen: Mange hi gar shukar, te merell o tchilatcho mensho. Na-a me kamaus, te djal lo peskro tchilatcho dromestar tele, un djiwell lo! Doleske, djan tele tumare tchilatche dromendar! Hoske kamenn tumer te merell, tumer dran o kheer Israel?

¹²Tu mensho, pen i menshenge dran tiro them: I mensho, kai kras, hoi latcho un tchatcho hi, te djal job ap i tchilatcho drom, hunte merell lo. Ko latcho un tchatcho koowa, hoi lo glan kowa kras, lell les gar dran o merepen win. I tchilatcho mensho, te mukell lo peskro tchilatcho drom, hunte merell gar. Ko tchilatcho koowa, hoi lo glan kowa kras, anell les gar an o merepen. Un ko latcho un tchatcho koowa, hoi kras i latcho mensho, kai palle ap i tchilatcho drom was, nai lell les gar dran o merepen win.

¹³Te penau me ap i latcho un tchatcho mensho: Tu djiwess! Un job patsell, kanna nai djal leske tchi, un krell o tchilatchepen, palle well ko tselo tchatchepaskro koowa bistedo, hoi lo kras. Un job merell peskro tchilatchepaske, hoi job kras.

¹⁴Un te penau ap o tchilatcheste: Tu meress! Un job mukell peskro tchilatcho drom un krell kanna, hoi mishto un latcho hi,

¹⁵un dell koleste kowa pale, hoi lo koleske las, har lo leske tchomone patsas, un dell ninna kowa pale, hoi lo tchoras, un djiwell kanna pal kol laba, hoi o djipen anenn, un krell buder gar o tchilatchepen — palle djiwell lo! Job merell gar!

¹⁶Ko tselo tchilatchepen, hoi lo kras, well bistedo. Kanna djiwell lo an o tchatchepen. Doleske atchell lo djido.

¹⁷I menshe dran tiro them penenn: “O Dewel djal gar pal o tchatchepen.” Hi gar jaake, te hi jon kolla, kai djan gar pal o tchatchepen?

¹⁸Te mukell kowa, kai latcho un tchatcho his, peskro latcho drom un krell o tchilatchepen, palle merell lo doleske.

¹⁹Un te mukell o tchilatcho peskro tchilatcho drom, un krell, hoi mishto un latcho hi, palle atchell lo doleske djido.

²⁰Ninna te hi kowa jaake, penenn tumer: “O Dewel djal gar pal o tchatchepen.” Djinenn, tumer dran o kheer Israel: Me krau pral tumende o tchatchepen win, pral hakeneste jaake har job djiwas.

²¹An o 12. (deesh-te-duito) bersh, kai mer pandlo krik lino hams, an o deshto tchon, ap o pantchto diwes an ko tchon, kote was jek pash mande, kai nai nashas peske dran o foro Jerusalem, un penas: O foro hi dren lino!

²²I rati glan kowa was o wast o baro Deblestar phares ap mande. Kanna ap koi tsalla, kai kowa pash mande was, kras o baro Dewel miro mui pre, jaake te nai rakrom pale.

²³Un o baro Dewel penas ap mande:

²⁴Tu, mensho, kolla, kai an kol khetne dine forja an o them Israel djiwenn, penenn: “O Abraham his jek, un kowa las o tselo them peske dren. Mer ham bud, — tchatchepah, menge hi o them dino!”

²⁵Doleske pen lenge: Kawa penell o baro Dewel, maro rai: Tumer chan ko mass o rateha, un mangenn chochene deblen an un marenn menshen! Patsenn tchatchepah, ko them hi tumaro?

²⁶Tumare charentsa lenn tumenge, hoi kamenn, un krenn, hoi djungelo hi glan mire jaka, un ko jek sowell i romjah o wawarestar. Patsenn tchatchepah, ko them hi tumaro?

²⁷Jaake peness tu lenge: Kawa penell o baro Dewel, maro rai: Pash miro djipen dau man sowel, halauter, kai an kol tele phagede forja djiwenn, wenn maredo o chareha. Un kolla, kai win ap o them djiwenn, wenn khetne dandedo i diwje viechendar. Un kolla, kai khatrenn pen an sorele barrengre khera un an i phub, kolla merenn ap i djungelo nasslepen.

²⁸Un me krau o them, te well lo i wi-meredo them, te nai wenn tumer buder gar pre-phurdo un sorelo. I berge an Israel wenn i mulo them, kai buder kek pral wergel djal.

²⁹Tumer krenn, hoi glan mire jaka djungelo hi. Doleske krau ko them, te well lo i wi-meredo them. Palle dikenn un haiwenn tumer, te hom me o baro Dewel.

³⁰Tu, mensho, i menshe dran tiro them rakrenn pral tute an o foro un glan lengre khera, un penenn jek ap o wawareste: “Awenn un shunenn, hoi o baro Dewel penas!”

³¹Un jon wenn pash tute jaake, har menshe khetne wenn, un beshenn pen pash tute, un shunenn, hoi peneh. Kowa, hoi penal, krenn le gar. Pengre mujentsa penenn le, te kamenn le man. Lengro dji djal koleske palla, har le bud lowe nai krenn.

³²Un tu, tu hal lenge har sawo, kai giwell pirneskre gilja[55], un haiwell shukar te giwell un bashrell. Jon shunenn tire laba, un krenn len gar.

³³Djiness, kowa hoi penal glan-wi, well tchatchepah jaake! An ko tsiro, kai well kowa, dikenn un haiwenn le, te his i Debleskro rakepaskro mashkral lende.