Read O Debleskro Drom - I Bibla an o Romano Rakepen 2021 Hesekijel 41 Bible Online

Hesekijel 41 - O Debleskro Drom - I Bibla an o Romano Rakepen 2021 bible

Hesekijel 41

¹Un ko mursh anas man an koi bari isema o Debleskro kherestar dren. Un job dikas pal, har baro i massurja hi, hoi tchatches un serwes pash o wudar hi. Jon his triin metarja pesso.

²Un o wudar his pantch metarja buchlo. Un i massurja tchatches un serwes o wudarestar his hakeni 2,5 (dui-te-paash) metarja buchlo. Un job ginas tele, har baro koi tseli bari isema hi. Koja his 20 (biish) metarja lengsto un 10 (deesh) metarja buchlo.

³Palle djas ko mursh an koi palstuni isema. Un job dikas pal, har pesso koi massuri pash o wudar hi: Ap haki rig his li jek metari pesso. Un o wudar his triin metarja buchlo. Un i massurja ap kol dui rigja o wudarestar his hakeni 3,5 metarja lengsto.

⁴Un job ginas tele, har baro koi tseli palstuni isema dren hi: Koja his 10 metarja baro un deesh metarja buchlo, jaake buchlo har koi bari isema ninna hi. Un job penas ap mande: Kaja hi o Debleskri kutch isema.

⁵Un job dikas pal, har baro i massuri o Debleskro kherestar hi: Koja his triin metarja pesso. Trul o kheer trujel his i rigjakro kheer, kai tikne iseme dren hi. Haki isema his dui metarja buchlo.

⁶Un kol tikne iseme his jaake tardo, te his trijanda iseme tella, un trijanda mashkralstunes un trijanda pralstunes. Un jon his jaake trul o Debleskro kheer trujel tardo, te wenn le rikedo an peste, un hunte wenn gar an o khereskri massuri dren.

⁷Un kol tikne isema, hoi pral i wawarende his, his buchleder har kolla tel lende. Kolla, hoi telstunes his, his i tikneder. Un kolla, kai pralstunes his, his i buchleder. Un i treppa djas fun o telstuno an o mashkralstuno un fun kote an o pralstuno[73].

⁸Palle dikom tele un dikom, kai his i hadedi platsa trul o Debleskro kheer. Kai platsa his triin metarja pesso. Koi pre his ko rigjakro kheer tardo.

⁹Leskri massuri win his 2,5 (dui-te-paash) metarja pesso. Trul o rigjakro kheer his kai platsa 2,5 (dui-te-paash) metarja buchlo. Un an o rigjakro kheer his dui wudja, hoi djan ap kai platsa, jek wudar ap i serwi rig, un jek wudar ap i tchatchi rig. Trul kai platsa his i kotar phub, hoi tchi pre tardo hi. Koi phub his deesh metarja buchlo.

¹²Wergel koi kotar phub un pal o Debleskro kheer his i wawar kheer tardo ap koi rig, kai o kham tele djal. Kau kheer his 35 (trijanda-te-pantch) metarja lengsto un 45 (star-deesh-te-pantch) metarja buchlo. Leskri massuri his ap hake star rigja 2,5 (dui-te-paash) metarja pesso.

¹³Un o mursh dikas tele, har lengsto o Debleskro kheer hi: Kowa his 50 (paash-sheel) metarja lengsto. Un koi platsa pal o Debleskro kheer bis pash ko kheer, hoi ap koi rig hi, kai o kham tele djal, un kau kheer un leskre massurja his ninna 50 (paash-sheel) metarja.

¹⁴Un o buchlepen o glanstuni rigjatar fun o Debleskro kheer un koi platsa ap koi rig, kai o kham pre djal, his khetne ninna 50 (paash-sheel) metarja.

¹⁵Un o mursh dikas pal, har lengsto ko kheer hi, hoi ap koi rig tardo hi, kai o kham tele djal. Khetne peskre massurja ap kol dui rigja his kau kheer 50 metarja lengsto. Un kol massurja an koi bari isema an o Debleskro kheer un an i glanstuni halla,

¹⁶his dren i kashteha tchakedo fun i phub bis pre pash i tikne wochja. Un trul i wochja[74] djan triin shukar sane kashta trujel[75].

¹⁷An i kashteni massuri pral o baro wudar un an i tsele kashtene massurja an o Debleskro kheer his shukar koowa dren tchinlo, koles his jek barepen.[76]

¹⁸Koi his bolepangre un palmtikre ruka: jek palmtikro ruk mashkral dui bolepangre. Hako bolepaskres his jaka un i mui ap dui rigja:

¹⁹Ap jek rig dikas o mui i menshestar ap i palmtikro ruk. Ap i wawar rig dikas o mui i terno lewestar ap i palmtikro ruk. Un sawo tchinepen his an i tsele kashtene massurja trujel dren tchinlo an o Debleskro kheer:

²⁰Fun i phub bis pre pral i wudja his sawe bolepangre un palmtikre ruka an i kashtene massurja dren tchinlo.

²¹An i bari isema his pesse kashta tchatches un serwes pash o wudar tardo, kolen his star rigja, hoi his emligo bares, jaake har ko wudar glan i kutch isema.

²²Koi his tchomone tardo, hoi win dikas har i kashteno altaro. Kowa his 1,50 (jek-te-paash) metari baro, un jek metari lengsto un jek metari buchlo. Un leskre ekke, leskro piro un leskre rigja his dran kasht kerdo. Un ko mursh penas ap mande: Kawa hi koi chapaskri, hoi glan o baro Debleste tardo hi!

²³Un glan i bari isema un glan i kutch isema his glan hakeneste dui wudja, jek pal o wawar[77]. Un an hako wudar his dui kotja jek langs i wawar. Kolla nai rissrenn pen.

²⁵Un ninna an kol wudja glan i bari isema his bolepangre un palmtikre ruka dren tchinlo, jaake har an i kashtene massurja. Win glan o wudar glan i glanstuni halla his i dacha[78] dran kasht.

²⁶Un an i massurja an i glanstuni halla his ap kol dui rigja tikne wochja dren. Un palmtikre ruka his an i kashtene massurja dren tchinlo, jaake har ninna an o rigjakro kheer un an i kashteni dacha.