Read O Debleskro Drom - I Bibla an o Romano Rakepen 2021 Hesekijel 35 Bible Online

Hesekijel 35 - O Debleskro Drom - I Bibla an o Romano Rakepen 2021 bible

Hesekijel 35

¹Un o baro Dewel penas ap mande:

²Tu, mensho, dik kote, kai i berga Seir hi, un pen glan-wi, hoi pral o them Edom wella!

³Pen leske: Kawa penell o baro Dewel, maro rai: Kanna sikrau les tuke, tu berga Seir. Un djau sorjah ap tute pre, un krau tutar te wess i mulo un muklo them.

⁴Tire forjendar atchell tchi har barra pral. O tselo them well i mulo them. Palle dikeh un haiweh, te hom me o baro Dewel.

⁵O tselo tsiro hals ap tchingepen un marepen win kol Israelentsa. Un tu phukral len un dal len an i wasta kolendar, kai maran len, an ko tsiro har bari bibacht pral lende was, un me lenge lengri phagi dom.

⁶Doleske dau man sowel pash miro djipen, me o baro Dewel, tumaro rai: Tu lal rateskri doosh ap tute, doleske wess tu ninna maredo. Me mukau tut te marell, un tu nai nasheh tuke gar.

⁷Un me krau i berga Seir, te well li i mulo un muklo them. Un mukau kekes djido, kai kote dren oder win djal.

⁸Un me krau tire berge, te wenn le pherdo kolentsa, kai maredo wan an o kurepen. Ap i tikne berge, un an i tale, un an i tikne panja hi kolla tchiddo, kai o chareha mulo dino wan.

⁹Hako tsireske wess i mulo them. An tire forja djiwell buder kek. Palle dikenn un haiwenn tumer, te hom me o baro Dewel.

¹⁰Tumer penan: “Kol dui themma Israel un Juda pengre menshentsa hunte wenn maro. Las len menge dren!” Tumer bistran, te hi kowa miro them, kai me, o baro Dewel, djiwau.

¹¹Doleske dau man sowel pash miro djipen, penell o baro Dewel, maro rai: Me krau tumentsa har tumer kran ap i Israelitarja. Kowa, hoi ap lende kran an tumari choli, har hans tchilatcho un silweran ap lende, kowa mukau pale te perell ap tumare sherja. Jaake well miri choli pral tumende, un me sikrau mire menshende, koon me hom.

¹²Palle dikenn un haiwenn tumer, te shunom me o baro Dewel, ko tselo djungelo koowa, hoi tumer pral i berge Israel rakran, har tumer penan: I berge Israel hi wi-meredo koi tchiddo. Kanna hi le menge koi.

¹³Jaake phurdan tumen pre, un tumaro baro mujeha hadan tumen pral mande. Me shunom halauter.

¹⁴Kawa penell o baro Dewel, maro rai: Tu, berga Seir, me krau tutar, te wess i mulo them. Un ap i tseli phub wenn menshe bachtelo koi pral.

¹⁵Tu hals bachtelo, har was o Israelengro them i mulo them. Doleske krau, te djal tuke jaake har lenge djas. I berga Seir khetne o tselo them Edom well i mulo them. Palle dikenn un haiwenn i menshe, te hom me o baro Dewel.