Read O Debleskro Drom - I Bibla an o Romano Rakepen 2021 Hesekijel 36 Bible Online

Hesekijel 36 - O Debleskro Drom - I Bibla an o Romano Rakepen 2021 bible

Hesekijel 36

¹Tu, mensho, rake ap i berge an Israel un pen lenge, hoi lentsa djal, un pen: Tumer berge Israel: Shunenn, hoi o baro Dewel penell!

²Kawa penell o baro Dewel, maro rai: Kolla, kai chojedo pral tumende hi, san pral tumende un penenn: Haha! Kal berge, kai his hako tsiro koi, wan kanna menge!

³Doleske pen ap i berge, hoi wella! Pen: Kawa penell o baro Dewel, maro rai: Hi tchatcho, jon kran, te wan tumer i mulo them. Haki rigjatar wan le un stakran o them khetne. Un menshe dran i themma trul tumende wan un lan tumaro them penge. Un i menshe rakrenn djungeles pral tumende.

⁴Doleske shunenn, tumer berge Israel, hoi o baro Dewel penell! Kawa penell o baro Dewel, maro rai, ap i bare un tikne berge, ap i panja un tale, ap i barra, hoi i tele-phagede kherendar pral atchan, un ap i mukle forja. I menshe dran i themma trul tumende, randan tumen win, un tumer wan lenge sapaske.

⁵Doleske penell o baro Dewel, maro rai: Tchatchepah, an miri tati choli rakrom me i phagi win pral i menshende an o them Edom un an i themma trul tumende, kolla miro them penge lan, te randenn le les win. Koi pashel san le pen mulo pral tumende, te djas tumenge jaake, un praassan tumen.

⁶Doleske pen glan-wi, hoi pral o them Israel wella. Pen ap i bare un tikne berge, ap i panja un tale: Kawa penell o baro Dewel, maro rai: Tumer hunte hidjran sawo baro praassepen kol wawar menshendar. Doleske hom chojedo pral lende, un an miri tati choli rakrau i phagi win pral lende.

⁷Doleske penau me, o baro Dewel, tumaro rai: Me hadau miro wast un dau man sowel: Tchatchepah, kol wawar menshe, kai djiwenn an i themma trul tumende, jon hi kolla, kai wenn praassedo wawarendar.

⁸Tumer berge Israel, ap tumende wenn pale ruka baro un senelo, un hidjrenn rukengre mire menshenge Israel. Sik well ko tsiro, kai wenn le pale khere.

⁹Tumer dikenn: Me hom ap tumari rig, un dikau latches ap tumende. Un ap tumende budrenn pale hache un witsrenn djob win ap i phub.

¹⁰Un me krau, te wenn i menshe bud, kai djiwenn ap tumende. O tselo kheer Israel, halauter lendar, djiwenn kote. Palle djiwenn le pale an lenge forja. Un kol tele-phagede forja wenn pale newes kerdo.

¹¹Un me krau, te wenn i menshe un vieche bud ap tumende. Jon lenn bud tchawe. Un me krau te nai djiwenn i menshe kote jaake, har an i phure tsirja his. Un krau tumenge budeder latchepen har an kek tsiro glan kowa. Palle dikenn un haiwenn tumer, te hom me o baro Dewel.

¹²Un me mukau pale mire menshen Israel ap tumende te djiwell. Tumer berge wenn pale lengro them, kai djiwenn le hako tsiro. Un tumer krenn buder gar, te merenn lengre tchawe i bokatar.

¹³Kawa penell o baro Dewel, maro rai: Pal o them Israel well penlo: “Ko them marell peskre menshen, un krell, te merenn i tchawe kolendar, kai an leste djiwenn.”

¹⁴Doleske penau me, o baro Dewel, tumaro rai: Kowa te well buder gar jaake! Tu chah buder gar menshen! Un kreh buder gar, te merenn i tchawe kolendar, kai an tute djiwenna.

¹⁵Me krau, te shuness buder gar o praassepen kolendar dran wawar themma, un hunte ladjess tut buder gar glan lende. Tu kreh buder gar, te hi tumare menshen buder kek tchawe. Kawa penell o baro Dewel, maro rai.

¹⁶Un o baro Dewel penas ap mande:

¹⁷Tu, mensho, har o kheer Israel an peskro them djiwas, kran le sawo koowa, un djiwan jaake, te was o them pale-tchiddo. Lengro djungelo djipen his mange har ko pale-tchiddo tsiro i djuwjatar, kolat pengro koowa hi.

¹⁸Jon maran menshen, un mangan djungele deblen an. Jaake kran le o them pale-tchiddo. Doleske mukom miri choli ap lende te well.

