Read O Debleskro Drom - I Bibla an o Romano Rakepen 2021 Hesekijel 40 Bible Online

Hesekijel 40 - O Debleskro Drom - I Bibla an o Romano Rakepen 2021 bible

Hesekijel 40

¹His an o 25. (biish-te-pantchto) bersh, kai mer an o pandepen hams — kowa his an o 14. (deesh-te-starto) bersh har o foro Jerusalem dren lino was — ap o 10. (deshto) diwes an ko bersh. Ap ko diwes was i soor o baro Deblestar pral mande. Un job anas man an o foro Jerusalem.

²An i visiona anas lo man an o them Israel, un mukas man tele ap i bari berga, hoi dur pre djas. Ap koi rig i bergatar, kai o kham pralstunes tardo hi, dikom tchomone, hoi win dikas har i foro.

³Un job anas man kote, un dikom i murshes. Kowa dikas win har wals lo dran saster. An leskro wast his i laintikri dori un i kasht, koleha jek tele ginell, har bares tchomone hi. Un job his mashkral an o baro wudar tardo.

⁴Un ko mursh penas ap mande: Tu, mensho, dik un shun mishto, un de jak ap halauter, hoi sikrau tut. Doleske wal tu kate anlo, te sikrap kowa tuke. Halauter, hoi kate dikal, pen i menshenge dran o kheer Israel!

⁵Un dikom i massuri, hoi win hi trul o Debleskro kheer. Un ko mursh ginas ko kashteha tele, har bares koi massuri hi. Ko kasht his jaake triin metarja lengsto. Un koi massuri his jaake pesso har ko kasht lengsto his, un djas ninna jaake dur pre har ko kasht.

⁶Un job djas pash o baro wudar, hoi ap koi rig hi, kai o kham pre djal. Un djas i treppa pre. Un dikas pal, har dur ko wudar dren djal. Un kowa djas jaake dur dren, har ko kasht lengsto his — triin metarja.

⁷Dren an o wudareskro kheer his ap hake dui rigja triin iseme. Haki isema his jaake lengsto har buchlo, — triin metarja lengsto un triin metarja buchlo. Un i massurja, hoi mank lende hi, his 2,5 (dui-te-paash) metarja pesso. Palla an o wudareskro kheer his pale i wudar, hoi djas triin metarja dren. Koi pal his koi wudareskri halla wergel o Debleskro kheer.

⁸Un job dikas pal, har baro koi wudareskri halla hi.

⁹Kaja his star metarja lengsto. Palla an lakri massuri his i kotar pre, kai djah win. Tchatches un serwes kolestar his i massuri jek metari pesso. Wergel koi wudareskri halla his o Debleskro kheer.

¹⁰Un kol tikne iseme, hoi his ap kol dui rigja dren an o baro wudar[68], his triin ap haki rig, hakeni jaake buchlo har koi wawar. Un i massurja mank lende his ninna emligo buchlo.

¹¹Pal kowa dikas job pal, har lengsto un buchlo o wudareskro drom his: Kowa his 6,5 (shob-te-paash) metarja lengsto un pantch metarja buchlo.

¹²Un glan i tikne iseme, his ap haki rig i tikni massuri i paash metari baro. Haki isema his triin metarja lengsto un triin metarja buchlo.

¹³Un job dikas pal, har buchlo o tselo baro wudar hi: fun i winstuni rig fun koi jek tikni isema bis pash i winstuni rig fun koi tikni isema wergel: Fun jek rig ap i wawar his 12,5 (deesh-te-dui-te-paash) metarja.

¹⁴Un koi wudareskri halla his deesh metarja buchlo. Un i glanstuni platsa djas bis pash i massuri fun ko baro wudar.

¹⁵Un o tselo wudareskro drom fun win, kai weh dren, bis pash koi wudareskri halla his 25 (biish-te-pantch) metarja lengsto.

¹⁶Un an i tikne iseme, hoi his ap kol dui rigja, his tikne wochja an kol winstune massurja. Ninna an i wudareskri halla his wochja ap lakre dui rigja. Un dren an kol massurja his palmtikre ruka dren dino.

¹⁷Un job anas man an i bari glanstuni platsa[69]. Un trul i glanstuni platsa trujel djas i barrengro drom[70]. Un pal o barrengro drom his trijanda tikne iseme tardo trul i glanstuni platsa.

