Read O Debleskro Drom - I Bibla an o Romano Rakepen 2021 Hesekijel 37 Bible Online

Hesekijel 37 - O Debleskro Drom - I Bibla an o Romano Rakepen 2021 bible

Hesekijel 37

¹I soor o baro Deblestar was pral mande, un leskro ducho hidjras man win, un mukas man tele mashkral an i buchli tala. Koja his pherdo mule kokale.

²Un job mukas man mank lende trujel te djal an i tseli tala. Un me dikom, kote his bud bud kokale, un jon his truk.

³Un job penas ap mande: “Tu, mensho, wenn kal mule kokale pale djide menshe?” Un me penom: “Baro Dewel, miro rai, tu djineh kowa.”

⁴Kote penas lo ap mande: Pen glan-wi, hoi kal kokalentsa djal! Pen ap lende: Tumer truk kokale, shunenn, hoi o baro Dewel penell!

⁵Kawa penell o baro Dewel, maro rai, ap kal mule kokale: Me anau ducho an tumende, un tumer wenn djido.

⁶Un me tchiwau muskle ap tumende, un mukau mass pral tumende te well, un tserdau hauta pral. Un dau ducho an tumende, te wenn djido. Un tumer dikenn un haiwenn pale, te hom me o baro Dewel.

⁷Un me rakrom kol laba win, jaake har mange penlo was. Un har kal laba win rakrom, das i gole[59], har kal kokale khetne wan — kokalo ap kokalo djas pale khetne.

⁸Un me dikom, muskle un mass djan pral lende, un hauta tserdas pes pral. Gomme his kek ducho an lende.

⁹Un o baro Dewel penas ap mande: Tu, mensho, rake laba win, hoi mandar wenna! Pen ap o ducho: Kawa penell o baro Dewel, maro rai: Tu ducho, ab dran hake rigja, un phurde ap kol marede menshende, te wenn le djido!

¹⁰Un me rakrom kal laba win, jaake har mange penlo was. Un o ducho was un djas an lende. Un jon wan djido, un tchiwan pen ap pengre herja tardo. Kolla his bud bud lurde.

¹¹Un job penas ap mande: Tu, mensho, i Israelitarja hi har kal mule kokale. Kanna penenn le: “Mare kokale hi truk, un halauter hi nashedo, mentsa hi trujel.”

¹²Doleske pen lenge laba, hoi mandar wenna. Pen lenge: Kawa penell o baro Dewel, maro rai: Mire menshe, me krau tumare grufte pre. Un mukau tumen dran tumare grufte win te well. Un me anau tumen an o them Israel.

¹³Mire menshe, an ko tsiro, kai krau tumare grufte pre, un lau tumen dran tumare grufte win, palle dikenn un haiwenn tumer, te hom me o baro Dewel.

¹⁴Un me dau miro ducho an tumende, te djiwenn pale. Un me tchiwau tumen an tumaro them. Un tumer dikenn un haiwenn palle, te hom me o baro Dewel, un krau, hoi penom. Kowa penell o baro Dewel.

¹⁵Un o baro Dewel penas ap mande:

¹⁶Tu, mensho, le tuke i kotar kasht, un tchin ap leste: O rajeskro them Juda[60]. Un le i wawar kasht un tchin ap koleste: O rajeskro them Israel[61].

¹⁷Un an kol dui kashta khetne, ko jek pash o wawareste, jaake te well lendar jek kasht an tiro wast.

¹⁸Un te putchenn tutar i Israelitarja, kai pash tute hi: Kameh tu menge gar te penell, hoi kamell kowa te sikrell?

¹⁹Palle pen ap lende: Kawa penell o baro Dewel, maro rai: Dik, me lau o kasht, hoi sikrell o kheer Israel — ko kasht hi an o Efrajimeskro wast — un tchiwau les pashel pash o kasht, hoi sikrell o kheer Juda, un krau lendar, te wenn le jek kasht, koles rikrau an miro wast.

²⁰Un kol kashta, ap kolende tu tchinal, rike an tiro wast glan lengre jaka.

²¹Un pen ap lende: Kawa penell o baro Dewel, maro rai: Denn jak, me lau i Israelitarjen dran kol tsele themma win, an kolende jon hunte djan, un lau len khetne haki rigjatar, un anau len pale an lengro them.

²²Un me krau lendar, te wenn le jek natsjona an o them, ap i berge Israel. Un jek rai kokres well pral lende halauter rai. Un jon hi buder gar dui natsjone an dui themma dui rajentsa.

²³Un jon mangenn buder gar pengre chochene deblen un djungele figuren an, un krenn pen buder gar pale-tchiddo dran kolende un dran ko wawar djungelo koowa, hoi le kran. Me lau len win dran lengri doosh, hoi le pale te pale ap pende anan, har le miro dromestar tele djan. Un me krau, te hi le buder gar pale-tchiddo. Un jon wenn mire menshe, un me wau lengro Dewel.

²⁴Un jek dran i familja o Davidestar, kai hi har o David miro budepaskro, well lengro baro rai. Job well i bakrengro kolenge halauterenge, un dell jak ap lende. Un jon djiwenn pal mire tchatchepaskre laba un krenn, hoi lendar kamau.

²⁵Un jon djiwenn pale an ko them, hoi dom me miro budepaskres o Jakobeste, an koleste tumare phure djiwan Hako tsireske djiwenn le kote, jon un lengre tchawe un kolengre tchawe. Un jek dran i familja o Davidestar, kai hi har o David miro budepaskro, well lengro rai hako tsireske.

²⁶Un me pandau miro dji ap lende, un krau lentsa win, te nai djiwenn le an o latchepen. Kowa te atchell hako tsireske jaake. Un me mukau len bud te well, un krau lendar i soreli natsjona. Un miro kheer[62] atchell mashkral lende hako tsireske.

²⁷Un me djiwau mank lende. Un me hom lengro Dewel, un jon hi mire menshe.

²⁸Miro kheer atchell mashkral lende hako tsireske. Palle dikenn un haiwenn i menshe an i wawar themma, te rodom me o baro Dewel, i Israelitarjen mange win, te wenn le mire menshe.