Read O Debleskro Drom - I Bibla an o Romano Rakepen 2021 Hesekijel 38 Bible Online

Hesekijel 38 - O Debleskro Drom - I Bibla an o Romano Rakepen 2021 bible

Hesekijel 38

¹Un o baro Dewel penas ap mande:

²Tu, mensho, dik kote, kai o them Magog hi, un pen ap o Gog, ko pralstuneste pral i natsjone Meshech un Tubal, hoi pral leste wella.

³Pen: Kawa penell o baro Dewel, maro rai: Gog, tu pralstuno pral i natsjone Meshech un Tubal, kanna sikrau les tuke!

⁴Un krau, te rissress tut trujel. Un me dau sasterne kanengre tchurje an tiro mui. Un tserdau tut win dran tiro them tire tsele lurdentsa, i grajentsa un kolentsa hoi ap lende klissenn, halauter shukar an-rido. Bud bud lurde hi le, un hidjrenn bare un tikne shilte un chare.

⁵Mank lende hi lurde dran Persia, Etiopia, un Libia pengre sasterne stadjentsa un pengre shiltentsa.

⁶Koi pashel hi ninna i tsele lurde dran i themma Gomer un Bet-Togarma, kai kote djiwenn, kai norden hi. Awa, lurde dran bud themma djan tuha.

⁷De jak, Gog! Krenn lauter, te nai djan an o kurepen, tu un tire tsele lurde, kai wan khetne, te djan le an o kurepen tuke! Un tu wess lengro pralstuno!

⁸Bud bersha djan gomme trujel bis te wenn tumer khetne gole dino o kurepaske. Pal i rah tsiro djas tu tire lurdentsa an i them, hoi pal i kurepen pale newes kerdo was, un koleskre menshe dran bud themma khetne anlo wan, te djiwenn le ap i berge an Israel. I rah tsiro his kau them wi-meredo. Kanna wan leskre menshe win anlo dran bud themma, un djiwenn kote kek darjah.

⁹Un tu djah pre an o them, un weh pral lende har i sorelo phurdepen, un har i wolka, hoi o tselo them tele tchakrell, tu un tire tsele lurde un kol bud lurde dran wawar themma, kai tuha djan.

¹⁰Kawa penell o baro Dewel, maro rai: An ko tsiro well tchomone pre an tiro dji, un tu leh tuke tchilatcho koowa glan.

¹¹Un peneh tuke: Me kamau pral ko them te perell, kai kek massurja trul leskre forja hi. Un kamau pral kolende te well, kai djiwenn an o latchepen kek darjah. Kek massurja un pandle wudja hi trul lengre gaba un forja.

¹²Tu kameh te randess lengro koowa, un te tchoress tuke lengro brawlepen. Lengre gaba un forja kameh tuke dren te lell, hoi paash-dino his, un kai kanna pale menshe djiwenn. Un kameh ap kol menshende pre te djal, kai dran wawar themma pale kate khetne wan, kolen pale vieche hi, un penge wawar brawlepen khetne lan. Jon djiwenn an ko them, hoi hi mashkral ap i phub.

¹³I menshe dran i forja Saba un Dedan un kol tsele parepangre dran o foro Tarsis un leskre pralstune penenn palle ap tute: Dikah, tu wal, te randess! Un mukal tire tsele lurden khetne te well, te tchorenn le penge rup un sonakai, un lenn penge viechen un halauter, hoi tchomone moldo hi. Awa, koi hi bud, hoi nai randeh tuke khetne!

¹⁴Tu, mensho, pen ap o Gog laba, hoi mandar wenna! Pen: Kawa penell o baro Dewel, maro rai: An ko tsiro, kai mire menshe Israel an o latchepen djiwenn kek darjah, kreh tu tut ap o drom.

¹⁵Awa, tu weh dran tiro them, hoi dur krik kote hi, kai norden hi. Un lurde dran bud themma djan tuha, kai halauter ap graja klissenna. Bud bud lurde hi le, un khetne hi len i bari soor.

¹⁶Un tu djah ap mire menshen Israel pre, un tire lurde tchakrenn o them har i wolka. An o palstuno tsiro well kowa jaake, te mukau tut pral miro them te well, te nai dikenn i menshe an wawar themma, koon me hom. Te dikenn le hoi krau tuha, Gog, haiwenn le, te hom me o Dewel.

¹⁷Kawa penell o baro Dewel, maro rai, ap tute: Tu hal ko mursh, kolestar mukom mire rakepangren glan i rah tsiro te rakrell, kolla, kai kran, hoi lenge penom. An lengro tsiro penan le i Israelenge glan-wi, te mukau tut pral lende te well.

¹⁸Un an ko tsiro, kai well o Gog un perell an o them Israel dren, well miro choli pre an mande, penell o baro Dewel, maro rai.

¹⁹Un an miri bari un tati choli dau man sowel: Tchatchepah, an ko tsiro trissell i phub an o them Israel soreles.

²⁰Un glan mande trissenn i matche an o baro pani, i tchirkle un i wawar vieche, bare un tikne, hoi djiwenn ap i phub. Ninna i tsele menshe trissenn i darjatar. Un i berge phagenn khetne, i bare barra un i massurja perenn khetne.

²¹Un me dau o charo gole, te well lo pral o Gog ap mire tsele berge, penell o baro Dewel, maro rai. Leskre lurde djan pengre charentsa jek ap o wawareste pre.

²²Un me dau les peskri phagi: I pharo nasslepen un marepen well ap leste. Un sorelo brishin, brishineskre barra, un jag un shwefla mukau ap lende tele te well, ap leste un ap leskre lurdende, un ap kol bud lurdende dran wawar themma, kai leha djan.

²³Un jaake sikrau me glan i jaka bud menshendar dran wawar themma, te hom i sorelo Dewel. Un jon dikenn un haiwenn palle, te hom me o baro Dewel.