Read O Debleskro Drom - I Bibla an o Romano Rakepen 2021 Hesekijel 44 Bible Online

Hesekijel 44 - O Debleskro Drom - I Bibla an o Romano Rakepen 2021 bible

Hesekijel 44

¹Un o mursh anas man pale pash ko wudar, hoi win glan i bari glanstuni platsa hi, ap koi rig, kai o kham pre djal. Kau wudar his pandlo.

²Un o baro Dewel penas ap mande: Kau wudar atchell pandlo, un well gar pre kerdo. Un kek djal an kau wudar dren! Me, o baro Dewel, ko Dewel pral Israel, djom an kau wudar dren. Doleske atchell lo pandlo.

³Kokres o rai pral Israel nai djal dren, un beshell koi, un chal kote glan mande peskro kotar kolestar, hoi mange, o baro Debleske anlo was. Te well lo kote, hunte djal lo an i wudareskri halla dren un ninna kote pale win.

⁴Un o mursh anas man pash o wudar, hoi ap i nordetikri rig hi, un djas kote mantsa dren ap koi tikni glanstuni platsa glan o baro Debleskro kheer. Koi dikom, kau kheer his pherdo o baro Debleskro railepen. Un me mukom man ap i phub te perell glan leste.

⁵Un o baro Dewel penas ap mande: Tu, mensho, kre tire jaka un kanda pre, un de jak ap halauter, hoi me tuha rakrau! Kamau tuke te penell, hoi tumendar kamau miro khereske, un hoi kote hunte krenn. De jak, te djiness, koon nai djal dren un koon gar.

⁶Ap i Israelitarjen, kai hi sawe menshe kai mukenn pen tchi te penell, pen: Kawa penell o baro Dewel, maro rai: Tumer dran o kheer Israel, mukenn tele tumaro tselo djungelo koweha!

⁷Tumer mukan wawar menshen an miro kheer dren, sawen kolengro dji gar mange hi, un kai hi gar tchinlo ap pengro mass. Jaake kran, te was miro kheer pale-tchiddo. Jon his koi pashel, har anan tumer chapen un thulepen un rat glan mande. Jaake phagan tumer, hoi mer win kram. Koi pashel well kau tselo djungelo kowa, hoi kran.

⁸Tumer kokres kran gar koi budi an miro kheer. Na-a, tumer lan wawar murshen, te krenn le tumenge koi budi an miro kheer.

⁹Doleske penau me, o baro Dewel, tumaro rai: Kek dran i wawar them[81], koleskro dji gar mange hi, un kai hi gar tchinlo ap peskro mass, nai well an miro kheer dren, witar kek wi-themari, kai mank tumende djiwell.

¹⁰Har i Israelitarja mange o dumo sikran, un wawar deblenge palla nashan, koi djan ninna i Levitarja mandar krik. Kanna hunte hidjrenn le pengri phagi.

¹¹Lengri budi an miro kheer hi kanna, te denn le jak an i bare wudja glan miro kheer. Ninna hunte marenn le kol viechen, hoi i menshe mange anenn, sawe vieche, kai wenn tseles chatchedo un sawe, hoi chan le khetne glan mande. Jaake budrenn le mire tsele menshenge.

¹²Bis kau diwes anan le viechen lenge glan lengre chochene deblende, un kran jaake, te peran i Israelitarja miro dromestar tele. Doleske hadom miro wast un dom man sowel, te dap len pengri phagi. Kawa penell o baro Dewel, maro rai.

¹³Jon nai atchenn buder gar mire rashaja un wenn buder gar pash kol tsele koola, hoi mange hi, un hunte rikrenn pen pale fun ko chapen, hoi mange dino was, un kokres i rashaja nai chan. Jon hunte ladjenn pen pral ko djungelo koowa, hoi le kran.

¹⁴Un me krau lendar budepangre, kai an miro kheer koi budi krenn, hoi kerdo hunte well.

¹⁵Kol rashaja dran o kheer Levi, kolengro phuro dad o Zadok his, jon atchenn mire rashaja, un nai budrenn mange. Har i Israelitarja mandar tele peran, kran jon pengri budi mishto an miro kheer. Doleske nai atchenn le mire rashaja un nai anenn o thulepen un o rat kol marede viechendar glan mande. Kawa penell o baro Dewel, maro rai.