¹⁸Un ko barrengro drom djas trul i tseli platsa, un djas jaake dur dren ap i platsa har i bare wudja. Ko barrengro drom his o telstuneder drom.

¹⁹Un ko mursh dikas pal, har buchlo koi bari glanstuni platsa hi: Fun o telstuno wudar bis pash i massuri, hoi djas trul i tikni glanstuni platsa his 50 (paash-sheel) metarja. Kawa his koi rig, kai o kham pre djal. Palle djas lo glan mande ap koi rig, kai norden hi.

²⁰Un ko mursh dikas pal, har baro un buchlo ko wudar hi, hoi glan i bari glanstuni platsa hi ap koi rig, kai norden hi.

²¹An kau wudareskro kheer his ninna tikne iseme, triin ap haki rig. Un leskre massurja un koi wudareskri halla his jaake baro har pash ko wawar baro wudar, kote kai o kham pre djal. Khetne his kau wudar 25 (biish-te-pantch) metarja lengsto un 12,5 (deesh-te-dui-te-paash) metarja buchlo.

²²Un leskre wochja un leskre palmtikre ruka, hoi an i massurja dino hi, his jaake har pash ko baro wudar ap koi rig, kai o kham pre djal. Glan kau wudar djan efta stufe pre. Un les his i wudareskri halla ap i wawar rig.

²³Un jaake har pash ko wudar ap koi rig, kai o kham pre djal, his pash kau wudar ap i nordetikri rig. Wergel lestar his i baro wudar, hoi djas an i tikni glanstuni platsa. Un ko mursh ginas tele, har dur hi fun ko jek wudar bis pash ko wawar. Un kowa his 50 (paash-sheel) metarja.

²⁴Palle anas man ko mursh ap koi rig, kai o kham pralstunes tardo hi. Un ap kai rig dikom ninna i baro wudar. Un job dikas pal, har baro leskre massurja un koi wudareskri halla hi. Un jon his jaake baro har pash kol wawar bare wudja.

²⁵Un kote his wochja an o wudar un an i wudareskri halla, jaake har pash kol wawar bare wudja. Khetne his kau wudar 25 (biish-te-pantch) metarja lengsto un 12,5 (deesh-te-dui-te-paash) metarja buchlo.

²⁶Un glan kau wudar djan efta stufe pre. Un les his i wudareskri halla ap i wawar rig. Un palmtikre ruka his an lakre massurja dren dino ap haki rig.

²⁷Un wergel kau baro wudar his ninna i wawar wudar, hoi djas an i tikni glanstuni platsa. Kol dui bare wudja his ap koi rig, kai o kham pralstunes tardo hi. Un ko mursh dikas pal har dur his fun ko jek wudar bis pash o wawar. Kowa his 50 (paash-sheel) metarja.

²⁸Un ko mursh djas mantsa an kau baro wudar, kai kote hi, kai o kham pralstunes tardo hi, un dureder ap i tikni glanstuni platsa. Un job dikas pal, har baro kau wudar hi. Un kowa his jaake baro har kol wawar wudja.

²⁹Un leskre tikne iseme un leskre massurja un koi wudareskri halla, jon his jaake baro, har kolla an i wawar bare wudja. Koi his ninna wochja an o wudareskro kheer un an i glanstuni halla. Khetne his kau wudar 25 (biish-te-pantch) metarja lengsto un 12,5 (deesh-te-dui-te-paash) metarja buchlo.

³⁰Un koi trujel his glanstune halle. Khetne his le 12,5 (deesh-te-dui-te-paash) metarja lengsto un 2,5 (dui-te-paash) metarja buchlo.

³¹Un i wudareskri halla djas bis pash i bari glanstuni platsa. Un an lakri massurja his palmtikre ruka dren dino. Ochta stufe djan kote pre.

³²Un job anas man an koi tikni glanstuni platsa ap koi rig, kai o kham pre djal. Un dikas pal, har baro ko baro wudar kote hi. Un kowa his jaake baro har kol wawar.

³³Un leskre tikne iseme un leskre massurja un i wudareskri halla, jon his jaake baro har kolla an i wawar wudja. Koi his ninna wochja an o wudar un an i wudareskri halla. Khetne his kau wudar 25 (biish-te-pantch) metarja lengsto un 12,5 (deesh-te-dui-te-paash) metarja buchlo.