¹⁹Un me tradom len an wawar themma mank wawar menshende, un dom len pengri phagi koleske, hoi le kran un har le djiwan.

²⁰An hawo them, kai le ninna wan, was lendar penlo: “I menshe o baro Deblestar hi kalla, un hunte djan penge dran leskro them.” Jaake anan le ladj ap miro latcho lab.

²¹Kote, kai le wan, rakran i menshe djungeles pral mande. Kowa dukas man, te was miro latcho lab an i tchik tserdedo.

²²Doleske pen ap o kheer Israel: Kawa penell o baro Dewel, maro rai: Tumer kran, kai was djungeles rakedo pral mande mank i menshende an wawar themma, pash kolende tumer wan. Kowa, hoi kanna krau, krau gar tumenge dran o kheer Israel. Na-a, kowa krau, te well miro latcho lab pale sharedo.

²³Tumer kran, kai was djungeles rakedo pral miro baro lab mank i menshende an wawar themma. Un me krau, te wap pale sharedo. Kowa hoi krau tumenge, sikrell lende, te hom tchatchepah o Dewel. Un jon hunte dikenn un haiwenn, te hom me o baro Dewel. Kowa penau me, o baro Dewel, tumaro rai.

²⁴Me lau tumen win dran i tsele themma un wawar menshendar. Un lau tumen khetne un anau tumen an tumaro them.

²⁵Me witsrau djudjo pani ap tumende, te wenn djudjo halauterestar, hoi kras tumen pale-tchiddo. Ko tselo tchilatchepen, hoi ap tumende anan, har mangan i chochene deblen an, thowau tumendar tele.

²⁶Me dau tumen i newo dji, un tchiwau i newo ducho an tumende, un lau ko dji dran bar dran tumende win, un dau tumen i dji dran mass.

²⁷Me dau miro ducho an tumende, un me krau sawe menshe tumendar, kai krenn, hoi tumendar kamau, un djiwenn pal mire tchatchepaskre laba, un rikrenn len dren.

²⁸Un tumer djiwenn an kau them, hoi dom tumare phurende, un han mire menshe, un me hom tumaro Dewel.

²⁹Un me lau tumen win dran ko tselo koowa, hoi kras tumen pale-tchiddo. Un o djob mukau pale bares un bud te well, un mukau buder kek bok pral tumende te well.

³⁰Me krau, te anenn i ruka bud rukengre. Un kowa hoi ap i phub pre djal, well bud un budeder. I menshe dran wawar themma nai san buder gar pral tumende, doleske, kai hi tumen tchi te chal.

³¹Un palle well tumenge an o shero, har tchilatcho kowa his, hoi kran un har djiwan. Un ko tselo tchilatcho koowa, hoi kran, un har i chochene deblen an-mangan, well tumenge tchadepaske.

³²Me o baro Dewel, tumaro rai penau tumenge: Hi gar tumenge, kai me krau kau latcho koowa. Ma bistrenn kowa! Tumer dran o kheer Israel, ladjenn tumen un awenn lolo i ladjatar pral kowa, hoi kran!

³³Kawa penell o baro Dewel, maro rai: An ko tsiro, kai me tumari doosh tumendar tele thowom, mukau tumen pale an tumare forja te djiwell. Palle nai krenn tumer i forja pale newes, kolendar kanna tchi har barra pral hi.

³⁴Un ap tumaro them budrenn pale i hache. Palle hi ko them buder gar mulo un muklo tchiddo glan i jaka halauterendar, kai kote djan.

³⁵Palle penenn le: Kau them his muklo un diwjo. Kanna hi lo har i baar Eden. Un kal forja his paash-dino, tele-phagedo un wi-meredo. Kanna hi le soreles koi tardo, un menshe djiwenn pale dren.

³⁶Un kol menshe an i wawar themma trul tumende, kai djido atchan, kolla dikenn un haiwenn, te krom me, o baro Dewel, kowa newes, hoi tele-phagedo his, un mukom senlepen un djob bares te well kote, kai tchi bares was. Me, o baro Dewel, penom kowa glan-wi, un me krau kowa ninna jaake.

³⁷Kawa penell o baro Dewel, maro rai: Ninna kowa krau i menshenge dran o kheer Israel: Te mangenn le mandar, mukau lendar jaake bud te well, har hi len bakre.

³⁸An kol forja, kolendar kanna tchi har barra koi hi, djiwenn palle jaake bud menshe, har his bakre an o foro Jerusalem an kol bare diwessa, har kol bakre o baro Debleske maredo un chatchedo wan. Un jon dikenn un haiwenn palle, te hom me o baro Dewel.