¹⁶Jon nai wenn an miro kheer dren, un jon wenn pash miri chapaskri, te wenn le mange koi un budrenn mange an miro kheer.

¹⁷Te wenn le an kol wudja dren, hoi djan ap koi tikni glanstuni platsa, hunte riwenn le i rashajengre laintikre koola an. Kek koola dran bakrengre balla hunte wenn ap lende an ko tsiro, kai budrenn ap i tikni glanstuni platsa un dren an o kheer.

¹⁸Lengro shereskro diklo un lengre cholopja hunte wenn dran laintikro than. Kek koola hunte wenn ap lende, hoi krenn, te well lenge tato un te nashell o pani lendar tele.

¹⁹Te djan le ap i bari glanstuni platsa win pash i menshende, hunte riwenn le kol koola, an kolende jon budran, pale win, un tchiwenn len tele an kol iseme, hoi i rashajenge hi. Un riwenn wawar koola an, te taprenn i menshe gar i rashajengre koola an, un merenn.

²⁰Un i rashaja hunte tchinenn gar pengre balla tseles tele, un mukenn len ninna gar lengsto te well. Tiknes hunte wenn le tchinlo.

²¹Te djan le dren ap koi tikni glanstuni platsa glan o Debleskro kheer, hunte pijan le kek mool.

²²Un i mukli djuwjat nai romedinerenn le gar, witar gar i djuwjat, kolakro rom meras. Na-a, kokres i tchai dran o kheer Israel, kai kek murshestar an-tapedo hi, nai romedinerenn le, un i djuwel, kolakro rom i rashai his un meras.

²³I rashaja hunte sikrenn mire menshende, hoi mange, o Debleske hi, un kowa, hoi i menshenge hi. Un jon hunte djinenn, hoi pale-tchiddo glan mande hi, un hoi gar pale-tchiddo glan mande hi.

²⁴Te well i tchingepen glan lende anlo, hi jon i tchatchepangre mursha un hunte penenn o tchatchepen win, un hunte djan pal mire tchatchepaskre laba. Un jon hunte krenn, te wenn mire bare diwessa ap o tchatcho tsiro jaake dren rikedo, har me penom, te well kowa kerdo. Ninna denn le jak, te well o Debleskro diwes[82] dren rikedo.

²⁵Un pash i muleste hunte djan le gar dren, te krenn le pen gar pale-tchiddo. Kokres pash pengro dadeste un pengri date un pash o tchaweste un pash i tchate un pash o phraleste un pash i phenjate, kolat gomme kek murshes hi, pash lende nai djan le. Kote nai krenn le pen pale-tchiddo.

²⁶Te kras pes i rashai ap sau muleste pale-tchiddo, hunte krell lo, hoi glan tchinlo hi, te well lo pale erligo. Te was lo pale erligo, atchell lo gomme efta diwessa khere.

²⁷Ap ko diwes, kai djal lo pale ap koi tikni glanstuni platsa, te krell lo peskri budi an miro kheer, hunte marell lo mange i vieches, te well o pale-tchiddo koowa lestar krik lino. Kawa penau me, o baro Dewel, tumaro rai.

²⁸I rashajenge well kek kotar phub, hoi o dadestar ap o tchaweste dureder dino well. Me hom lengro kotar. Len well kek kotar them an o them Israel. Me dau len, hoi len hunte well djipaske.

²⁹Lengro chapen lenn le kolestar, hoi glan mande anlo well, ko djobestar un kol viechendar, hoi maredo wenn, te well i doosh un o pale-tchiddo koowa krik lino, un kol viechendar, hoi wenn maredo, te well lauter pale mishto. Ninna lenn le halauter, hoi i menshe mange ap i rig tchiwan.

³⁰Ninna o feteder djob kolestar, hoi newes baro was, un kowa, hoi hunte denn i menshe o Debleske, hi i rashajenge. Anenn lenge ninna i erste mare, hoi o newo djobestar peklo wan. Koon kowa krell, ap koleste un leskri familja well o Debleskri bacht.

³¹Kek tchirklen un wawar viechen, hoi meran oder mulo dandedo wan, te chan i rashaja.