³⁴Un koi wudareskri halla djas bis pash koi bari glanstuni platsa. Un an i massurja ap lakre dui rigja his palmtikre ruka dren tchinlo. Un ochta stufe djan kote pre.

³⁵Un job anas man pash ko wudar, hoi kote hi, kai norden hi. Un dikas pal, har baro kawa hi. Kowa his jaake baro har kol wawar.

³⁶Les his tikne iseme, massurja, i wudareskri halla un wochja trul leste. Khetne his kau wudar 25 (biish-te-pantch) metarja lengsto un 12,5 (deesh-te-dui-te-paash) metarja buchlo.

³⁷Un koi wudareskri halla djas bis pash koi bari glanstuni platsa. Un an lakre massurja his palmtikre ruka dren tchinlo. Ochta stufe djan kote pre.

³⁸An i wudareskri halla fun o nordetikro wudar his i wudar, hoi djas an i tikni isema. Kote well o mass kol viechendar thodo, hoi wenn tseles chatchedo o Debleske.

³⁹Un an i wudareskri halla fun kau wudar his star chapangre tardo, dui ap haki rig. Un ap lende wenn kol vieche maredo, hoi o Debleste dino wenn, kolla kai wenn tseles chatchedo, un kolla kai wenn maredo, te well i doosh krik lino, ninna kolla kai wenn maredo, te well lauter pale mishto.

⁴⁰Un win glan i wudareskri halla his star chapangre, dui ap haki rig kote, kai djan le dren an o nordetikro wudar.

⁴¹Jaake his ap haki rig pash ko baro wudar star chapangre tardo. Kolla hi khetne ochta chapangre, ap kolende i vieche maredo wenn.

⁴²Un kol star chapangre, hoi kol viechenge hi, hoi o Debleske tseles chatchedo wenn, kolla his dino dran bare barra, 75 (efta-deesh-te-pantch) centimetarja lengsto, un ninna jaake buchlo, un i paash metari baro. Koi pre wenn kol tchurja un wawar koola tchiddo, kolentsa i vieche maredo wenn, sawe vieche, kai wenn tseles chatchedo, un hake wawaren ninna.

⁴³Un ap i chapangre was o mass tchiddo. Un an i massurja trujel his hidjepangre[71] dren dino, hoi hi i wast buchlo.

⁴⁴Palle anas lo man glan koi tikni glanstuni platsa. Kote dikom dui iseme, kolengre wudja ap koi tikni glanstuni platsa djan. Koi jek isema his pash o nordetikro wudar, un lakri glanstuni rig sikrell kote, kai o kham pralstunes tardo hi. Un koi wawar isema his pash ko wudar, hoi kote tardo hi, kai o kham pralstunes hi, un lakri glanstuni rig sikrell kote, kai norden hi.

⁴⁵Un ko mursh penas ap mande: Kai isema kolakri glanstuni rig kote sikrell, kai o kham pralstunes tardo hi, hi kol rashajenge, kai budrenn an o Debleskro kheer.

⁴⁶Un koi isema, kolakri glanstuni rig kote sikrell, kai norden hi, hi kol rashajenge, kolla pengri budi ap i chatchepaskri[72] krenn. Kolla hi kol mursha, kolengro dad o Zadok his. I tsele murshendar, kai wenn dran o kheer Levi, hi jon kokres kolla, kai nai wenn glan o baro Debleste, te budrenn le leske.

⁴⁷Un ko mursh dikas pal, har baro koi tikni glanstuni platsa hi: Koles his star rigja, kolendar hakeni jaake baro hi har koi wawar: 50 (paash-sheel) metarja. Glan o Debleskro kheer his koi chatchepaskri tardo.

⁴⁸Un job anas man dren an i glanstuni halla o Debleskro kherestar. Un job dikas pal, har baro i glanstuni halla hi: Ap haki rig o wudarestar his i massuri 2,5 (dui-te-paash) metarja pesso. O wudar his efta metarja buchlo. Un i massurja ap haki rig lestar his 1,5 (jek-te-paash) metarja buchlo.

⁴⁹Koi tseli glanstuni halla his deesh metarja buchlo un shob metarja lengsto. Un deesh stufe djan ap late pre. Un pash o wudar his ap haki rig jek turmo tardo.