Read O Debleskro Drom - I Bibla an o Romano Rakepen 2021 Hesekijel 39 Bible Online

Hesekijel 39 - O Debleskro Drom - I Bibla an o Romano Rakepen 2021 bible

Hesekijel 39

¹Tu, mensho, pen ap o Gog, hoi pral leste wella! Pen: Kawa penell o baro Dewel, maro rai: Kanna sikrau les tuke, Gog, tu pralstuno pral i natsjone Meshech un Tubal.

²Un krau, te rissress tut trujel, un tserdau tut win dran ko them, hoi dur krik kote hi, kai norden hi. Un me anau tut ap i berge Israel.

³Un me dau tuke tiro bogo dran tiro serwo wast, un tire faile dran tiro tchatcho wast.

⁴Ap i berge Israel weh tu mulo dino, tu un tire tsele lurde, ninna kol lurde dran wawar themma, kai tuha wan. Un me dau tumen i diwje viechenge un hake tchirklenge, kai mass chan, te chal.

⁵Un tumer atchenn mulo tchiddo ap i phub. Me, o baro Dewel, penom kowa.

⁶Un me bitchrau jag ap i forja an o them Magog, un ap kolende, kai djiwenn pash o baro pani, un kolen kek daar hi wawarendar. Palle dikenn un haiwenn le, te hom me o baro Dewel.

⁷Me sikrau mire menshenge Israel, te hom o Dewel, un mukau buder kek ladj ap mande te anell. I menshe an wawar themma hunte dikenn un haiwenn, te hom me o baro Dewel, o Dewel pral o Israel.

⁸Denn jak, kowa, hoi penom, wella, un well sik. Kowa hi o diwes kolestar me rakrom, penell o baro Dewel, maro rai.

⁹Un kolla, kai djiwenn an i forja an o them Israel, djan palle win, un lenn kol karmangre kol mule lurdendar khetne, un krenn jag un chatchrenn len, kol tikne un bare shilte, kol boge un faile, kol kashtene depangre un witsepaskre tchurja. Un kolentsa krenn le efta bersha pengri jag.

¹⁰Un jon hunte lenn buder kek kasht an o weesh khetne, witar gar hunte denn le ruka tele, te well len jagakro kasht. Na-a, kol karmangre lenn le un krenn lentsa pengri jag. Un jon randenn kolen win, kai kaman len win te randell. Kolla, kai kaman pash lende te tchorell, wenn kanna lendar win tchoredo. Kawa penell o baro Dewel, maro rai.

¹¹An ko diwes dau i platsa an o them Israel, kai well o Gog paskedo. Koja hi koi tala, hoi kharell Abarim, un hi pash o baro pani ap koi rig, kai o kham pre djala. Kote well job peskre bud lurdentsa paskedo. Doleske nai djan kolla, kai ap i raisa hi, buder gar wergel. Koi tala well kharedo Tala Hamon Gog[63].

¹²Un i Israelitarja paskrenn len, te atchell o them buder gar pale-tchiddo. Len hunte well efta tchonna[64], te paskrenn le len halauter.

¹³Un i tsele menshe an o them Israel paskrenn len. Koleske wenn le sharedo i wawar menshendar ap ko diwes, kai sikrau har baro un railo hom. Kowa penell o baro Dewel, maro rai.

¹⁴Un pal kal efta tchonna bitchrenn le murshen win, te djan jon an o tselo them trujel un rodenn pal mulen, kai pral atchan, te wenn le paskedo, te atchell o them buder gar pale-tchiddo.

¹⁵Un te djan kolla an o them trujel un hatsenn menshengre kokale, palle hunte tchiwenn le i sikepen pre, hoi sikrell, te hi i mulo koi tchiddo, bis te wenn kolla, kai paskrenn ko mules an i Tala Hamon Gog,

¹⁶gar dur ko forestar Hamona[65]. Un jaake krenn le, te hi ko them buder gar pale-tchiddo.

¹⁷O baro Dewel, maro rai penas ap mande: Tu, mensho, pen ap i tsele tchirkle un ap i tsele diwje vieche: Awenn khetne, awenn kai, awenn khetne haki rigjatar, pash ko baro chapen[66], hoi krau tumenge. Kowa well i baro chapen ap i berge Israel. Awenn, chan mass un pijenn rat!

¹⁸Chan o mass i sorele lurdendar, un pijenn o rat i pralstunendar ap kai phub! Jon wenn maredo, har te wans le thulle vieche, kai o Debleske maredo wenn, har murshkane bakre, tikne bakre, busja un gurma[67], kai halauter dran o them Bashan hi.

¹⁹Pash kau chapen, hoi tumenge krau, chan tumer thulepen, bis te han tchalo. Un pijenn rat bis te han mato.

²⁰Chan i grajen un i klissepangren, i pralstunen un i tsele lurden! Chan tumen tchalo ap miri chapaskri! Kawa penell o baro Dewel, maro rai.

²¹Un me sikrau i menshenge an wawar themma, har baro un railo me hom. Halauter dikenn, har me o tchatchepen win krau pral o Gog, un hawi sorjah dau les un leskre lurden pengri phagi.

²²Un an ko tsiro dikenn un haiwenn i Israelitarja, te hom me o baro Dewel, lengro Dewel, un bistrenn kowa buder gar.

²³Un i menshe an wawar themma dikenn un haiwenn palle, te wan i Israelitarja pengri doshake, hoi le ap pende anan, an o pandepen anlo. Jon rikran buder gar ap mande. Doleske mukom len. Un dom len an o wast kolendar, kai kuran pen lentsa. Jaake wan lengre tsele lurde o chareha maredo.

²⁴Jon kran pen pale-tchiddo glan mire jaka, har djan le miro dromestar tele. Doleske mukom len, un dom lenge lengri phagi jaake har mishto his.

²⁵Kanna krau, penell o baro Dewel, maro rai, te well lauter pale mishto o Jakobeske, un krau miro dji pre o tselo khereske Israel. Miro tselo djijeha krau, te well buder gar djungeles rakedo pral mande.

²⁶An ko tsiro, kai djiwenn le pale kek darjah an pengro them, un kek len traash krell, bistrenn le ko tsiro, kai was bari ladj ap lende har mukan le man.

²⁷Me anau len pale dran i themma kolendar, kai kuran pen lentsa un wan i sorleder, un anau len pale khetne an o them Israel. Un jaake sikrau bud menshen an wawar themma, te hom me o Dewel.

²⁸Palle dikenn un haiwenn i Israelitarja, te hom me, o baro Dewel, lengro Dewel, kowa kai anas len an o pandepen an wawar themma, un mukell len palpale te well an lengro them. Kek lendar atchell kote pale.

²⁹Me tchorau miro ducho win ap o kheer Israel, un mukau len buder gar. Kawa penell o baro Dewel, maro rai.